ଭୁବନେଶ୍ବର: ମହାନ ଓଲିଉଡ ଅଭିନେତା ବିଜୟ ମହାନ୍ତିଙ୍କୁ ଦିଆଗଲା ରାଷ୍ଟ୍ରୀୟ ସମ୍ମାନ । ଉତ୍କଳ ସଂଗୀତ ମହାବିଦ୍ୟାଳୟରେ ଦିଆଗଲା ସମ୍ମାନ । ପତ୍ନୀ ତନ୍ଦ୍ରା ରାୟଙ୍କ ସମେତ, ଅଭିନେତା ସିଦ୍ଧାନ୍ତ ମହାପାତ୍ର, ରାଇ ମୋହନ ପରିଡ଼ା, ଅଭିନେତ୍ରୀ ଅନୁ ଚୌଧୁରୀ ଓ ଅନ୍ୟାନ୍ୟ ଅଭିନେତା ଓ ବିଶିଷ୍ଟ ବ୍ୟକ୍ତି ଉପସ୍ଥିତ ରହିଥିଲେ ।
ଉତ୍କଳ ସଂଗୀତ ମହାବିଦ୍ୟାଳୟରେ ବିଜୟଙ୍କ ମର ଶରୀର ପହଁଞ୍ଚିବା ପରେ ତାଙ୍କୁ ଶେଷ ଦର୍ଶନ କରିବା ସହ ଶ୍ରଦ୍ଧା ସୁମନ ଅର୍ପଣ କରାଯାଇ ରାଷ୍ଟ୍ରୀୟ ମର୍ଯ୍ୟାଦା ଦିଆଯାଇଥିଲା । ବିଜୟଙ୍କ ବିୟୋଗରେ ସମସ୍ତ କଳାକାର ଭାବ ବିହ୍ବଳ ହୋଇଥିଲେ । ଅଭିନେତା ସିଦ୍ଧାନ୍ତ କହିଛନ୍ତି, ବିଜୟ ମହାନ୍ତି ଜଣେ ଅନୁଷ୍ଠାନ ଥିଲେ ସେ ଚାଲିଯିବା ପରେ ସେ ଶୂନ୍ୟସ୍ଥାନ ଆଉ କେବେ ପୂରଣ ହୋଇ ପାରିବ ନାହିଁ ।
ରାଇମୋହନ ମଧ୍ୟ କହିଛନ୍ତି ଆମ ମୁଣ୍ଡ ଉପରୁ ଛାତ ଚାଲିଛି । ସେ ଆମ ପିତୃତୁଲ୍ୟ ଥିଲେ । ଅଭିନେତ୍ରୀ ଅନୁ ଚୌଧୁରୀ ମଧ୍ୟ ବିଜୟ ମହାନ୍ତିଙ୍କୁ ମନେ ପକାଇ ଭାବ ବିହ୍ବଳ ହୋଇ ଲୁହ ଅଟକାଇ ପାରି ନଥିଲେ ।
ତେବେ ଉତ୍କଳ ସଂଗୀତ ମହାବିଦ୍ୟାଳୟରୁ ବିଜୟଙ୍କ ମରଶରୀରକୁ ଭୁବନେଶ୍ବର ସ୍ଥିତ ସତ୍ୟନଗର ଶ୍ମଶାନକୁ ନିଆଯାଇଛି । ସେଠାରେ ତାଙ୍କର ଅନ୍ତିମ ସଂସ୍କାର କରାଯିବ ।
ଭୁବନେଶ୍ବରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
