ଭୁବନେଶ୍ବର: ଦେଶରେ ସର୍ବାଧିକ ମୋବାଇଲ ସେବା ପହଞ୍ଚିନଥିବା ଗାଁ ହେଉଛି ଓଡିଶା। ଦେଶରେ 25 ହଜାର 67ଟି ଗାଁରେ ମୋବାଇଲ ଓ ଇଣ୍ଟରନେଟ ସଂଯୋଗ ନାହିଁ। ସେଥିମଧ୍ୟରୁ ଓଡିଶା ସବୁଠାରୁ ଆଗରେ ରହିଛି । ଗୋଟିଏ ପଟେ ଦେଶ ଡିଜିଟାଲ ମୁହାଁ ହେଉଥିବାବେଳେ ଏବେ ଏହି ରିପୋର୍ଟ ସାମ୍ନାକୁ ଆସିଛି ।
ମୋବାଇଲ ଓ ଇଣ୍ଟରନେଟ ସେବାକୁ ନେଇ କେନ୍ଦ୍ର ସରକାର ଏକ ତଥ୍ୟ ପ୍ରକାଶ କରିଛନ୍ତି । ଯେଉଁଥିରେ କି ଦେଶରେ ଏପର୍ଯ୍ୟନ୍ତ 25 ହଜାର 67 ଟି ଗାଁରେ ମୋବାଇଲ ଓ ଇଣ୍ଟରନେଟ ସେବା ପହଞ୍ଚି ପାରିନଥିବା ପ୍ରକାଶ ପାଇଛି । ସେଥୁମଧ୍ୟରୁ ଓଡ଼ିଶା ସବୁଠାରୁ ଆଗରେ ରହିଥିବା ବେଳେ ଏପର୍ଯ୍ୟନ୍ତ 6 ହଜାର 99 ଗାଁରେ ମୋବାଇଲ ଓ ଇଣ୍ଟରନେଟ ସେବାରୁ ବଞ୍ଚିତ ।
ସେହିପରି ଦ୍ବିତୀୟ ସ୍ଥାନରେ ରହିଛି ମଧ୍ୟପ୍ରଦେଶ । ଏଠାରେ 2 ହଜାର 612 ଗାଁକୁ ଏପର୍ଯ୍ୟନ୍ତ ପହଞ୍ଚି ପାରିନି ଇଣ୍ଟରନେଟ ଓ ମୋବାଇଲ । ତୃତୀୟରେ ମହାରାଷ୍ଟ୍ରର 2 ହଜାର 328, ଅରୁଣାଞ୍ଚଳ ପ୍ରଦେଶ 2 ହଜାର 223, ଛତିଶଗଡ 1 ହଜାର 847, ଆନ୍ଧ୍ରପ୍ରଦେଶ 1 ହଜାର 787, ମେଘାଳୟରେ 1 ହଜାର 674 ଏବଂ ଝାଡ଼ଖଣ୍ଡର 1 ହଜାର 144 ଗାଁକୁ ସେବା ପହଞ୍ଚି ପାରିନାହିଁ । କେରଳ ,ପଞ୍ଜାବ, ତାମିଲନାଡୁ, ହରିୟାଣା ପରି ଅଳ୍ପ କିଛି ରାଜ୍ୟରେ ଗ୍ରାମାଞ୍ଚଳରେ ମୋବାଇଲ ସେବା ସଫଳ ହୋଇଛି।
ରାଜ୍ୟରେ କରୋନା ମହାମାରୀ ପାଇଁ ସମସ୍ତ କାର୍ଯ୍ୟ ଓ ପାଠପଢା ମଧ୍ୟ ଅନଳାଇନରେ କରାଯାଉଛି। କିନ୍ତୁ ଅନେକ ଗ୍ରାମରେ ମୋବାଇଲ ଓ ଇଣ୍ଟରନେଟର ସମସ୍ୟା ଯୋଗୁଁ ଅନଲାଇନ ପାଠପଢାରୁ ବଞ୍ଚିତ ହୋଇ ଅନେକ ଅସୁବିଧାର ସମ୍ମୁଖୀନ ହେଉଥିଲେ। ସାଧାରଣତଃ ଆଦିବାସୀ ଅଞ୍ଚଳ ଗୁଡିକରେ ମୋବାଇଲ ଓ ଇଣ୍ଟରନେଟ ସେବା ଅପହଞ୍ଚ ଥିବାରୁ ଅନେକ ବିଦ୍ୟାର୍ଥୀ ଶିକ୍ଷା ପାଇବାରୁ ବଞ୍ଚିତ ହୋଇଛନ୍ତି।
ଅନଲାଇନ କ୍ଳାସ ସମୟରେ ବିଦ୍ୟାର୍ଥୀ ଗଛ ଉପରେ ଚଢି ମୋବାଇଲ ଧରି ଘଣ୍ଟା ଘଣ୍ଟା ନେଟୱର୍କକୁ ଅପେକ୍ଷା କରୁଛନ୍ତି । ତାହା ସହିତ ଏହି ଅଞ୍ଚଳରେ ହଜାର ହଜାର ଲୋକ ଯୋଗାଯୋଗ ସୁବିଧା ପାଇପାରୁନାହାନ୍ତି। ଜାନୁଆରୀ 2022 ସୁଦ୍ଧା ଦେଶର 1ଲକ୍ଷ 4 ହଜାର 259 ଗ୍ରାମ ପଞ୍ଚାୟତକୁ ଭାରତ ନେଟ ପ୍ରୋଜେକ୍ଟ ଯୋଜନା ରେ ୱାଇଫାଇ ହଟସ୍ପଟ ସଂସ୍ଥାପନ କରାଯାଇଛି। କିନ୍ତୁ 53 ହଜାର 913 ଗ୍ରାମ ପଞ୍ଚାୟତରେ ୱାଇଫାଇ ହଟସ୍ପଟ ସେବା ଉପଲବ୍ଧ ହୋଇଛି।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
