ଭୁବନେଶ୍ବର: ମାଟ୍ରିକ ରେଜଲ୍ଟ ବାହାରିବା ପରେ ଏବେ ପିଲାଙ୍କୁ ଘାରିଛି ଆଡମିଶନ ଚିନ୍ତା । ଚଳିତ ବର୍ଷ କୋଭିଡ ଯୋଗୁଁ ପରୀକ୍ଷା ବାତିଲ ହୋଇ ବିକଳ୍ପ ମୂଲ୍ୟାୟନରେ ଫଳ ପ୍ରକାଶ ପାଇଛି । ଯେଉଁ କାରଣରୁ ଯୁକ୍ତ ଦୁଇ ସିଟ୍ ତୁଳନାରେ ଦଶମ ପାସ୍ କରିଥିବା ଛାତ୍ରଛାତ୍ରୀଙ୍କ ସଂଖ୍ୟା ବହୁତ ଅଧିକ ରହିଛି । ଏପରିସ୍ଥଳେ ଭଲ କଲେଜରେ ସିଟ୍ ମିଳିବ କି ନାହିଁ ସେ ନେଇ ଦ୍ବନ୍ଦରେ ପଡିଛନ୍ତି ଛାତ୍ରଛାତ୍ରୀ । ସେପଟେ ଗଣଶିକ୍ଷା ବିଭାଗ ପାଇଁ ମଧ୍ୟ ଏହା ଚ୍ୟାଲେଞ୍ଜ ସୃଷ୍ଟି କରିଛି ।
ଯୁକ୍ତ ଦୁଇରେ ନାମଲେଖା ପାଇଁ ଆସନ୍ତା 14 ରୁ 16 ତାରିଖ ଭିତରେ ଆବେଦନ ପ୍ରକ୍ରିୟା ଆରମ୍ଭ ହେବ । ଏନେଇ ଖୁବଶୀଘ୍ର ବିଜ୍ଞପ୍ତି ପ୍ରକାଶ ପାଇବ । ରାଜ୍ୟର ବିଭିନ୍ନ ଉଚ୍ଚ ମାଧ୍ୟମିକ ବିଦ୍ୟାଳୟ ପକ୍ଷରୁ ସମସ୍ତ ଷ୍ଟ୍ରିମର 55 ହଜାରରୁ ଅଧିକ ସିଟ୍ ବୃଦ୍ଧି ପାଇଁ ଆବେଦନ ହୋଇଛି । ତେବେ ବିଜ୍ଞାନ ପାଇଁ ଲାବ୍ରୋଟୋରୀ ସମସ୍ୟା ସହ ସେଲ୍ଫ ଫାଇନାନ୍ସିଂ କଲେଜରେ ମଧ୍ୟ ସମାନ ସମସ୍ୟା ନେଇ ଭିତ୍ତିଭୂମି ଯାଞ୍ଚ ଚାଲିଛି । ଏସବୁ ଅନୁଧ୍ୟାନ ପରେ ନିଷ୍ପତ୍ତି ନିଆଯିବା ସହ ଆବେଦନ ପୂର୍ବରୁ ସିଟ୍ ବୃଦ୍ଧି ନେଇ ସାମ୍ସ ଓ୍ବେବସାଇଟରେ ତଥ୍ୟ ଉପଲବ୍ଧ ହେବ ବୋଲି ବିଭାଗୀୟ ମନ୍ତ୍ରୀ ସୂଚନା ଦେଇଛନ୍ତି ।
