ଭୁବନେଶ୍ବର: ବିରୋଧୀ ବିଧାୟକଙ୍କୁ ପ୍ରଶାସନିକ ଅଧିକାରୀଙ୍କ ଅଣଦେଖା । ଶାସକ ଦଳର ଇଙ୍ଗିତରେ ଅଧିକାରୀମାନେ ଏଭଳି କରୁଥିବା ଅଭିଯୋଗ ହୋଇଛି । କେବଳ ଶାସକ ଦଳର କର୍ମକର୍ତ୍ତାଙ୍କୁ ନେଇ ସରକାରୀ କାର୍ଯ୍ୟକ୍ରମ କରୁଛନ୍ତି ପ୍ରଶାସନିକ ଅଧିକାରୀମାନେ ।
ଗତ କିଛି ଦିନ ତଳେ ଦୁର୍ଗା ପୂଜା ପ୍ରସ୍ତୁତି ବୈଠକରେ ବାରବାଟୀ-କଟକର କଂଗ୍ରେସ ବିଧାୟକ ମହମ୍ମଦ ମୋକିମଙ୍କୁ ଆମନ୍ତ୍ରଣ କରାଯାଇନଥିଲା । ଯାହାକୁ ବିଭିନ୍ନ ମହଲରେ ସମାଲୋଚନା କରାଯାଇଥିଲା । ଖାଲି ସେତିକି ନୁହେଁ ନିର୍ବାଚନରେ ହାରିଥିବା ନେତାଙ୍କୁ ବୈଠକକୁ ଆମନ୍ତ୍ରଣ କରାଯାଇଥିବା ବେଳେ ଜଣେ ଲୋକ ପ୍ରତିନିଧିଙ୍କୁ କାହିଁକି ଅଣଦେଖା କରାଯାଉଛି ତାହା ଏବେ ପ୍ରଶ୍ନଚିହ୍ନ । ଏସମ୍ପର୍କରେ ବାଚସ୍ପତିଙ୍କୁ ଅବଗତ କରାଯିବା ସହ ବିଧାନସଭା ଏଥିକ୍ସ କମିଟିକୁ ଅବଗତ କରାଯାଇଥିବା କହିଛନ୍ତି କଂଗ୍ରେସ ବିଧାୟକ ମହମ୍ମଦ ମୋକିମ ।
କଂଗ୍ରେସ ପରି ବିଜେପି ମଧ୍ୟ ସମାନ ଅଭିଯୋଗ ଆଣିଛି । ସାତପଡା ହୁଡକୋ ପକ୍ଷରୁ ଏକ ଋଣ ମେଳାର ଆୟୋଜନ କରାଯାଇଥିଲା । ପ୍ରଥମେ ଫୋନ କଲ କରି ଆମନ୍ତ୍ରଣ କରାଯାଇଥିବାବେଳେ ପରେ ଏସଏମଏସ ଜରିଆରେ କାର୍ଯ୍ୟକ୍ରମରେ ଆସିବାକୁ ମନା କରାଯାଇଥିଲା ବୋଲି ବିଜେପି ବିଧାୟକ ଅଭିଯୋଗ କରିଛନ୍ତି । ବିରୋଧୀ ବୋଲି ଆମକୁ ଏହିସବୁ କାର୍ଯ୍ୟକ୍ରମରେ ବାରଣ କରାଯାଉଛି । ପ୍ରଶାସନର କର୍ମଚାରୀମାନେ ମଧ୍ୟ ଦଳୀୟ କର୍ମୀଙ୍କ ପରି କାମ କରୁଛନ୍ତି । ଅଧିକାରୀଙ୍କ ଏଭଳି ହୀନ ମାନସିକତା ଗଣତନ୍ତ୍ରକୁ ହତ୍ୟା କରୁଛି ବୋଲି ବିଜେପି ବିଧାୟକ ଅଭିଯୋଗ ଆଣିଛନ୍ତି ।
ତେବେ ଉଭୟ ଦଳର ଅଭିଯୋଗ ପରେ ଶାସକ ଦଳ ବିଧାୟକ ତଥା ପୂର୍ବତନ ବାଚସ୍ପତି କିଶୋର ମହାନ୍ତି ନିଜ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି, ଏପରି ହେବା ଠିକ୍ ନୁହେଁ । ଯଦି କାହାର କୌଣସି ଅଭିଯୋଗ ଥାଏ, ସେମାନେ ବାଚସ୍ପତିଙ୍କ ନିକଟରେ ଏସମ୍ପର୍କରେ ଅଭିଯୋଗ କରିବା ଉଚିତ୍ ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
