ଭୁବନେଶ୍ବର: ବାରବାଟୀ ଷ୍ଟାଡିୟମରେ ହେବାକୁ ଥିବା ଟି-୨୦ ପାଇଁ ବଢ଼ିଲା ଅଡୁଆ । ଷ୍ଟାଡିୟମରେ ଅଗ୍ନି ନିରାପତ୍ତା ବ୍ୟବସ୍ଥା ନଥିବାରୁ ନୋଟିସ ଜାରିକଲେ OHRC (Odisha Human Rights Commission) । ଜୁନ୍ ୧୨ ରେ ଭାରତ-ଦକ୍ଷିଣ ଆଫ୍ରିକା ଅନୁଷ୍ଠିତ ହେବାର ଥିଲା ।
ଜବାବ ଦାଖଲ ପାଇଁ କଟକ ଡିସିପି, ଓସିଏ ସମ୍ପାଦକଙ୍କୁ ନୋଟିସ ଜାରି କରାଯାଇଛି । ମେ' ୨୬ ମଧ୍ୟରେ ଜବାବ ରଖିବା ପାଇଁ କମିଶନ ପକ୍ଷରୁ ନିର୍ଦ୍ଦେଶ । ଏହି ପ୍ରସଙ୍ଗକୁ ନେଇ ମାନବାଧିକାର କର୍ମୀ ନିଶିକାନ୍ତ ମିଶ୍ର କମିଶନଙ୍କ ଦୃଷ୍ଟି ଆକର୍ଷଣ କରି କହିଛନ୍ତି ଯେ, ଟି -20 କ୍ରିକେଟ୍ ମ୍ୟାଚ୍ 12.06.2022 ରେ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ କଟକ ବାରବାଟୀ ଷ୍ଟାଡିୟମରେ ଅନୁଷ୍ଠିତ ହେବ । ବାରବାଟୀ ଷ୍ଟାଡିୟମରେ 44,000 ଦର୍ଶକଙ୍କ କ୍ଷମତା ଅଛି । ଯେଉଁଠାରେ ଅଗ୍ନି ନିରାପତ୍ତା ବ୍ୟବସ୍ଥା ନାହିଁ ।
ଏହି ପ୍ରସଙ୍ଗକୁ ବିଚାର କରି କମିଶନ କହିଛନ୍ତି, କ୍ରିକେଟ୍ ମ୍ୟାଚ୍ ସମୟରେ ଅଗ୍ନି ନିରାପତ୍ତା ବ୍ୟବସ୍ଥା ଏକ ଗୁରୁତ୍ୱପୂର୍ଣ୍ଣ ବିଚାର ଅଟେ ।ତେଣୁ ଅଭିଯୋଗ ଆବେଦନ ଏବଂ ଏନକ୍ଲୋଜରର ନକଲ ସହିତ ରିପୋର୍ଟ ରଖିବାକୁ ବାଧ୍ୟତାମୂଳକ କରିଛନ୍ତି । ଏହାପରେ ବାରବାଟୀରେ ମ୍ୟାଚ ନେଇ ଆଶା ଆଶଙ୍କା ସୃଷ୍ଟି ହୋଇଛି ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
