ଭୁବନେଶ୍ବର: ସଶକ୍ତ ହେଲା ଲୋକାୟୁକ୍ତ । ଓଡ଼ିଶା ଲୋକାୟୁକ୍ତ ଆଇନ-2014ର ସଂଶୋଧନକୁ(Odisha Lokayukta Amendment Bill ) ଓଡ଼ିଶା ବିଧାନସଭା ଅନୁମୋଦନ କରିଛି । ଯଦି କୌଣସି ସରକାରୀ କର୍ମଚାରୀ ଉଦ୍ଦେଶ୍ୟମୂଳକ ଭାବେ ନିର୍ଦ୍ଦେଶକୁ ଅବମାନନା କରିବେ, ତେବେ ତାଙ୍କ ବିରୁଦ୍ଧରେ କୋର୍ଟ ଅବମାନନା ଆଇନ-1971 ଆଧାରରେ ସୁପ୍ରିମକୋର୍ଟ ଓ ହାଇକୋର୍ଟଙ୍କ ଭଳି ଲୋକାୟୁକ୍ତ କରିପାରିବେ ଦଣ୍ଡବିଧାନ । ଅନ୍ୟପଟେ ଚାନ୍ଦା ଗ୍ରହଣର ଖୋଳତାଡ଼ କରିବାର କ୍ଷମତା ହରାଇଛନ୍ତି ଲୋକୟୁକ୍ତ ।
ପୂର୍ବରୁ ଲୋକାୟୁକ୍ତଙ୍କ ପାଖରେ ଏହି କ୍ଷମତା ଥିବାବେଳେ ବିଧାନସଭାରେ ପାରିତ ସଂଶୋଧିତ ବିଲରେ ଏହି ପ୍ରାବଧାନକୁ ହଟାଇ ଦିଆଯାଇଛି । କେନ୍ଦ୍ରୀୟ ଲୋକପାଳ ଓ ଲୋକାୟୁକ୍ତ ଆଇନ-2013ରେ ଏହି ବ୍ୟବସ୍ଥା ନଥିବା ଦର୍ଶାଇ ରାଜ୍ୟ ସରକାର ଓଡ଼ିଶା ଲୋକାୟୁକ୍ତ ଆଇନର ଧାରା 1ର ପ୍ରାବଧାନକୁ ଉଚ୍ଛେଦ କରିଛନ୍ତି । ଯାହାଫଳରେ ଲୋକଙ୍କଠୁ ଚାନ୍ଦା ଗ୍ରହଣ କରୁଥିବା ସଂସ୍ଥା ଅବା ସଂଗଠନ ସମ୍ପର୍କରେ ତଦନ୍ତ କରିବା ଏଣିକି ଲୋକାୟୁକ୍ତଙ୍କ କ୍ଷମତା ପରିସରଭୁକ୍ତ ରହିବ ନାହିଁ ।
ପାରିତ ଓଡ଼ିଶା ଲୋକାୟୁକ୍ତ ସଂଶୋଧନ ବିଲ-2022ରେ ଥିବା ସଂଶୋଧିତ ପ୍ରାବଧାନ ଅନୁସାରେ, ପୂର୍ବରୁ ବିଭାଗର ଉପଯୁକ୍ତ କର୍ତ୍ତୃପକ୍ଷ କହିଲେ ଦାୟିତ୍ବରେ ଥିବା ସମ୍ପୃକ୍ତ ବିଭାଗୀୟ ମନ୍ତ୍ରୀଙ୍କୁ ବୁଝାଉଥିଲା । କୌଣସି ଅଧିକାରୀଙ୍କ ବିରୁଦ୍ଧରେ ଅଭିଯୋଗ ଆସିଲେ ତାଙ୍କ ବିରୁଦ୍ଧରେ ବିଭାଗୀୟ କାର୍ଯ୍ୟାନୁଷ୍ଠାନ ପାଇଁ ଲୋକାୟୁକ୍ତ ସମ୍ପୃକ୍ତ ବିଭାଗର ଉପଯୁକ୍ତ କର୍ତ୍ତୃପକ୍ଷଙ୍କୁ ସୁପାରିସ କରୁଥିଲେ । ମାତ୍ର ଲୋକାୟୁକ୍ତଙ୍କ ସୁପାରିସ ଉପରେ ତ୍ବରିତ କାର୍ଯ୍ୟାନୁଷ୍ଠାନ ଓ ପ୍ରଶାସନିକ ସୁବିଧା ନିମନ୍ତେ ଉପଯୁକ୍ତ କର୍ତ୍ତୃପକ୍ଷରେ ପରିବର୍ତ୍ତନ କରାଯାଇଛି ।
ବିଭାଗୀୟ ମନ୍ତ୍ରୀଙ୍କ ବଦଳରେ ଏବେ ସମ୍ପୃକ୍ତ ବିଭାଗର ସଚିବ ହିଁ ଉପଯୁକ୍ତ କର୍ତ୍ତୃପକ୍ଷ ହେବେ । ତେବେ ଏହି ବିଲ ଉପରେ ଆଲୋଚନାବେଳେ କଂଗ୍ରେସ ବିଧାୟକ ଦଳର ନେତା ତଥା ଆଇନଜୀବୀ ନରସିଂହ ମିଶ୍ର ଆପତ୍ତି ଉଠାଇଛନ୍ତି । ନରସିଂହ କହିଛନ୍ତି, "ସରକାର ଆଣିଥିବା ବିଲ୍ରେ ମୁଖ୍ୟଶାସନମାନେ ମୁଖ୍ୟମନ୍ତ୍ରୀ ବୋଲି ଉଲ୍ଲେଖ ଅଛି । ତରବରିଆ ଭାବେ ବିଲ୍ ପାରିତ ନକରାଯାଉ ।" କିନ୍ତୁ ଏହା ସତ୍ତ୍ବେ ସରକାର ଏହି ବିଲକୁ ଗୃହରେ ପାରିତ କରାଇ ନେବାରେ ସଫଳ ହୋଇଛନ୍ତି ।
ଇଟିଭି ଭାରତ, ଭୁବନେଶ୍ବର
