ଭୁବନେଶ୍ବର: ଯେଉଁଠି 'ମୋ ସରକାର' ଆରମ୍ଭ ହୋଇଛି ସେଇଠି ଦେଖିବାକୁ ମିଳୁଛି ଅବହେଳାର ସ୍ପଷ୍ଟ ଚିତ୍ର । ରାତି ପାହିଲେ ରୋଗୀଙ୍କ ସମସ୍ୟା ବଢିଯାଉଛି । ଏଥିପ୍ରତି କାହାରି ନଜର ନାହିଁ। କାହାକୁ ଶଯ୍ୟା ମିଳୁନି ତ ପୁଣି କିଏ ବାରଣ୍ଡାରେ ଚିକିତ୍ସା ହେଉଛି। ଏହି ଘଟଣା ଏବେ ସାଧାରଣ ରୋଗୀଙ୍କ ନିମନ୍ତେ ଏକ ବଡ ସମସ୍ୟା ପାଲଟିଗଲାଣି ।
ଆଶୁ ଚିକିତ୍ସା କେନ୍ଦ୍ର ଠାରୁ ଆରମ୍ଭ କରି ବିଭିନ୍ନ ୱାର୍ଡରେ ଏଭଳି ସମସ୍ୟା ଲାଗି ରହିଥିଲେ ସୁଦ୍ଧା ଏହାର ସମାଧାନ ପାଇଁ କର୍ତ୍ତୃପକ୍ଷ ଚେଷ୍ଟିତ ନଥିବା ସ୍ପଷ୍ଟ ବାରି ହୋଇପଡୁଛି । ଏମିତି ଏକ ଘଟଣା ଦେଖିବାକୁ ମିଳିଛି ରାଜଧାନୀ ଛାତି ଉପରେ ଛିଡା ହୋଇଥିବା କ୍ୟାପିଟାଲ ହସ୍ପିଟାଲରେ । ଜଣେ ମହିଳା ରୋଗୀଙ୍କ ହାତରେ ସାଲାଇନ ଲାଗିଥିବା ସହ ରୋଗୀ ନିଜେ ସାଲାଇନ ଧରିଛନ୍ତି । ନା ଅଛି ସୁବିଧା ନା ଅଛି ସାଲାଇନ ଷ୍ଟାଣ୍ଡ ।
ସେହିପରି ଆଉ ଏକ ଘଟଣା ଦେଖିବାକୁ ମିଳିଥିଲା ଆଶୁ ଚିକିତ୍ସା କେନ୍ଦ୍ର ନିକଟରେ। ନୂଆଗଡରୁ ଜଣେ ରୋଗୀ ଆସିଥିବା ବେଳେ ଶଯ୍ୟା ନମିଳିବାରୁ ବାରଣ୍ଡାରେ ଚିକିତ୍ସିତ ହେଉଥିଲେ । ତାଙ୍କ ଦେଖାଶୁଣା କରିବା ପାଇଁ ସମ୍ପର୍କୀୟ ମହିଳା ଆଟେଣ୍ଡାଣ୍ଟଙ୍କୁ ଗୁହାରି କରିଥିଲେ ମଧ୍ୟ ଉତ୍ତର ମିଳିଥିଲା ଅପେକ୍ଷା କରିବାକୁ । ସେପଟେ ସାଲାଇନ ପାଇପରେ ରକ୍ତ ଉପରକୁ ଆସିଯାଇଥିଲେ ବି ମାତ୍ର ହସ୍ପିଟାଲର କୌଣସି କର୍ମଚାରୀଙ୍କ ଦେଖା ନଥିଲା ।
ଏହା ବ୍ୟତୀତ ଅନ୍ୟ ୱାର୍ଡରେ ମଧ୍ୟ ସମାନ ଅବସ୍ଥା ଦେଖିବାକୁ ମିଳିଥିଲା । ରାତିରେ ରୋଗୀଙ୍କର କୌଣସି ଅସୁବିଧା ହେଲେ କେଉଁ ଅଧିକାରୀଙ୍କୁ ଜଣାଇବେ ତାହା ଏବେ ବଡ଼ ସମସ୍ୟା ପାଲଟିଛି । ସେହିପରି ଆଶୁ ଚିକିତ୍ସା କେନ୍ଦ୍ର ନିକଟରେ ଉଭୟ ମହିଳା ଓ ପୁରୁଷ ୱାର୍ଡରେ ପର୍ଯ୍ୟାପ୍ତ ଶଯ୍ୟା ରହୁନାହିଁ । ମହିଳା ୱାର୍ଡରେ ପୁରୁଷ ଓ ପୁରୁଷ ୱାର୍ଡରେ ମହିଳା ରହୁଛନ୍ତି । ଏଥିପ୍ରତି କାହାର ନଜର ବି ନାହିଁ। କାକଟପୁରରୁ ଆସିଥିବା ଜଣେ ରୋଗୀଙ୍କ ସମ୍ପର୍କୀୟ ମାନଗୋବିନ୍ଦ ମହାରଣାଙ୍କ କଥାକୁ ଡାକ୍ତର ଶୁଣିନଥିବା ଅଭିଯୋଗ ହୋଇଛି ।
ଦୀର୍ଘ ସମୟ ଧରି ଶଯ୍ୟା ନମିଳିବାରୁ ବିରକ୍ତି ଭାବ ପ୍ରକାଶ କରିଛନ୍ତି ସେ । ଯାହା ଫଳରେ 'ମୋ ସରକାର' କାର୍ଯ୍ୟକ୍ରମ କୁ ନେଇ ତାତ୍ସଲ୍ୟ କରିଛନ୍ତି ।
ହସ୍ପିଟାଲକୁ ଦୈନିକ 3 ହଜାର ରୁ ଊର୍ଦ୍ଧ୍ବ ରୋଗୀ ଆସୁଛନ୍ତି। ବିଶେଷ କରି ଗରିବ ଓ ଦିନ ମଜୁରିଆ । ସେମାନେ ସମ୍ପୂର୍ଣ୍ଣ ଭାବେ ଜାଣିନାହାନ୍ତି ହସ୍ପିଟାଲର ବିଭିନ୍ନ ବିଭାଗର ବିଷୟରେ। ଏହି ବିଷୟରେ ରୋଗୀଙ୍କୁ ଜଣାଇବା ପାଇଁ ଏକ ହେଲ୍ପ ଡେସ୍କ ଖୋଲାଯାଇଛି। ହେଲେ ଏଥିରୁ ବଞ୍ଚିତ ହେଉଛନ୍ତି ରୋଗୀ। ହେଲ୍ପ ଡେସ୍କରେ ଟେବୁଲ ଚେୟାର ପଡିଛି ଫ୍ୟାନ ବି ବୁଲୁଛି, ହେଲେ ସାହାଯ୍ୟକାରୀଙ୍କ ଦେଖା ନାହିଁ।
ଏହାକୁ ନେଇ ଅଧିକ୍ଷକ କହିଛନ୍ତି ଯେ, ପୂର୍ବରୁ ହସ୍ପିଟାଲକୁ ସୀମିତ ରୋଗୀ ଆସୁଥିଲେ ବର୍ତ୍ତମାନ ଅଧିକ ମାତ୍ରାରେ ରୋଗୀ ଆସୁଛନ୍ତି । ଭିତ୍ତିଭୂମି ସହ ମାନବ ସମ୍ବଳର ବି ଆବଶ୍ୟକତା ରହିଛି । ଯାହା ପରିବର୍ତ୍ତନ ହୋଇନାହିଁ। ତଥାପି ଉତ୍ତମ ସେବା ଯୋଗାଇ ଦିଆଯାଉଛି ବୋଲି ସେ କହିଛନ୍ତି।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
