ଭୁବନେଶ୍ବର: ସାରା ରାଜ୍ୟରେ ଚାଲିଛି ଦ୍ବିତୀୟ ପର୍ଯ୍ୟାୟ ଟିକାକରଣ । ଟୀକାକରଣକୁ ଆହୁରୀ ବ୍ୟାପକ କରିବା ପାଇଁ ସମସ୍ତ ଜିଲ୍ଲାପାଳ ଏବଂ ପୌରପାଳିକା କର୍ତ୍ତୃପକ୍ଷକୁ ଚିଠି ଲେଖିଛନ୍ତି ଏସିଏସ ପିକେ ମହାପାତ୍ର ।
ଏଣିକି ଘରୋଇ ହସ୍ପିଟାଲରେ ହେବ ଟୀକାକରଣ । ବିଜୁ ସ୍ବାସ୍ଥ୍ୟ କଲ୍ୟାଣ ଯୋଜନା ଓ ସିଜିଏଚଏସ ଅଧୀନରେ ଥିବା ହସ୍ପିଟାଲ ସହିତ ଅନ୍ୟ ଘରୋଇ ହସ୍ପିଟାଲରେ ହେବ ଟୀକାକରଣ । ଏନେଇ ବିଧିବଦ୍ଧ ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ତେଣୁ ଏହି ହସ୍ପିଟାଲରେ କୋଭିଡ ଟୀକାକରଣ ଲାଗି ବ୍ୟବସ୍ଥା କରିବାକୁ ସରକାର ନିଷ୍ପତ୍ତି ନେଇଛନ୍ତି । ଏନେଇ ମଙ୍ଗଳବାର ସମସ୍ତ ଜିଲ୍ଲାପାଳ ଓ 5 ମହନଗର ନିଗମ କମିଶନଙ୍କୁ ଚିଠି ଲେଖିଛନ୍ତି ଏସିଏସ ପ୍ରଦୀପ୍ତ ମହାପାତ୍ର । ତୁରନ୍ତ ଏହି ହସ୍ପିଟାଲରେ ଟୀକାକରଣ ଲାଗି ବ୍ୟବସ୍ଥା କରିବା ଲାଗି ନିର୍ଦ୍ଦେଶ ଦେଇଛନ୍ତି ଏସିଏସ ପ୍ରଦୀପ୍ତ ମହାପାତ୍ର ।
ଏସିଏସ ଚିଠିରେ ଦର୍ଶାଇଛନ୍ତି ଯେ, ସ୍ବାସ୍ଥ୍ୟକର୍ମୀ, ଫ୍ରଣ୍ଟ୍ ଲାଇନ ୱାର୍କରଙ୍କ ଏବଂ ବରିଷ୍ଠ ନାଗରିକଙ୍କ ଟୀକାକରଣ ଆମ ରାଜ୍ୟରେ ସୁରୁଖୁରୁରେ ଚାଲିଛି । ସମସ୍ତ ସରକାରୀ, CGHS ଏବଂ BSKY ଅଧୀନରେ ଥିବା ଘରୋଇ ଡାକ୍ତରଖାନାଗୁଡ଼ିକରେ ଟୀକାକରଣ କେନ୍ଦ୍ର କରାଯାଇଛି ।
ଅଧିକ ଟୀକାକରଣ କେନ୍ଦ୍ର ଖୋଲି କୋଭିଡ ଟିକା ଦେବାକୁ ସରକାର ନିଷ୍ପତ୍ତି ନେଇଛନ୍ତି । ତେଣୁ ବିଭିନ୍ନ ଜିଲ୍ଲାରେ ଥିବା ଘରୋଇ ଡାକ୍ତରଖାନା ଯାହା BSKY ଏବଂ CGHS ଅଧୀନରେ କାର୍ଯ୍ୟକ୍ଷମ ନୁହେଁ ସେଠାରେ ମଧ୍ୟ ଟୀକାକରଣ କେନ୍ଦ୍ର କରିବା ଲାଗି ସରକାର ନିଷ୍ପତ୍ତି ନେଇଛନ୍ତି ।
ତେଣୁ ନିର୍ଦ୍ଦିଷ୍ଟ କିଛି ମାନଦଣ୍ଡ ପୂରଣ କରୁଥିବା ଘରୋଇ ହସ୍ପିଟାଲରେ ଟୀକାକରଣ କେନ୍ଦ୍ର କରାଯିବ ।
1. ପର୍ଯ୍ୟାପ୍ତ ପରିମାଣ ଏସି ରୁମ ଓ ଆନୁଷଙ୍ଗିକ ବ୍ୟବସ୍ଥା ।
2. ୱେଟିଂ ହଲ, ଟୀକାକରଣ ଏବଂ ପର୍ଯ୍ୟବେକ୍ଷଣ ହଲ ଲାଗି ରୁମ ।
3. ପର୍ଯ୍ୟାପ୍ତ ସଂଖ୍ୟକ ତାଲିମପ୍ରାପ୍ତ ଟୀକାକରଣକାରୀ ଏବଂ ଯାଞ୍ଚକାରୀ ।
4. କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟର ନିୟମ ଏବଂ ଗାଇଡଲାଇନ ଅନୁଯାୟୀ ଥିବା ସ୍ବାସ୍ଥ୍ୟ ସୁବିଧା ।
ଏହି ସବୁ ମାନଦଣ୍ଡ ପୂରଣ କରୁଥିବା ଘରୋଇ ହସ୍ପିଟାଲ ଚିହ୍ନଟ କରିବାକୁ ଜିଲ୍ଲାପାଳ ଓ କମିଶନରମାନଙ୍କୁ ନିର୍ଦ୍ଦେଶ ଦିଆଯାଇଛି । ତୁରନ୍ତ ଚିହ୍ନଟ କରି ଜଣାଇବାକୁ ଏସିଏସ ନିର୍ଦ୍ଦେଶ ଦେଇଛନ୍ତି ।
ଭୁବନେଶ୍ବରରୁ ଭବାନୀ ଶଙ୍କର ଦାସ, ଇଟିଭି ଭାରତ
