ଭୁବନେଶ୍ୱର: ରାଜଧାନୀ ରେଳ ଷ୍ଟେସନରେ ହେଲା ମକ୍ ଡ୍ରିଲ । ମକ୍ଡ୍ରିଲରେ ୩ ଆତଙ୍କବାଦୀଙ୍କୁ କରାଯାଇଥିଲା ଟାର୍ଗେଟ । RPF, SOG, ଓଡ଼ିଶା ପୋଲିସ, ବୋମା ନିଷ୍କ୍ରିୟ ଦଳ, ଓଡ଼ିଶା ଅଗ୍ନିଶମ ବାହିନୀ ଓ ଡଗ ସ୍କ୍ୱାଡ୍ର ମିଳିତ ଉଦ୍ୟମରେ ଏହି ମକ୍ ଡ୍ରିଲ୍ କରାଯାଇଥିଲା । ଗୁରୁବାର ମଧ୍ୟାହ୍ଣ ୧ଟାରୁ ଅପରାହ୍ଣ ୩ଟା ୩୦ ପର୍ଯ୍ୟନ୍ତ ଭୁବନେଶ୍ୱର ରେଳଷ୍ଟେସନରେ ଆତଙ୍କବାଦୀ ମଲ୍ଟିଜେନ୍ସି ମକ୍ ଡ୍ରିଲ୍( terrorist multiagency mock drill) ଆୟୋଜିତ ହୋଇଥିଲା।
ଏହି ସମୟରେ ରେଳ ଷ୍ଟେସନରେ ଟ୍ରାଫିକ କର୍ମଚାରୀ, ରେଳ କର୍ମଚାରୀ, ଅଗ୍ନିଶମ ବିଭାଗର କର୍ମଚାରୀ, ସ୍ପେଶାଲ ଡଗ୍ ସ୍କ୍ବାଡ୍, କ୍ୟାପିଟାଲ ହସ୍ପିଟାଲର ଡାକ୍ତର, ଆମ୍ବୁଲାନ୍ସ ଆଦି ଉପସ୍ଥିତ ରହିଥିଲେ । ଏହି ମକ୍ ଡ୍ରିଲ୍ ପାଇଁ ଏକ ଘଟଣାକ୍ରମ ସଜା ଯାଇଥିଲା । ଏହି ଘଟଣାକ୍ରମ ମୁତାବକ ଭୁବନେଶ୍ବର ରେଳ ଷ୍ଟେସନରେ ମକ୍ଡ୍ରିଲ୍ ଦେଖିବାକୁ ମିଳିଥିଲା ।
ଘଟଣା କିଛି ଏଭଳି ଥିଲା, 3 ଜଣ ସନ୍ଦିଗ୍ଧ ବ୍ୟକ୍ତି ଭୁବନେଶ୍ୱର ରେଳ ଷ୍ଟେସନର ପ୍ଲାଟଫର୍ମ ୬ ଦେଇ ପ୍ରବେଶ କରିବାକୁ ଚେଷ୍ଟା କରନ୍ତି । ଆରପିଏଫ୍ କର୍ମଚାରୀ ସନ୍ଦିଗ୍ଧଙ୍କୁ ଯାଞ୍ଚ କରିବାକୁ ଚାହାଁନ୍ତି । ହେଲେ ସଙ୍ଗେସଙ୍ଗେ ସେମାନେ ଗୁଳି ଚଳାଇ ରେଳ ଷ୍ଟେସନରେ ପ୍ରବେଶ କରିଥାନ୍ତି । ୧ଟା ୧୫ମିନିଟରେ RPF ଜାଣିବାକୁ ପାଇଥିଲେ କିଛି ଆତଙ୍କବାଦୀ ପ୍ଲାଟଫର୍ମ ମଧ୍ୟରେ ରହିଛନ୍ତି । ସେମାନେ ଆତଙ୍କବାଦୀ ଗୋଷ୍ଠୀକୁ ପ୍ଲାଟଫର୍ମ ୧ ଆଡକୁ ଯିବାକୁ ଦେଇ ନଥିଲେ । ଯେଉଁଠାରେ ରାଜଧାନୀ ଏକ୍ସପ୍ରେସ ଛିଡ଼ା ହୋଇଥିଲା |
କିନ୍ତୁ ଆତଙ୍କବାଦୀ କୋଣାର୍କ ଏକ୍ସପ୍ରେସକୁ ହାଇଯାକ କରି କିଛି ସାଧାରଣ ନାଗରିକଙ୍କୁ ବନ୍ଧକ ରଖିବାରେ ସଫଳ ହୋଇଯାଆନ୍ତି । ଶୀଘ୍ର ୧ଟା ୨୦ ମିନିଟରେ ଯଥାଶୀଘ୍ର ଯାତ୍ରୀଙ୍କୁ ଷ୍ଟେସନରୁ ବାହାର କରିବା ପାଇଁ ଯୋଜନା ପ୍ରସ୍ତୁତ ହୁଏ । ଏହାପରେ ୨ଟା ୧୫ ମିନିଟରେ ଅପରେସନ୍ ଏବଂ ବନ୍ଧକଙ୍କୁ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । ୨ଟା ୫୦ ମିନିଟରେ ପ୍ଲାଟଫର୍ମ ଏବଂ ଟ୍ରେନର ସମ୍ବେଦନଶୀଳତା ଯାଞ୍ଚ ହୁଏ । ୩ଟା ବେଳେ ପରିସ୍ଥିତିକୁ ନିୟନ୍ତ୍ରଣ କରିବା ସହ ଯାତ୍ରୀଙ୍କୁ ସୁରକ୍ଷିତ ଭାବରେ ଯାତ୍ରା ପାଇଁ ଅନୁମତି ଦିଆଯାଇଥିଲା । ଏହିଭଳି ଭାବରେ ଭୁବନେଶ୍ବର ରେଳ ଷ୍ଟେସନରେ ମକ୍ଡ୍ରିଲ୍ ଶେଷ ହୋଇଥିଲା ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ