ଭୁବନେଶ୍ବର: ଯୁକ୍ତ ଦୁଇ ବାର୍ଷିକ ବୋର୍ଡ ପରୀକ୍ଷା ନେଇ ବିଭିନ୍ନ ଅଂଶୀଦାରଙ୍କ ସହ ଆଲୋଚନା କରିବା ଲାଗି ଗଣଶିକ୍ଷା ବିଭାଗ ପକ୍ଷରୁ ନିର୍ଦ୍ଦେଶ ପରେ ଉଚ୍ଚ ମାଧ୍ୟମିକ ଶିକ୍ଷା ପରିଷଦ ପକ୍ଷରୁ ବିଭିନ୍ନ ଅଂଶୀଦାରଙ୍କ ସହ ବିଚାର ବିମର୍ଶ ଜାରି ରହିଛି । ଏଯାଏଁ ପ୍ରାଥମିକ ପର୍ଯ୍ୟାୟ ଆଲୋଚନା ମୁତାବକ ଏପ୍ରିଲ ତୃତୀୟ ସପ୍ତାହରୁ ଯୁକ୍ତ ୨ ପରୀକ୍ଷା ଅଫଲାଇନରେ କରିବାକୁ ସଭିଏଁ ପ୍ରସ୍ତାବ ଦେଇଛନ୍ତି । ସେପଟେ ଛାତ୍ରଛାତ୍ରୀ ଏହାକୁ ସ୍ବାଗତ କରିବା ସହ ସିବିଏସଇ ଓ ଆଇସିଏସଇ ଭଳି ପରିଷଦ ପକ୍ଷରୁ ମଧ୍ୟ ତୁରନ୍ତ ତାରିଖ ଘୋଷଣା କରିବାକୁ ଦାବି କରିଛନ୍ତି ।
ତେବେ ସିବିଏସଇ ଓ ଆଇସିଏସଇ ପରେ ଏବେ ସିଏଚଏସଇ ଉପରେ ନଜର । ତେଣୁ, ପରୀକ୍ଷା ପାଇଁ ଚାଲିଛି ମାନସ ମନ୍ଥନ, ନିର୍ଦ୍ଧାରିତ ତାରିଖ ଘୋଷଣାକୁ ଅପେକ୍ଷା । ଏପ୍ରିଲ ତୃତୀୟ ସପ୍ତାହରୁ ଯୁକ୍ତ ୨ ବାର୍ଷିକ ବୋର୍ଡ଼ ପରୀକ୍ଷା ନେଇ ଚାଲିଛି ପ୍ରକ୍ରିୟା । ବିଭିନ୍ନ ଷ୍ଟେକହୋଲଡ଼ର ମାନଙ୍କୁ ନେଇ ସିଏଚଏସଇ ଆରମ୍ଭ କରିଛି ବିଚାର ବିମର୍ସ । ପ୍ରଥମ ପର୍ଯ୍ୟାୟରେ ସମସ୍ତ ସରକାରୀ ହାଇଅର ସେକେଣ୍ଡାରୀ ସ୍କୁଲର ଅଧ୍ୟକ୍ଷଙ୍କ ଆଲୋଚନା ଶେଷ ହୋଇଛି ।
ସ୍କୁଲ ଗୁଡିକରେ ଧିରେଧିରେ ସିଲାବସ ଶେଷ ହେଉଥିବା ବେଳେ ପିଲାମାନେ ବର୍ତ୍ତମାନ ଡାଉଟ କ୍ଲିଅରିଂ କ୍ଳାସ କରୁଛନ୍ତି । ତେଣୁ, ପରୀକ୍ଷା ପାଇଁ କୌଣସି ଅସୁବିଧା ନାହିଁ ଏବଂ ଏପ୍ରିଲ ୧୫ ପରଠାରୁ ଦ୍ବାଦଶ ଥିଓରି ପରୀକ୍ଷା ଏବଂ ମାର୍ଚ୍ଚ ୧୫ରୁ ପ୍ରାକ୍ଟିକାଲ ପରୀକ୍ଷା ହେବା ନେଇ ପ୍ରାୟତଃ କଲେଜର ଅଧ୍ୟକ୍ଷ ମତ ଦେଇଛନ୍ତି ।
ସେହିଭଳି ବିଭିନ୍ନ ବର୍ଗର ଶିକ୍ଷକ ଓ ଅଧ୍ୟାପକ ମାନେ ମଧ୍ୟ ଅଫଲାଇନ ପରୀକ୍ଷା କରିବା ସପକ୍ଷରେ ପ୍ରସ୍ତାବ ଦେଇଛନ୍ତି । ତେବେ ଏଭଳି ପର୍ଯ୍ୟାୟକ୍ରମେ ଅନୁଦାନପ୍ରାପ୍ତ ବେସରକାରୀ କଲେଜ ଅଧ୍ୟକ୍ଷ, ଘରୋଇ ଶିକ୍ଷାନୁଷ୍ଠାନ କର୍ତ୍ତୃପକ୍ଷ, ଶିକ୍ଷକ ଓ ଅଭିଭାବକ ସଂଘ ସହ ଆଲୋଚନା କରୁଛି ସିଏଚଏସଇ । ସେପଟେ ଏପ୍ରିଲ ମାସରେ ଅଫଲାଇନ ପରୀକ୍ଷା ହେଲେ ଛାତ୍ରଛାତ୍ରୀ ପ୍ରସ୍ତୁତି କରିପାରିବେ ବୋଲି କହିଛନ୍ତି । କିନ୍ତୁ ସିବିଏସଇ ଏବଂ ଆଇସିଏସଇ ବୋର୍ଡ ପକ୍ଷରୁ ନିର୍ଦ୍ଧିଷ୍ଟ ପରୀକ୍ଷା ତାରିଖ ଘୋଷଣା ଭଳି ସିଏଚଏସଇ ମଧ୍ୟ ତୁରନ୍ତ ପରୀକ୍ଷା ତାରିଖ ଓ କାର୍ଯ୍ୟସୂଚୀ ଘୋଷଣା କରି ପିଲାଙ୍କୁ ଚାପମୁକ୍ତ କରୁ ବୋଲି ପରୀକ୍ଷାର୍ଥୀ କହିଛନ୍ତି ।
ତେବେ କୋରୋନା ସଂକ୍ରମଣ କମୁଥିବାରୁ ଅଫଳାଇନ ପରୀକ୍ଷା ନେଇ ଏବେ ଅଧିକାଂଶ ମହଲରେ ଉଠିଛି ସ୍ବର। ସେପଟେ ଆଜି ରାତି ୧୨ଟା ସୁଦ୍ଧା ପୂର୍ବରୁ ହୋଇଥିବା କ୍ବାର୍ଟର ଏଣ୍ଡ ପରୀକ୍ଷା ଫଳ ଅନଲାଇନରେ ଅପଡେଟ୍ କରିବାକୁ ନିର୍ଦ୍ଦେଶ ରହିଛି । ଏସବୁ ଭିତରେ ପରିଷଦ ପକ୍ଷରୁ କେବେ ପରୀକ୍ଷା ତାରିଖ ଘୋଷଣା ହେଉଛି ତାହାକୁ ଅପେକ୍ଷା ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
