ଭୁବନେଶ୍ବର: ଶିକ୍ଷା ଜଗତରେ କୋରୋନା ମାଡ । ଗୋଟେପଟେ ସରକାରୀ ସ୍କୁଲରେ ଉନ୍ନତମାନର ଶିକ୍ଷା ନେଇ ସନ୍ଦେହ, ଅନ୍ୟପଟେ ଘରୋଇ ସ୍କୁଲରେ ଅହେତୁକ ଫି'ର ଚାପ । ଏପରି ସ୍ଥିତିରେ ପିଲାଙ୍କ ଭବିଷ୍ୟତକୁ ନେଇ ଚିନ୍ତାରେ ଅଭିଭାବକ । ଏପଟେ କୋଭିଡ କାରଣରୁ ବହୁ ମାତ୍ରାରେ କ୍ଷତି ସହିଛି ଘରୋଇ ସ୍କୁଲ । ଅନେକ ଘରୋଇ ସ୍କୁଲ ନିଜ କର୍ମଚାରୀଙ୍କୁ ଦରମା ଦେବାରେ ମଧ୍ୟ ଅସମର୍ଥ । ଯାହାଫଳରେ ଫି' ବୃଦ୍ଧି କରିବା ସ୍ବଭାବିକ କଥା କିନ୍ତୁ ବାଜିରେ ଲାଗିଛି ଛାତ୍ରଛାତ୍ରୀଙ୍କ ପାଠପଢା ।
ମହାମାରୀ କାରଣରୁ ଅନଲାଇନରେ ଚାଲିଥିବା ପାଠପଢାରେ କ୍ଲିୟର ହେଉନି ଛାତ୍ରଛାତ୍ରୀଙ୍କ ଡାଉଟ୍ , ସେପଟେ କ୍ଷତିର ଭରଣା ପାଇଁ ଅଭିଭାବକଙ୍କ ଉପରେ ଚାପ ପକାଉଛନ୍ତି ସ୍କୁଲ କର୍ତ୍ତୃପକ୍ଷ । ରି-ଆଡମିଶନ ଫି'କୁ ହାଇକୋର୍ଟ ଉଠାଇ ଦେବା ପରେ ବି ଅନେକ ସ୍କୁଲ ଜୋର ଜବରଦସ୍ତି ନେଉଛନ୍ତି ଏହି ଫି । ଖାଲି ଏତିକି ନୁହେଁ ବରଂ ପରୀକ୍ଷା ନ ଦେବାକୁ ମଧ୍ୟ ଅନେକ ସ୍କୁଲ୍ ବାଧ୍ୟ କରୁଛି । ଏପଟେ ମହାମାରୀ ବାହାନା ଦେଇ ସ୍କୁଲ ଗୁଡିକ ଧରାସାୟୀ ହୋଇ ପଡିଥିବା କହିଛନ୍ତି ଘରୋଇ ସ୍କୁଲ ସଂଘର ସଭାପତି ବଦ୍ରିନାଥ ପଟ୍ଟନାୟକ ।
ରାଜ୍ୟରେ ମହାମାରୀକୁ ବର୍ଷେ ପୁରିଛି କିନ୍ତୁ ଏପର୍ଯ୍ୟନ୍ତ ସରକାର ଘରୋଇ ସ୍କୁଲର ଫି' ଷ୍ଟ୍ରକଚର୍ ନେଇ କୌଣସି ନିର୍ଦ୍ଧିଷ୍ଟ ନିୟାମବଳୀ ସ୍ଥିର କରୁ ନାହାଁନ୍ତି, ଯାହା ଫଳରେ ସ୍କୁଲମାନଙ୍କର କୌଣସି ତାଳମେଳ ରହୁ ନାହିଁ । ଏପେଟ ପିଲାଙ୍କ ପାଠପଢା ପାଇଁ ବାଧ୍ୟ ହୋଇ ଅଭିଭାବକ ଧରାଇ ଦେଉଛନ୍ତି ପୁଳା ପୁଳା ଟଙ୍କା, ଯାହାଫଳରେ ଘରୋଇ ସ୍କୁଲ କ୍ଷେତ୍ରରେ ସରକାର ହସ୍ତକ୍ଷେପ ନିତାନ୍ତ ଜରୁରୀ ହୋଇ ପଡିଛି ।
ଭୁବନେଶ୍ବରରୁ ବିକାଶ ଦାସଙ୍କ ରିପୋର୍ଟ, ଇଟିଭି ଭାରତ
