ଭୁବନେଶ୍ବର: ବିଧାନସଭା ପରିବେଶ ସଂକ୍ରାନ୍ତୀୟ ଗୃହ କମିଟିର ଉଦବେଗ ପ୍ରକାଶ । Carbon emission ବର୍ତ୍ତମାନ ସମୟର ପରିବେଶ ପ୍ରଦୂଷଣ ପାଇଁ ସବୁଠାରୁ ଉଦବେଗର ବିଷୟ । ପ୍ରଦୂଷଣ ରୋକିବାକୁ ସବୁ ପୌରାଞ୍ଚଳରେ ସଚେତନତା ରଥ କରି ବହି ଛପାଇ ବାଣ୍ଟିବାକୁ ବିଭାଗୀୟ ଅଧିକାରୀଙ୍କୁ ନିର୍ଦ୍ଦେଶ ଦିଆଯାଇଛି ।
କଳକାରଖାନାର ନିର୍ଗତ ଦୂଷିତ ଜଳ, ପ୍ଲାଷ୍ଟିକର ବ୍ୟବହାର, ଗାଁ ଓ ସହର ସଫା ନହେବା, କାରଖାନାରୁ ବିଷାକ୍ତ ଅଙ୍ଗାରକାମ୍ଳ ବାହାରିବା ଏବେ ପ୍ରଦୂଷଣର ମୁଖ୍ୟ କାରଣ । ଆସନ୍ତା ବୈଠକରେ ପ୍ରଦୂଷଣ ସଂକ୍ରାନ୍ତୀୟ ନିୟମ ଓ କାର୍ଯ୍ୟାନୁଷ୍ଠାନ ସମ୍ପର୍କରେ ଅବଗତ କରାଇବାକୁ ବି ନିର୍ଦ୍ଦେଶ ରହିଛି। ବର୍ତ୍ତମାନ ରାଜ୍ୟର ସାତଟି ସହର ପ୍ରଦୂଷଣ କବଳରେ। ସେଥିମଧ୍ୟରୁ ଭୁବନେଶ୍ବର, କଟକ, ଅନୁଗୋଳ, ତାଳଚେର, ବାଲେଶ୍ବର, ରାଉରକେଲା ଓ କଳିଙ୍ଗନଗର ରହିଛି।
ସେହିଭଳି 9ଟି ନଦୀର ଅବବାହିକା ପ୍ରଦୂଷିତ। ସେଥିମଧ୍ୟରୁ ରାଜଧାନୀ ଉପକଣ୍ଠସ୍ଥ ଗଙ୍ଗୁଆ ନାଳ ସର୍ବାଧିକ ପ୍ରଦୂଷିତ ବୋଲି କୁହାଯାଇଛି। ଷ୍ଟାଣ୍ଡିଂ କମିଟି ବୈଠକ ପରେ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ସଦସ୍ୟ ସଚିବ ଦେବୀଦତ୍ତ ବିଶ୍ଵାଳ ଏହି ସୂଚନା ଦେଇଛନ୍ତି।
ବୈଠକ ପରେ ବିଜେପି ବିଧାୟକ ବିଷ୍ଣୁ ସେଠୀ ବି ନିଜର ପ୍ରତିକ୍ରିୟା ଦେଇଛନ୍ତି । ବୈଠକରେ ବିଭାଗୀୟ ଅଧିକାରୀ ସନ୍ତୋଷଜନକ ଉତ୍ତର ଦେଇପାରିଲେ ନାହିଁ । ଧର୍ମକୁ ଆଖି ଠାର ଭଳି ନୂଆ ଯୋଜନା ହେଉଛି ଓ ଗହ୍ଵର ଭିତରେ ହଜିଯାଉଛି । ଭୁବନେଶ୍ବର ଯଦି ଏତେ ପ୍ରଦୂଷିତ ଅନ୍ୟ ଅଞ୍ଚଳ କଥା ବି ସଙ୍ଗୀନ ହୋଇଥିବ ବୋଲି ସେ କହିଛନ୍ତି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
