ଭୁବନେଶ୍ବର: ସୋମବାର ଖଣ୍ଡଗିରି ସଂପୁର ଠାରେ ରାସ୍ତା ଅବରୋଧ ଦେଖିବାକୁ ମିଳିଛି । ଅଭିନେତା ବାବୁସାନଙ୍କ ଗାଡି ଜଣେ ବ୍ୟକ୍ତିଙ୍କୁ ଧକ୍କା ଦେଇଥିବା ନେଇ କ୍ଷତିପୂରଣ ଦାବିରେ ଲୋକେ ଉତ୍ତେଜିତ ହୋଇଛନ୍ତି ।
ସୂଚନା ଅନୁଯାୟୀ, ସୋମବାର ସନ୍ଧ୍ୟା 6ଟା ସମୟରେ ସ୍ଥାନୀୟ ରଞ୍ଜନ ନାୟକ ନାମକ ଜଣେ ବ୍ୟକ୍ତି ରାସ୍ତାରେ ଛିଡା ହୋଇଥିବା ସମୟରେ ଏକ କାର ତାଙ୍କୁ ଧକ୍କା ଦେଇଥିଲା । ଫଳରେ ରଞ୍ଜନଙ୍କ ଗୋଡ ଭାଙ୍ଗିଯିବା ସହ ତାଙ୍କୁ ଗୁରୁତର ଅବସ୍ଥାରେ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରାଯାଇଥିବା ଜଣାପଡିଛି ।
ଏପଟେ ଧକ୍କା ଦେଇଥିବା କାର୍ ମଧ୍ୟରେ ଓଲିଉଡ ଅଭିନେତା ବାବୁସାନ୍ ବସିଥିବା ବେଳେ ଦୁର୍ଘଟଣା ପରେ ବାବୁସାନ୍ ଓ ଅନ୍ୟଜଣେ ବ୍ୟକ୍ତି ଅଟୋରେ ଖସିପଳାଇଥିବା ସ୍ଥାନୀୟ ବାସିନ୍ଦା ଅଭିଯୋଗ କରିଛନ୍ତି । ତେଣୁ ଏହି ଘଟଣା ପରେ କ୍ଷତିପୂରଣ ଦାବିରେ ଲୋକେ ରାସ୍ତା ଅବରୋଧ କରିଥିଲେ । ଖବର ପାଇ ଖଣ୍ଡଗିରି ଆଇଆଇସି ଲୋକଙ୍କୁ ବୁଝାସୁଝା କରିବା ସହ ଗାଡିଟିକୁ ଜବତ କରିଛନ୍ତି।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
