ଭୁବନେଶ୍ବର: 3 ଦିନିଆ ଦିଲ୍ଲୀ ଗସ୍ତରେ ଯିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଆସନ୍ତାକାଲି(ସୋମବାର) ପୂର୍ବାହ୍ନରେ ଦିଲ୍ଲୀ ଗସ୍ତରେ ଯିବେ ନବୀନ । ଅପରାହ୍ନ 4.30ରେ ପ୍ରଧାନମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ଭେଟିବାର କାର୍ଯ୍ୟକ୍ରମ ରହିଛି ।
ତେବେ ଆସନ୍ତାକାଲି ଅପରାହ୍ନ ୧୨ଟାରେ ଦିଲ୍ଲୀରେ ପହଞ୍ଚିବେ ମୁଖ୍ୟମନ୍ତ୍ରୀ । ଅପରାହ୍ନରେ ପ୍ରଧାନମନ୍ତ୍ରୀଙ୍କ ସହ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ଆଲୋଚନା କରିବାର କାର୍ଯ୍ୟକ୍ରମ ରହିଛି । ତେବେ ଜୁନ 1 ତାରିଖ ସାଢ଼େ 11ଟାରେ ମୁଖ୍ୟମନ୍ତ୍ରୀ ଦିଲ୍ଲୀରୁ ବାହାରି ଦିନ 2ଟାରେ ଭୁବନେଶ୍ୱରରେ ପହଞ୍ଚିବେ ବୋଲି ସୂଚନା ମିଳିଛି ।
ମୁଖ୍ୟମନ୍ତ୍ରୀଙ୍କ ଏହି 3 ଦିନିଆ ଦିଲ୍ଲୀ ଗସ୍ତ ଅନେକ ଗୁରୁତ୍ୱ ବହନ କରୁଛି । ରାଷ୍ଟ୍ରପତି ନିର୍ବାଚନ ପୂର୍ବରୁ ନବୀନ ଦିଲ୍ଲୀ ଯାତ୍ରା ରାଜନୈତିକ ପାଣିପାଗକୁ ସରଗରମ କରୁଛି । ଏହା ସହ ପ୍ରଧାନମନ୍ତ୍ରୀଙ୍କ ସହ ମୁଖ୍ୟମନ୍ତ୍ରୀ ବିଭିନ୍ନ ପ୍ରସଙ୍ଗରେ ଆଲୋଚନା କରିବା ନେଇ କାର୍ଯ୍ୟକ୍ରମ ସ୍ଥିର ହୋଇଛି । ଦେଶର ଦୁଇ ଶୀର୍ଷ ନେତା ଭେଟଘାଟରେ ରାଜନୈତିକ ଆଲୋଚନା ନହେବ ସେ କଥା ଏଡାଇ ଦିଆଯାଇନପାରେ ।
ରାଷ୍ଟ୍ରପତି ନିର୍ବାଚନ ନେଇ ଉଭୟ ନେତାଙ୍କ ମଧ୍ୟରେ ଆଲୋଚନା ହେବାର ସମ୍ଭାବନା ରହିଛି । କାରଣ ରାଷ୍ଟ୍ରପତି ନିର୍ବାଚନରେ ବିଜେପି ନେତୃତ୍ୱାଧୀନ ଏନଡିଏକୁ ବିଜେଡିର ସହଯୋଗ ଆବଶ୍ୟକତା ରହିଛି । ସାମ୍ପ୍ରତିକ ଚିତ୍ର ଅନୁସାରେ ସଂଖ୍ୟାଦୃଷ୍ଟିରୁ ରାଜ୍ୟସଭାରେ ଏନଡିଏକୁ ବିଜେଡି ସାଥ ନିହାତି ଦରକାର । ତେଣୁ ଉଭୟ ନେତା ଏନେଇ ଗୁପ୍ତ ମନ୍ତ୍ରଣା କରିବେ ବୋଲି ଚର୍ଚ୍ଚା ହେଉଛି । ସେହିପରି ରାଜ୍ୟର ସ୍ୱାର୍ଥ ନେଇ ପ୍ରଧାନମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିପାରନ୍ତି ନବୀନ ।
ଇଟିଭି ଭାରତ, ଭୁବନେଶ୍ବର
