ଭୁବନେଶ୍ବର: ଆଗକୁ ଆସୁଛି ଗଣ ପର୍ବ ମକର ସଂକ୍ରାନ୍ତି । କୋଭିଡର ନୂଆ ଭାରିଏଣ୍ଟ ଓମିକ୍ରନ ସଂକ୍ରମଣକୁ ଦୃଷ୍ଟିରେ ରଖି ମକର ଓ ପୋଙ୍ଗଲ ପାଇଁ କଟକଣା ଜାରି କରିଛନ୍ତି ରାଜ୍ୟ ସରକାର । ଏନେଇ ଆଜି(ମଙ୍ଗଳବାର) ଗାଇଡଲାଇନ ଜାରି କରିଛନ୍ତି ସ୍ବତନ୍ତ୍ର ରିଲିଫ କମିଶନର ପ୍ରଦୀପ କୁମାର ଜେନା ।
ଏସଆରସି(SRC) ଜାରି କରିଥିବା ଗାଇଡଲାଇନରେ କୁହାଯାଇଛି ଯେ, ରାଜ୍ୟରେ ଦିନକୁ ଦିନ କରୋନା ସଂକ୍ରମଣ ବଢ଼ି ଚାଲିଛି । ଏହାକୁ ଦୃଷ୍ଟିରେ ରଖି ଗହଳିଚହଳି ନକରିବାରୁ ପରାମର୍ଶ ଦିଆଯାଇଛି । ଏହାସହ ନଦୀ ଘାଟ, ପୁଷ୍କରିଣୀ, ସମୁଦ୍ର ତଟରେ ବୁଡ଼ ପକାଇବାକୁ ବାରଣ କରାଯାଇଛି । ମକର ମେଳାରେ ଉତ୍ସବ ପାଳନ କରିବା ଉପରେ ସମ୍ପୂର୍ଣ୍ଣ କଟକଣା ଜାରି ହୋଇଛି ।
ଏହାସହ ମକର ଓ ପୋଙ୍ଗଲରେ ଧର୍ମାନୁଷ୍ଠାନରେ ସର୍ବସାଧାରଣଙ୍କୁ ପୂଜା କରିବାକୁ ମନା କରାଯାଇଛି । ଧର୍ମାନୁଷ୍ଠାନ ଗୁଡ଼ିକରେ କେବଳ ରୀତିନୀତି ଅନୁସାରେ ପୂଜକମାନେ ପୂଜା କରିପାରିବେ । ଘର ଭିତରେ ପରିବାର ସହ ମକର ସଂକ୍ରାନ୍ତି ଓ ପୋଙ୍ଗଲ ପାଳନ କରିବାକୁ ଏସଆରସି(SRC) ପରାମର୍ଶ ଦେଇଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
