ଭୁବନେଶ୍ବର: ଓଡି଼ଶା ଖଣି ନିଗମ ଆଜି ମୁଖ୍ୟମନ୍ତ୍ରୀଙ୍କ ରିଲିଫ ପାଣ୍ଠିକୁ 500 କୋଟି ଟଙ୍କା ପ୍ରଦାନ କରିଛି । ଏହା ବ୍ୟତୀତ ଓଡି଼ଶା ଏଗ୍ରୋ ଇଣ୍ଡଷ୍ଟ୍ରିଜ୍ କର୍ପୋରେସନ୍ ଏବଂ ଓଡି଼ଶା କାଜୁ ବିକାଶ ନିଗମ ମଧ୍ୟ ରିଲିଫ ପାଣ୍ଠିକୁ 3.76 କୋଟି ଟଙ୍କା ପ୍ରଦାନ କରିଛନ୍ତି । ଭର୍ଚୁଆଲ୍ ପ୍ଲାଟଫର୍ମରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପସ୍ଥିତରେ ଏହି ଅର୍ଥର ଚେକ ଗ୍ରହଣ କରିଛନ୍ତି ମୁଖ୍ୟ ଶାସନ ସଚିବ ।
ମହାମାରୀ ସମୟରେ ଏହି ସହାୟତା ପାଇଁ ମୁଖ୍ୟମନ୍ତ୍ରୀ ଏହି ତିନୋଟି ନିଗମକୁ ଧନ୍ୟବାଦ ଜଣାଇଛନ୍ତି । ଓଏମସି ଅଧ୍ୟକ୍ଷ ସୁରେନ୍ଦ୍ର କୁମାର ଲୋକସେବା ଭବନରେ ମୁଖ୍ୟ ଶାସନ ସଚିବ ସୁରେଶ ମହାପାତ୍ରଙ୍କୁ 500 କୋଟି ଟଙ୍କାର ଚେକ୍ ପ୍ରଦାନ କରିଛନ୍ତି । ମହାମାରୀ ସତ୍ତ୍ବେ ଗତ ଆର୍ଥିକ ବର୍ଷରେ OMC 5.42 ପ୍ରତିଶତ ଅଭିବୃଦ୍ଧି ହାସଲ କରିଛି । ଗତ ବର୍ଷ ମୋଟ ଖଣିଜ ଉତ୍ପାଦନ 17.12 ନିୟୁତ ଟନ୍ ରହିଥିଲା ବୋଲି ଓଏମସିର ଅଧ୍ୟକ୍ଷ ସୁରେନ୍ଦ୍ର କୁମାର କହିଛନ୍ତି ।
ଗତ ଆର୍ଥିକବର୍ଷରେ OMC 5592 କୋଟି ଟଙ୍କାର ରାଜସ୍ୱ ହାସଲ କରିଥିଲା । ଯାହା ପୂର୍ବ ବର୍ଷ ତୁଳନାରେ 36.60 ପ୍ରତିଶତ ଅଧିକ । ଆସନ୍ତା ବର୍ଷ ସୁଦ୍ଧା 1 ବିଲିୟନ ଡଲାର ରାଜସ୍ବ ହାସଲ କରିବାକୁ OMC ଲକ୍ଷ୍ୟ ରଖିଥିବା ଓଏମସି ଅଧ୍ୟକ୍ଷ କହିଛନ୍ତି । ଏହା ସହ OMC ରାଜ୍ୟର ଅନେକ କଲ୍ୟାଣମୂଳକ କାର୍ଯ୍ୟକ୍ରମକୁ ସମର୍ଥନ ଓ ସହଯୋଗ କରୁଛି । ରାଜ୍ୟର 8ଟି ଜିଲ୍ଲାର 10 ଟି ଉତ୍ସର୍ଗୀକୃତ କୋଭିଡ ଡାକ୍ତରଖାନାକୁ ଅର୍ଥ ପ୍ରଦାନ କରୁଛି OMC ।
ସେହିପରି ଆଗ୍ରୋ ଇଣ୍ଡଷ୍ଟ୍ରିଜ୍ କର୍ପୋରେସନ୍ 2017-18 ବର୍ଷ ପାଇଁ 30% ଲାଭ ଅର୍ଥାତ 3,29,76,362 ଟଙ୍କା ପ୍ରଦାନ କରିଛି । ସେହିପରି କାଜୁ ବିକାଶ ନିଗମ 2018 ବର୍ଷ ପାଇଁ 30% ଲାଭ ଅର୍ଥାତ 46,51,200 ଟଙ୍କା ପ୍ରଦାନ କରିଛି । OAIC ଚେୟାରମ୍ୟାନ୍ ଦେବଶିଷ ମହାନ୍ତି ଏବଂ ଓଏସଡିସିସି ଅଧ୍ୟକ୍ଷ ଅମରେନ୍ଦ୍ର ମହାନ୍ତି ନିଜ ନିଜ ନିଗମ ପାଇଁ ମୁଖ୍ୟ ସଚିବ ସୁରେଶ ଚନ୍ଦ୍ର ମହାପାତ୍ରଙ୍କୁ ଏହି ଚେକ୍ ପ୍ରଦାନ କରିଛନ୍ତି ।
ଅତିରିକ୍ତ ଶାସନ ସଚିବ ରାଜ କୁମାର ଶର୍ମା ଉଭୟ ନିଗମର କାର୍ଯ୍ୟକଳାପ ବିଷୟରେ ସୂଚନା ଦେଇଛନ୍ତି । 1962 ମସିହାରେ ପ୍ରତିଷ୍ଠିତ OAIC 2015-16 ରୁ ଲାଭ କରିଆସୁଛି । ଏହା ରାଜ୍ୟରେ ଚାଷ ଯାନ୍ତ୍ରିକରଣ ମାଧ୍ୟମରେ କୃଷକଙ୍କ ସଶକ୍ତିକରଣକୁ ପ୍ରୋତ୍ସାହିତ କରୁଛି । ସେହିପରି, 1979 ରେ ପ୍ରତିଷ୍ଠିତ OSCDC 1995-96 ପରଠାରୁ ଲାଭ କରୁଛି । କାର୍ଯ୍ୟକ୍ରମରେ କୃଷି ଏବଂ କୃଷକ ସଶକ୍ତିକରଣ ମନ୍ତ୍ରୀ ଅରୁଣ ସାହୁ, ମୁଖ୍ୟମନ୍ତ୍ରୀଙ୍କ 5ଟି ସଚିବ ଭି. କେ ପାଣ୍ଡିଆନ୍, କୃଷି ସଚିବ ଏସ୍ କେ ବଶିଷ୍ଠ ଏବଂ ତିନିଟି ନିଗମର ବରିଷ୍ଠ ଅଧିକାରୀ ଉପସ୍ଥିତ ଥିଲେ ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
