ଭୁବନେଶ୍ବର: ରାଜ୍ୟରେ କୋରୋନା ସଂକ୍ରମଣ ଦ୍ରୁତ ଗତିରେ ବୃଦ୍ଧି ପାଇବା ପରେ ଏହାକୁ ନିୟନ୍ତ୍ରଣ କରିବା ପାଇଁ ସରକାର ନାଇଟ କର୍ଫ୍ୟୁ ଲାଗୁ କରିଛନ୍ତି । ଏହି କର୍ଫ୍ୟୁ ଆଜି (ଶୁକ୍ରବାର)ଠୁ ଲାଗୁ ହେବାକୁ ଥିବା ବେଳେ ଅମାନିଆଙ୍କ ବିରୋଧରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜଣାପଡ଼ିଛି ।
ଟ୍ବିନସିଟିରେ ୨୫ ପ୍ଲାଟୁନ ପୋଲିସ ଫୋର୍ସ ସହ ୧୦୦ରୁ ଊର୍ଦ୍ଧ୍ବ ଅଫିସର ଓ ୫୪ଟି ସ୍ଥାନରେ ଚେକିଂ କରାଯିବ। ଏଥିସହ କେବଳ ନାଇଟ କର୍ଫ୍ୟୁ ନୁହେଁ ଦିନରେ ଗହଳି ସ୍ଥାନ, ବଜାର ଓ ମଲ ମାନଙ୍କରେ ମଧ୍ୟ ପୋଲିସର ନଜର ରହିବ। ମାସ୍କ ସୋସିଆଲ ଡିଷ୍ଟାନ୍ସିଂ ଜୋରଦାର ଚେକିଂ କରାଯିବ। ଏନେଇ ଦିନରେ କୌଣସି ବ୍ୟବସାୟିକ ପ୍ରତିଷ୍ଠାନ ନିୟମର ଉଲ୍ଲଙ୍ଘନ କଲେ ୭ଦିନ ବନ୍ଦ ପାଇଁ ନିୟମ ରହିଛି ।
ସବୁ ସହରାଞ୍ଚଳରେ ରାତି ୯ଟା ଠାରୁ ଦୋକାନ ବଜାର ବନ୍ଦ ରହିବ । ବର୍ତ୍ତମାନର କୋରୋନାର ସଂକ୍ରମଣକୁ ଦୃଷ୍ଟିରେ ରଖି ସରକାର ଏହି ଗାଇଡଲାଇନ ଜାରି କରିଛନ୍ତି । ଏହାକୁ ନେଇ BMC ପ୍ରସ୍ତୁତ ଥିବା ବେଳେ ସ୍ବତନ୍ତ୍ର ଦଳ ୨୪ ଘଣ୍ଟା ସଜାଗ ରହିଛନ୍ତି । ତେଣୁ ସହରବାସୀ ସରକାର ଓ SRCଙ୍କ ଗାଇଡଲାଇନଙ୍କୁ ମାନନ୍ତୁ । ଏହି ଗାଇଡ଼ଲାଇନ ନ ମାନିଲେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି କହିଛନ୍ତି ଅତିରିକ୍ତ କମିଶନର ଲକ୍ଷ୍ମୀକାନ୍ତ ସେଠୀ ।
ଏହା ବି ପଢନ୍ତୁ: Omicron Scare: ବିଦେଶ ଫେରନ୍ତାଙ୍କୁ ୭ଦିନ ହୋମ କ୍ବାରେଣ୍ଟାଇନ ବାଧ୍ୟତାମୂଳକ
ଏଥିପାଇଁ ସେଣ୍ଟ୍ରାଲ ସ୍କ୍ବାଡ଼ ସହ ବିଏମସିର ଜୋନାଲ ଅଧିକାରୀ ମାନେ ପ୍ରସ୍ତୁତ ହୋଇ ରହିଛନ୍ତି । ଏହାସହ ରେଲୱେ ଷ୍ଟେସନ ଛକ ବଜାରର ଗହଳି ଉପରେ ମଧ୍ୟ ନଜର ରଖିବ ବିଏମସି । ତେବେ ଶୁକ୍ରବାରଠାରୁ ଆରମ୍ଭ ହେବାକୁ ଥିବା ନାଇଟ କର୍ଫ୍ୟୁ ରାତି ୯ଟାରୁ ସକାଳ ୫ ଟା ପର୍ଯ୍ୟନ୍ତ ରହିବ । ଯାହା ୩୧ ଡିସେମ୍ବର ପର୍ଯ୍ୟନ୍ତ ବଳବତ୍ତର ରହିବ ବୋଲି ସେ ସୂଚନା ଦେଇଛନ୍ତି ।
ଭୁବନେଶ୍ବରରୁ ଦେବସ୍ମିତା ରାଉତ ଓ ତାପସ ପରିଡା, ଇଟିଭି ଭାରତ
