ବଦଳୁଛି କି କାଶ୍ମୀର ରାଜନୀତି ? ଓମାରଙ୍କ ଟ୍ବିଟ୍‌କୁ ମୋଦିଙ୍କ ରିଟ୍ବିଟ୍‌ ବଢାଇଲା ଚର୍ଚ୍ଚା

ବିଜେପିର ନିକଟତର ହେଉଛି କି ନ୍ୟାସନାଲ କନଫରେନ୍ସ । କାଲି ଜେଡ-ମୋଡ ଟନେଲ ଉଦଘାଟନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।

ଶ୍ରୀନଗର: ବଦଳୁଛି କାଶ୍ମୀର ରାଜନୀତି । ଧାରା-୩୭୦ ଉଚ୍ଛେଦ ପରେ ପ୍ରଥମ ଥର ବିଧାନସଭା ନିର୍ବାଚନ ଦେଖିଥିବା କାଶ୍ମୀରରେ ଅବଦୁଲ୍ଲା ପରିବାର ନିକଟକୁ କ୍ଷମତା ଫେରିଛି । ପୂର୍ବତନ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ପୁଣି ଥରେ ମୁଖ୍ୟମନ୍ତ୍ରୀ ହୋଇଛନ୍ତି । ନ୍ୟାସନାଲ କନଫରେନ୍ସ ସମର୍ଥନରେ କଂଗ୍ରେସ ରହିଛି । ହେଲେ ଓମାର ଓ ତାଙ୍କ ଦଳ ‘ଭାରତୀୟ ଜନତା ପାର୍ଟି’ର ନିକଟତର ହେଉଥିବା ଚର୍ଚ୍ଚା ଲାଗିରହିଛି । ଏହାରି ମଧ୍ୟରେ କେତେକ ସକରାତ୍ମକ ସଙ୍କେତ ମଧ୍ୟ ଧିରେ ଧିରେ ସାମ୍ନାକୁ ଆସିବାରେ ଲାଗିଛି ।

ସୋନମାର୍ଗକୁ ସଂଯୋଗ କରୁଥିବା ଜେଡ-ମୋଡ୍‌ ଟନେଲ୍କୁ‌ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦଘାଟନ କରିବା ପୂର୍ବରୁ ପ୍ରସ୍ତୁତି ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା । ପ୍ରଧାନମନ୍ତ୍ରୀ ମୋଦିଙ୍କ କାର୍ଯ୍ୟକ୍ରମର ସମୀକ୍ଷା ସମ୍ପର୍କରେ ଏକାଧିକ ଫଟୋ ଟ୍ବିଟ୍‌ ମଧ୍ୟ କରିଛନ୍ତି । ତେବେ ରୋଚକ କଥା ହେଉଛି ପ୍ରଧାନମନ୍ତ୍ରୀ ମୋଦି ମଧ୍ୟ ଓମାରଙ୍କ ଟ୍ବିଟରେ ପ୍ରତିକ୍ରିୟା ରଖିଛନ୍ତି । ମୋଦି ଏହାକୁ ଲମ୍ବା କ୍ୟାପ୍ସନ ସହ ରି-ଟ୍ବିଟ ମଧ୍ୟ କରିଛନ୍ତି ।

• ପ୍ରଧାନମନ୍ତ୍ରୀଙ୍କ କାର୍ଯ୍ୟକ୍ରମର ପ୍ରସ୍ତୁତି ସମୀକ୍ଷା କଲେ ଓମାର:

ଟ୍ବିଟରେ ଓମାର ଫଟୋ ସେୟାର କରି ଲେଖିଛନ୍ତି,‘ପ୍ରଧାନମନ୍ତ୍ରୀ ଜୀଙ୍କ ସୋମବାର ଗସ୍ତର ପ୍ରସ୍ତୁତି ସମୀକ୍ଷା କରିବା ପାଇଁ ଆଜି ସୋନମାର୍ଗ ଗସ୍ତ କରିଛି । ଜେଡ-ମୋଡ୍‌ ଟନେଲର ଉଦଘାଟନ୍‌ ଫଳରେ ବର୍ଷ ସାରା ସୋନମାର୍ଗକୁ ପର୍ଯ୍ୟଟନ ପାଇଁ ରାସ୍ତା ଖୋଲିବ । ଶୀତଦିନେ ସ୍ଥାନୀୟ ଲୋକଙ୍କୁ ବାହାରକୁ ଯିବାକୁ ପଡ଼ିବ ନାହିଁ । ଶ୍ରୀନଗରରୁ କାର୍ଗିଲ ଓ ଲେହକୁ ଯାତ୍ରା ସମୟ ମଧ୍ୟ ହ୍ରାସ ପାଇବ ।’

I am eagerly awaiting my visit to Sonmarg, Jammu and Kashmir for the tunnel inauguration. You rightly point out the benefits for tourism and the local economy.

Also, loved the aerial pictures and videos! https://t.co/JCBT8Ei175

— Narendra Modi (@narendramodi) January 11, 2025

• ରିଟ୍ବିଟ୍‌ କଲେ ପ୍ରଧାନମନ୍ତ୍ରୀ: ‘ଆପଣ ଠିକ କହିଛନ୍ତି’

ପ୍ରଧାନମନ୍ତ୍ରୀ ମୋଦି ଓମାରଙ୍କ ଏହି ଟ୍ବିଟକୁ ରିଟ୍ବିଟ କରିଛନ୍ତି । ଲେଖିଛନ୍ତି,‘‘ଟନେଲ ଉଦଘାଟନ୍‌ ପାଇଁ ମୁଁ ସୋନମାର୍ଗ ଓ ଜମ୍ମୁ କାଶ୍ମୀର ଗସ୍ତକୁ ଉତ୍ସାହର ସହିତ ଅପେକ୍ଷା କରିଛି । ଆପଣ (ଓମାର) ପର୍ଯ୍ୟଟନ ତଥା ସ୍ଥାନୀୟ ଅର୍ଥନୀତି ପାଇଁ ଏହି ଟନେଲର ଉପକାରିତାକୁ ସଠିକ୍ ଭାବରେ ବର୍ଣ୍ଣନା କରିଛନ୍ତି । ଆକାଶମାର୍ଗରୁ ନିଆଯାଇଥିବା ଚିତ୍ର ଏବଂ ଭିଡିଓଗୁଡିକୁ ବେଶ ଭଲ ଲାଗୁଛି ।’’

ଏହା ମଧ୍ୟ ପଢନ୍ତୁ:-

• କାଲି ଉଦଘାଟନ କରିବେ ପ୍ରଧାନମନ୍ତ୍ରୀ:

ଆସନ୍ତାକାଲି (ଜାନୁଆରୀ 13, ସୋମବାର) ପ୍ରଧାନମନ୍ତ୍ରୀ ଜାମ୍ମୁ କାଶ୍ମୀର ଗସ୍ତ କରି ଏହି ଚର୍ଚ୍ଚିତ ଟନେଲର ଉଦଘାଟନ କରିବେ । ଏହି ଅତ୍ୟାଧୁନିକ ଟନେଲ୍ କାଶ୍ମୀରର ପ୍ରସିଦ୍ଧ ପର୍ଯ୍ୟଟନସ୍ଥଳୀ ସୋନମାର୍ଗକୁ ଏକ ସର୍ବକାଳୀନ ଯୋଗାଯୋଗ ସୁବିଧା ପ୍ରଦାନ କରିବ । ପ୍ରବଳ ତୁଷାରପାତ ସତ୍ତ୍ବେ ମଧ୍ୟ ଏହି ଟନେଲରେ ଯାତାୟତ ପ୍ରଭାବିତ ହେବନାହିଁ । ପର୍ଯ୍ୟଟକମାନେ କୌଣସି ଋତୁରେ ସୋନମାର୍ଗ ପହଞ୍ଚି ପାରିବେ । ସମୁଦ୍ର ପତ୍ତନ ଠାରୁ ପ୍ରାୟ 8,650 ଫୁଟ ଉଚ୍ଚରେ ନିର୍ମିତ ଏହି ଟନେଲର ଲମ୍ବ ରହିଛି ଦୀର୍ଘ 6.5 କିଲୋମିଟର । ଆସନ୍ତାକାଲି କାର୍ଯ୍ୟକ୍ରମରେ ସ୍ଥାନୀୟ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ମଧ୍ୟ ପ୍ରଧାନମନ୍ତ୍ରୀଙ୍କ ସହ ଉପସ୍ଥିତ ରହିବେ ।

ବ୍ୟୁରୋ ରିପୋର୍ଟ, ଇଟିଭି ଭାରତ