ଭୁବନେଶ୍ବର: ପିପିଲି ଉପ-ନିର୍ବାଚନରେ ବିଜୟ ହାସଲ କରିଛନ୍ତି ବିଜେଡି ପ୍ରାର୍ଥୀ ରୁଦ୍ର ମହାରଥୀ । ପ୍ରାୟ 21 ହଜାର ଭୋଟ ବ୍ୟବଧାନରେ ବିଜେପି ପ୍ରାର୍ଥୀଙ୍କୁ ହରାଇଛନ୍ତି ରୁଦ୍ର । ବିଜୟ ପରେ ଦଳ ଭୋଟ ବ୍ୟବଧାନ ନେଇ ସମୀକ୍ଷା କରୁଛି ବିଜେଡି । ତେବେ ପ୍ରଚାରରେ ଦଳର ସଭାପତି ନବୀନ ପଟ୍ଟନାୟକ ଯାଇଥିଲେ, ବ୍ୟବଧାନ ଆହୁରି ବଢ଼ିଥାନ୍ତା ବୋଲି ଯୁକ୍ତି ବାଢ଼ିଛନ୍ତି ବରିଷ୍ଠ ବିଜେଡି ବିଧାୟକ।
ବିଜେଡିର ବରିଷ୍ଠ ନେତା ଦେବୀ ମିଶ୍ର କହିଛନ୍ତି ଯେ, ବିଜୟ ଲାଗି ଦଳ ପ୍ଲାନ କରିଥିଲା । ଯୋଜନା ମୁତାବକ ଦଳ ପ୍ରଚାର କରିଥିଲା । ବିଜୟ ଲାଗି ଦଳ ପିପିଲିବାସୀଙ୍କୁ ଧନ୍ୟବାଦ ଜଣାଇଛି । ‘ପିପିଲି’ରେ ଲୋକାଭିମୁଖୀ କାମ ପ୍ରତି ଜନସାଧାରଣଙ୍କ ସମର୍ଥନକୁ ଦର୍ଶାଉଛି ବୋଲି ସେ କହିଛନ୍ତି । ନବୀନ ପଟ୍ଟନାୟକଙ୍କ ନେତୃତ୍ବ ପ୍ରତି ଜନସାଧାରଣଙ୍କ ଆର୍ଶୀବାଦ ବୋଲି କହିଛନ୍ତି । ଯଦି ପ୍ରଚାରକୁ ବିଜେଡି ସଭାପତି ଯାଇଥାନ୍ତେ, ତେବେ ବ୍ୟବଧାନ ଆହୁରି ବଡ଼ ହୋଇଥାନ୍ତା ବୋଲି ଦେବୀ କହିଛନ୍ତି ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନକଲ୍ୟାଣକାରୀ ଯୋଜନା ଆଜି ସାରା ଓଡିଶାର ଲୋକପ୍ରିୟ ହୋଇଛି । ପ୍ରତ୍ୟେକ ଲୋକଙ୍କ ପାଖରେ ନବୀନଙ୍କ ଯୋଜନା ପହଞ୍ଚୁଛି, ସେ ଆମ ଗାଁ ଆମ ବିକାଶ ଠାରୁ ଆରମ୍ଭ ହୋଇ ସ୍ମାର୍ଟ ହେଲଥ କାର୍ଡ ପର୍ଯ୍ୟନ୍ତ ବୋଲି ଦେବୀ ମିଶ୍ର କହିଛନ୍ତି । ନବୀନ ବାବୁଙ୍କ ବିକାଶ ମୂଳକ କାମ ହିଁ ଲୋକଙ୍କୁ ବିଜେଡି ପ୍ରତି ଆକର୍ଷିତ କରୁଛି, ଯାହା ପିପିଲିରେ ପ୍ରତିଫଳନ ହୋଇଛି । ନବୀନ ବାବୁ ପିପିଲିରେ ନିଜେ ଯାଇ ପ୍ରଚାର କରିଥିଲେ ବିଜୟ ବ୍ୟବଧାନ ଆହୁରି ବୃଦ୍ଧି ପାଇଥାନ୍ତା ବୋଲି ଦେବୀ କହିଛନ୍ତି ।
ସୂଚନାଥାଉକି ଗତକାଲି ପିପିଲି ଉପନିର୍ବାଚନ ମତଗଣନା ହୋଇଛି । ଏହି ଉପନିର୍ବାଚନରେ ବିଜେଡି ପ୍ରାୟ ୯୦ ହଜାରରୁ ଊର୍ଦ୍ଧ୍ବ ଭୋଟ ପାଇଛି । ବିଜେଡି ନିଜର ନିକଟତମ ପ୍ରତିଦ୍ବନ୍ଦୀଙ୍କ ଠାରୁ ୨୦ ହଜାରରୁ ଊର୍ଦ୍ଧ୍ବ ଭୋଟ ବ୍ୟବଧାନରେ ବିଜୟ ହାସଲ କରିଛନ୍ତି । ଦିବଂଗତ ପିପିଲି ବିଧାୟକ ପ୍ରଦୀପ ମହାରଥୀଙ୍କ ପରଲୋକ ପରେ ଅନୁଷ୍ଠିତ ହୋଇଥିଲା ଉପନିର୍ବାଚନ।
ଭୁବନେଶ୍ବରରୁ ଭବାନୀଶଙ୍କର ଦାସ, ଇଟିଭି ଭାରତ
