ଭୁବନେଶ୍ବର: ରାଜ୍ୟରେ ଥିବା ଶିକ୍ଷିତ ଦିବ୍ୟାଙ୍ଗ ଯୁବକ ଯୁବତୀମାନଙ୍କ ମଧ୍ୟରୁ ମାତ୍ର ୪ ପ୍ରତିଶତଙ୍କୁ ବିଭିନ୍ନ ସରକାରୀ ଓ ବେସରକାରୀ ଅନୁଷ୍ଠାନରେ ନିଯୁକ୍ତିର ସୁଯୋଗ ମିଳିଛି । ହେଲେ ବାକି 96 ପ୍ରତିଶତ ଯୁବକ ଓ ଯୁବତୀ ଏହି ନିଯୁକ୍ତି ସୁଯୋଗରୁ ବାଦ ପଡିଛନ୍ତି । ଏଭଳି ସ୍ଥିତିରେ ରାଜ୍ୟର ସମସ୍ତ ଦିବ୍ୟାଙ୍ଗ ଯୁବକଯୁବତୀଙ୍କୁ ନିଯୁକ୍ତି କ୍ଷେତ୍ରରେ ସହଯୋଗ କରିବା ପାଇଁ 'ସାଇଟ ସେଭର୍ସ' ନାମକ ଏକ ଅନୁଷ୍ଠାନ ପକ୍ଷରୁ 'ଇନକ୍ଲ୍ୟୁଡ ଅଲ' କ୍ୟାମ୍ପେନର ଶୁଭାରମ୍ଭ କରାଯାଇଛି । ଏହି କ୍ୟାମ୍ପେନକୁ ରାଜ୍ୟ ଭିନ୍ନକ୍ଷମ କମିଶନର ସୁଲୋଚନା ଦାସ ଉଦଘାଟନ କରିଥିଲେ ।
ଉଭୟ ରାଜ୍ୟ ଓ କେନ୍ଦ୍ର ସରକାର ଦିବ୍ୟାଙ୍ଗଙ୍କ ପାଇଁ ବିଭିନ୍ନ ପ୍ରକାର ଯୋଜନା କାର୍ଯ୍ୟକାରୀ କରିଥିବା ସୁଲୋଚନା କହିଛନ୍ତି । ତଥାପି ସେମାନଙ୍କ ସ୍ଥିତିରେ ଯେଉଁଭଳି ପରିବର୍ତ୍ତନ ଆସିବା କଥା ତାହା ଆସିପାରିନାହିଁ । ତେଣୁ ଏ ଦିଗରେ ସମାଜର ସମସ୍ତ ବର୍ଗର ଲୋକମାନେ ସହଯୋଗ କରିବା ସହ ଦିବ୍ୟାଙ୍ଗମାନେ ସମାଜରେ କିଭଳି ସମ୍ମାନର ସହ ବଞ୍ଚିପାରିବେ ସେ ଦିଗରେ କାର୍ଯ୍ୟ କରିବାକୁ ସମସ୍ତଙ୍କୁ ଆହ୍ବାନ କରିଛନ୍ତି । ଏତତ୍ ବ୍ୟତୀତ ଦିବ୍ୟାଙ୍ଗମାନେ ମଧ୍ୟ ସର୍ବଦା ଅନ୍ୟ ଉପରେ ନିର୍ଭରଶୀଳ ନହୋଇ ଆତ୍ମନିର୍ଭରଶୀଳ ହେବା ଉଚିତ । ଖାଲି ସେତିକି ନୁହେଁ ନିଜେ ଆତ୍ମନିର୍ଭରଶୀଳ ହେବା ସହ ଅନ୍ୟମାନଙ୍କୁ ମଧ୍ୟ ସହଯୋଗ କରିବା ଦିଗରେ କାର୍ଯ୍ୟ କରିବାକୁ କହିଛନ୍ତି ।
ସେହପରି 'ସାଇଟ ସେଭର୍ସ'ର ଓଡିଶା କାର୍ଯ୍ୟକାରୀ ପ୍ରବନ୍ଧକ ଆକବର ମେହେଫୁଜ ଆଲାମ ଉନ୍ମୋଚିତ କ୍ୟାମ୍ପେନର ଉଦ୍ଦେଶ୍ୟ ବିଷୟରେ ଆଲୋକପାତ କରିଥିଲେ । ଟ୍ବିନ ସିଟିରେ ଥିବା କର୍ପୋରେଟ୍ ଅଧିକାରୀଙ୍କ ସହ ଆଲୋଚନା କରି ଯୁବକ ଓ ଯୁବତୀମାନଙ୍କୁ ରୋଜଗାର ପ୍ରଦାନ ଲାଗି ପ୍ରଚେଷ୍ଟା ଏହି କ୍ୟାମ୍ପେନର ମୂଳ ଲକ୍ଷ୍ୟ । ଆୟୋଜିତ ଏହି କାର୍ଯ୍ୟକ୍ରମରେ ଭିନ୍ନକ୍ଷମ ସଶକ୍ତିକରଣ ବିଭାଗର ନିର୍ଦ୍ଦେଶିକା ବ୍ରତତି ହରିଚନ୍ଦନ, ଇଷ୍ଟର୍ଣ୍ଣ ମିଡ଼ିଆର କାର୍ଯ୍ୟକାରୀ ନିର୍ଦ୍ଦେଶକ ତନୟା ପଟ୍ଟନାୟକ, ଶିକ୍ଷକ ଓ ଶିକ୍ଷା ବିଭାଗର ନିର୍ଦ୍ଦେଶକ ଗଙ୍ଗାଧର ସାହୁ ଏବଂ ସାଇଟ ସେଭର୍ସ ଅନୁଷ୍ଠାନର ପ୍ରୋଜେକ୍ଟ ଅଫିସର ପ୍ରମୁଖ ଉପସ୍ଥିତ ଥିଲେ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
