ହାଇଦ୍ରାବାଦ: ଆସୁଛି ପାର୍ବଣ ଋତୁ । ଦେବୀ ପୀଠରେ ଆରମ୍ଭ ହେବାକୁ ଯାଉଛି ମା' ଦୁର୍ଗତିନାଶିନୀଙ୍କ ଷୋଡ଼ଶ ଦିନାତ୍ମକ ପୂଜା । ଏହି ଶାରଦୀୟ ଦୁର୍ଗା ପୂଜା ଉପଲକ୍ଷେ ନିଜ ଘରେ ବନାନ୍ତୁ ସୁଆଦିଆ ଛେନାପୋଡ଼ । ଓଡ଼ିଶାର ଏକ ଲୋକପ୍ରିୟ ମିଠା ହେଉଛି ଛେନାପୋଡ । ସବୁ ମିଠା ଦୋକାନରେ ଏହାର ଚାହିଦା ଢେର୍ ଅଧିକ । ପିଲାଠୁ ବୁଢା, ସମସ୍ତଙ୍କର ଛେନାପୋଡ ଭାରି ପସନ୍ଦ । ଏହାର ନାଁ ଶୁଣିଲେ, ପାଟିରେ ଲାଳ ଆସିଯାଏ । ଆଜି ଆସନ୍ତୁ ଜାଣିବା କେମିତି ନିଜ ଘରେ ପ୍ରସ୍ତୁତ କରିବେ ଏହି ସ୍ବାଦିଷ୍ଟ ଛେନାପୋଡ ।
ଘରେ ଏମିତି ବନାନ୍ତୁ ଛେନାପୋଡ:
ଆବଶ୍ୟକୀୟ ସାମଗ୍ରୀ:
- ଛେନା
- ଚିନି
- ସୁଜି
- ଗୁଜୁରାତି
- କାଜୁ ଓ କିସମିସ୍
- ଅଳ୍ପ ଘିଅ
ପ୍ରସ୍ତୁତି ପ୍ରଣାଳୀ: ନିଜ ଘରେ କ୍ଷୀରରେ ଲେମ୍ବୁ ରସ ମିଶାଇ ଛେନା ଛିଡାଇ ପାରିବେ । ପ୍ରଥମେ ଛେନା ନିଅନ୍ତୁ । ଏଥିରେ ଆବଶ୍ୟକ ଅନୁଯାୟୀ ଚିନି, ସୁଜି, କାଜୁ, ଗୁଜୁରାତି ଗୁଣ୍ଡ ମିଶାଇ ଭଲ ଭାବେ ଚକଟି ଦିଅନ୍ତୁ । ଆପଣ ଚାହିଁଲେ କାଜୁ, କିସମିସ୍ ହାଲୁକା ଭାଜି ପକାଇ ପାରିବେ । ଏହାପରେ ଏକ ରସ ପାତ୍ରରେ ଅଳ୍ପ କିଛି ଘିଅ ଲଗାଇ ଘଷି ଦିଅନ୍ତୁ । ଏବେ ଛେନାକୁ ପତ୍ରରେ ଘୋଡାଇ ସେହି ପାତ୍ରରେ ରଖି ନିଆଁ ଆଞ୍ଚରେ ବସାନ୍ତୁ । ପାତ୍ର ଉପରେ କିଛି କୋଇଲା ରଖନ୍ତୁ । ଏହାକୁ 40ରୁ 50 ମିନିଟ୍ ଏମିତି ନିଆଁରେ ରଖନ୍ତୁ । ଏହାପରେ ପ୍ରସ୍ତୁତ ହୋଇଯାଏ ସୁଆଦିଆ ଛେନାପୋଡ । ଥଣ୍ଡା ହୋଇଯିବା ପରେ ଛେନାପୋଡକୁ କାଟି ନିଜେ ଖାଆନ୍ତୁ ଓ ପରିବାରର ଅନ୍ୟମାନଙ୍କୁ ପରଷନ୍ତୁ ।
ଓଡ଼ିଶା ବଜାରରେ କିଲୋ ପିଛା ପ୍ରାୟ 100ରୁ 250 ଟଙ୍କା ଯାଏଁ ଛେନାପୋଡ ବିକ୍ରି ହୋଇଥାଏ ।
ଛେନାପୋଡ ଫାଇଦା:
- ଛେନାପୋଡ କେବଳ ସ୍ବାଦରେ ନୁହେଁ, ସ୍ବାସ୍ଥ୍ୟ ପାଇଁ ବି ଭଲ । ଛେନାପୋଡ ପ୍ରୋଟିନ ଓ କ୍ୟାଲସିୟମର ଏକ ଭଲ ଉତ୍ସ । କ୍ୟାଲେସିୟମ ଶରୀରର ହାଡ ଓ ଦାନ୍ତ ମଜଭୁତ କରେ ।
- ଏଥିରେ ଭିଟାମିନ-ଡି ରହିଛି ।
- ଛେନାରେ ଫସ୍ଫରସ୍ ଥାଏ ଯାହା ହଜମ ପ୍ରକ୍ରିୟା ଉନ୍ନତ କରେ ।
- ଛେନାପୋଡ A2 ମିଲ୍କରୁ ପ୍ରସ୍ତୁତ ହେଉଥିବାରୁ ସହଜରେ ହଜମ ହୋଇଯାଏ ।
- ଏହି ମିଠା ବେକ୍ (ସେକିବା) କରାଯାଏ, ତେଲରେ ଛଣା ହୁଏ ନାହିଁ । ତେଣୁ ଏଥିରେ ଅଧିକ ତେଲ ନଥାଏ ।
- ଏହାର ଛୋଟ ଖଣ୍ଡଟିଏ ଖାଇଲେ ଦୀର୍ଘ ସମୟ ଯାଏଁ ଭୋକ ଲାଗେନି ।
- ଅନ୍ୟ ମିଠା ତୁଳନାରେ ଚେନାପୋଡରେ କ୍ୟାଲୋରୀ କମ୍ ।
