ଭୁବନେଶ୍ବର: ମହାମାରୀ କୋରୋନାର ଦ୍ବିତୀୟ ଲହରକୁ ନେଇ ଚାରିଆଡେ ଏବେ ହାହାକାର । ମୃତ୍ୟୁର ତାଣ୍ଡବ ଖେଳୁଛି ମହାମାରୀ । ଏହି ସମୟରେ ଲୋକେ ନିଜ ଜୀବନ ବଞ୍ଚାଇବା ପାଇଁ ଅସମର୍ଥ ହେଉଥିବା ବେଳେ ନିର୍ବାକ ପଶୁଙ୍କୁ ପଚାରେ କିଏ । ତଥାପି ସତର୍କତାର ସହ ନିଜେ ବଞ୍ଚିବା ସହ ଅନ୍ୟର ଭୋକର ଭାବକୁ ବୁଝିଛନ୍ତି କିଛି ସଂସ୍ଥା । ଆଉ ସଟଡାଉନରେ ସବୁ ଲୋକ ଘରେ ଥିବା ବେଳେ ସେମାନେ ପର୍ଯ୍ୟଟନ ସ୍ଥଳୀରେ ଥିବା ପଶୁଙ୍କୁ ଖାଇବାକୁ ଦେଉଛନ୍ତି ।
ଖାଲି ସଟଡାଉନରେ ନୁହେଁ ଛୁଟି ଦିନ ମାନଙ୍କର ବି ଖାଇବାକୁ ଦଉଛନ୍ତି ଏପରି କିଛି ସଂସ୍ଥା । ତେବେ ସଟଡାଉନ ଆଉ ଲକଡାଉନ୍ କାରଣରୁ ଯାତାୟତ ଠପ୍ ପଡିଛି । ଖଣ୍ଡଗିରି-ଉଦୟଗିରି ଭଳି ପର୍ଯ୍ୟଟନ ମଧ୍ୟ ବନ୍ଦ ରହିଛି ଫଳରେ ପର୍ଯ୍ୟଟକ ଆସୁନାହାଁନ୍ତି କି ମାଙ୍କଡଙ୍କୁ ଖାଇବାକୁ ଦେଉନାହାଁନ୍ତି ତେଣୁ ଏହି ମାଙ୍କଡଙ୍କ ମନର କଥା ବୁଝୁଛନ୍ତି ପିପୁଲ ଫର୍ ଆନିମଲ୍ ସଂସ୍ଥା । ପ୍ରତିଦିନ ଆସି ସେମାନଙ୍କୁ ବାଦାମ, ବିସ୍କୁଟ, କଦଳୀ ଆଦି ଖାଇବାକୁ ଦେବା ସହ ପାଣି ବି ଦେଉଛନ୍ତି । ଖାଲି ମାଙ୍କଡଙ୍କୁ ନୁହେଁ ବରଂ କୁକୁରଙ୍କୁ ମଧ୍ୟ ଖାଇବାକୁ ଦେଉଛନ୍ତି ।
ରାଜ୍ୟ ଅବା ଦେଶରେ ଲକଡାଉନ କାରଣରୁ ନିର୍ବୋଧ ପଶୁଙ୍କ କଥା ସତର୍କତାର ସହ ବୁଝିବାକୁ ଅନ୍ୟଙ୍କୁ ଆହ୍ବାନ ଦେଇଛି ସଂସ୍ଥା । ଆମର ଛୋଟିଆ ପ୍ରୟାସ ଟିଏ ପଶୁଙ୍କ ଭୋକକୁ ନିବାରଣ କରିପାରିବ ବୋଲି କହିଛନ୍ତି ପିପୁଲ୍ସ ଫର୍ ଆନିମଲ୍ ସଂସ୍ଥାର ସଦସ୍ୟ ବୃନ୍ଦ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
