ଭୁବନେଶ୍ବର: ନିଛାଟିଆ ଅନ୍ଧାର ରାତିର ସୁଯୋଗ ନେଇ ଦାମୀ କାରରେ ହେଉଥିଲା ଗଞ୍ଜେଇ ଚୋରାଚାଲାଣ । ହେଲେ ଏମାନଙ୍କ ଚାଲ୍ ରେ ପାଣି ପକାଇଛି ପୋଲିସ । ଏହି ଘଟଣାରେ 2 ଗଞ୍ଜେଇ ମାଫିଆଙ୍କୁ ଗିରଫ କରିବା ସହ 14 କେଜିର ଗଞ୍ଜେଇ ଜବତ କରିଛି ପୋଲିସ ।
ସୂଚନା ଅନୁସାରେ, କନ୍ଧମାଳରୁ ଆସିଥିବା ଗଞ୍ଜେଇକୁ ଭୁବନେଶ୍ବରରେ ଡିଲ କରିବାକୁ ଯୋଜନା ରଖିଥିଲେ ଗଞ୍ଜେଇ ମାଫିଆ । ହେଲେ ଡିଲ ହେବା ପୂର୍ବରୁ ବାଙ୍କୁଆଳ କୂଆଖାଇ ବ୍ରିଜ ନିକଟରେ ଗାଡି ଛିଡା ହୋଇଥିବା ସମୟରେ ସନ୍ଦେହ କରି ଛାନଭିନ କରିଥିଲା କମିଶନରେଟ ପୋଲିସ । ଏହାପରେ ଦୁଇ ଗଞ୍ଜେଇ ମାଫିଆ ସହ ଦୁଇଟି ବସ୍ତାରେ ଗଞ୍ଜେଇ ଜବତ କରିଛି ପୋଲିସ ।
ଗିରଫ ହୋଇଥିବା ଦୁଇ ଅଭିଯୁକ୍ତ ହେଲେ କନ୍ଧମାଳ ଖଜୁରିଆପଡାର ସତିଶ କୁମାର ପ୍ରଧାନ, କେନ୍ଦୁଝରର ଘଷିପୁରାର ସୁଶାନ୍ତ ସାହୁ । ଉଭୟ କନ୍ଧମାଳରୁ ଗଞ୍ଜେଇ ଆଣି ରାଜଧାନୀରେ ବେପାର କରୁଥିବା ପୋଲିସ ଜାଣିବାକୁ ପାଇଛି । ଆଉ ତାଙ୍କର ଏହି ଡିଲ ସମ୍ପର୍କରେ, ଯେପରି କେହି ସନ୍ଦେହ କରିବେ ନାହିଁ । ସେଥିପାଇଁ ଅଭିୟୁକ୍ତମାନେ ଦାମୀ କାର ବ୍ୟବହାର କରୁଥିଲେ ବୋଲି ଭୁବନେଶ୍ବର ଡିସିପି ସୂଚନା ଦେଇଛନ୍ତି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
