ଭୁବନେଶ୍ବର: ପୁଣି ଜୋର ଧରିଲା ପିସିସି ସଭାପତି ପରିବର୍ତ୍ତନ ପ୍ରସଙ୍ଗ । ଦିଲ୍ଲୀରେ ବରିଷ୍ଠ କଂଗ୍ରେସ ନେତାଙ୍କୁ କଟକ-ବାରବାଟୀ ବିଧାୟକ ମହମ୍ମଦ ମୋକିମ୍ ଭେଟିବା ପରେ ପିସିସିର ପରବର୍ତ୍ତୀ ସଭାପତି ହେବା ନେଇ ଆରମ୍ଭ ହୋଇଛି ଚର୍ଚ୍ଚା । ଶୁକ୍ରବାର ମୋକିମ୍ ଦିଲ୍ଲୀରୁ ଫେରିବା ପରେ ଗଣମାଧ୍ୟମରେ ନିଜ ପ୍ରତିକ୍ରିୟା ଦେଇଛନ୍ତି ।
ସେ କହିଛନ୍ତି ଯେ, ଦିଲ୍ଲୀରେ ବରିଷ୍ଠ ନେତାଙ୍କ ସହ ସଂଗଠନ ସୁଦୃଢ ନେଇ ଆଲୋଚନା ହୋଇଛି । ଏଆଇସିସି ସଙ୍ଗଠନ ସମ୍ପାଦକଙ୍କୁ ଭେଟିଥିଲି । କଟକରେ ମୁଁ କେମିତି ନିର୍ବାଚନ ଜିତିଲି ସେ ନେଇ ମତ ରଖିଥିଲି । ସେହିପରି ଦିଲ୍ଲୀ ନିର୍ବାଚନ ପରେ ସଙ୍ଗଠନକୁ ନେଇ ଏଆଇସିସି ଚିନ୍ତାରେ ଅଛି । ଏନେଇ ବିଚାର ବିମର୍ଷ ଜାରି ରହିଛି । ଓଡିଶାରେ ସଙ୍ଗଠନ କିପରି ସୁଦୃଢ ହେବ ସେ ନେଇ ମଧ୍ୟ ମତାମତ ନିଆଯାଇଛି ।
ସୂଚନାଯୋଗ୍ୟ, ସାଧାରଣ ନିର୍ବାଚନ ପରଠାରୁ ରାଜ୍ୟରେ ପିସିସି ସଭାପତି ପଦରୁ ନିରଞ୍ଜନ ପଟ୍ଟନାୟକଙ୍କୁ ହଟାଇବାକୁ ଚାରିଆଡୁ ଦାବି ଜୋର୍ ଧରିଛି । ବିଭିନ୍ନ ସମୟରେ ରାଜ୍ୟ କଂଗ୍ରେସର ମାଳମାଳ ନେତା ଦିଲ୍ଲୀ ଯାଇ ନିରଞ୍ଜନଙ୍କୁ ହଟାଇବା ଲାଗି ଏଆଇସିସିର ବରିଷ୍ଠ ନେତାମାନଙ୍କ ପାଖରେ ଦାବି କରି ଆସୁଛନ୍ତି । ଏହାସହ ସୋନିଆଙ୍କୁ ମଧ୍ୟ ଏଥିପାଇଁ ବାରମ୍ବାର ଭେଟିବାରେ ଲାଗିଛନ୍ତି ଓଡିଶା ନେତା ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
