ଭୁବନେଶ୍ବର: ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ପଞ୍ଚମଥର ମୁଖ୍ୟମନ୍ତ୍ରୀ ହେବାପରେ ସରକାରକୁ ଅଧିକ ଲୋକାଭିମୁଖି ଓ କ୍ରିୟାଶୀଳ କରିବା ପାଇଁ ଗୋଟିଏ ପରେ ଗୋଟିଏ ପଦକ୍ଷେପ ଗ୍ରହଣ କରୁଛନ୍ତି । ‘ମୋ ସରକାର ଯୋଜନା’ କାର୍ଯ୍ୟକାରୀ ପୂର୍ବରୁ ସରକାର ରିହଲସେଲ କରୁଛନ୍ତି । ଗତ କିଛିଦିନ ତଳେ ପାଳି ପଡିଥିଲା ପୋଲିସ ବିଭାଗର, ଆଜି ସ୍ବାସ୍ଥ୍ୟ ବିଭାଗ ।
ଆସନ୍ତା ଅକ୍ଟୋବର 2ରୁ ରାଜ୍ୟରେ କାର୍ଯ୍ୟକାରୀ ହେବ ନୂଆ ଯୋଜନା ‘ମୋ ସରକାର’ ମୋ ସରକାର ମାଧ୍ୟମରେ ରାଜ୍ୟ ସରକାର 5ଟିକୁ ବ୍ୟାପକ ଭାବେ କାର୍ଯ୍ୟକାରୀ କରିବାକୁ ଯୋଜନା କରିଛନ୍ତି । ଏହାଦ୍ବାରା ସରକାର ଓ ଜନତା ମଧ୍ୟରେ ଦୂରତା କମିବ ବୋଲି ସରକାର ଯୋଜନା କରୁଛନ୍ତି । ତେବେ ମୋ ସରକାର କାର୍ଯ୍ୟକାରୀ ପୂର୍ବରୁ ଆଜି ମୁଖ୍ୟମନ୍ତ୍ରୀ ରାଜ୍ୟର ସମସ୍ତ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କ ସହ ଭିଡିଓ କନଫରେନ୍ସି ଯୋଗେ ଆଲୋଚନା କରିଛନ୍ତି । ବିଶେଷ କରି ହସ୍ପିଟାଲକୁ ଆସୁଥିବା ରୋଗୀଙ୍କୁ କିଭଳି ସେବା ଯୋଗାଇବେ, ସେମାନଙ୍କୁ କିଭଳି ବ୍ୟବହାର କରିବେ ଏବଂ ପ୍ରଯୁକ୍ତି ବିଦ୍ୟାକୁ କିଭଳି ଭାବେ ସ୍ବାସ୍ଥ୍ୟ କ୍ଷେତ୍ରରେ ପ୍ରୟୋଗ କରିବେ ସେନେଇ ଆଲୋଚନା କରିଛନ୍ତି ।
ସୂଚନା ଯୋଗ୍ୟ ଯେ ମୋ ସରକାର କାର୍ଯ୍ୟକାରୀ ହେଲେ ପ୍ରତିଦିନ ମୁଖ୍ୟମନ୍ତ୍ରୀ 10ଜଣ ଲେଖାଁଏ ରୋଗୀଙ୍କ ସହ ସିଧାସଳଖ କଥା ହେବେ । ଯଦି କୌଣସି ଅଭିଯୋଗ ହୁଏ ଅଧିକାରୀଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଏହି ବୈଠକରେ ମୁଖ୍ୟ ଶାସନ ସଚିବ, ଉନ୍ନୟନ କମିଶନର, ସ୍ଵାସ୍ଥ୍ୟମନ୍ତ୍ରୀ , ସ୍ଵାସ୍ଥ୍ୟ ସଚିବ ଉପସ୍ଥିତ ଥିଲେ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
