ଭୁବନେଶ୍ବର: ରାଜ୍ୟରେ ମମିତା ନିଆଁ ଲିଭିବାର ନାଁ ଧରୁନି। ମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କ ବହିଷ୍କାର ଦାବି ସାରା ରାଜ୍ୟରେ ଜୋର ଧରିଛି। ହତ୍ୟା ଘଟଣାକୁ ମାସେ ବିତିଛି । ହେଲେ ଏ ପର୍ଯ୍ୟନ୍ତ ତଦନ୍ତର କୌଣସି ବାସ୍ତବ ଦିଗ ବିଷୟରେ ସାର୍ବଜନୀନ ହେଲା ନାହିଁ। ବିରୋଧୀ ମନ୍ତ୍ରୀଙ୍କ ବହିଷ୍କାର ଦାବି କରି ବିକ୍ଷୋଭ ଉପରେ ବିକ୍ଷୋଭ ଜାରି ରଖିଛନ୍ତି। ଦୀର୍ଘଦିନ ଧରି ମୁଖ୍ୟମନ୍ତ୍ରୀଙ୍କ କଳାହାଣ୍ଡି ଗସ୍ତକୁ ନେଇ ଯେଉଁ କଳ୍ପନା ଜଳ୍ପନା ଲାଗିରହିଥିଲା । ତାହାର ଆଜି ଅନ୍ତ ଘଟିଛି । ମୁଖ୍ୟମନ୍ତ୍ରୀ କଳାହାଣ୍ଡି ଜିଲ୍ଲାର ବିଭିନ୍ନ ସ୍ଥାନରେ ବିଜୁ ସ୍ମାର୍ଟ ହେଲଥ କାର୍ଡ ବାଣ୍ଟିଛନ୍ତି।
ଗୃହ ରାଷ୍ଟ୍ରମନ୍ତ୍ରୀ ଦିବ୍ୟଶଙ୍କର ମିଶ୍ରଙ୍କୁ ଷ୍ଟେଜ ଉପରେ ବସାଇଲେ। ତେବେ ଏହାକୁ ସହଜରେ ଗ୍ରହଣ କରିପାରି ନାହାଁନ୍ତି ବିରୋଧୀ। କଂଗ୍ରେସ ଏହାକୁ ନିନ୍ଦା କରିଛି। ମୁଖ୍ୟମନ୍ତ୍ରୀ ଅପରାଧୀ ମାନଙ୍କୁ ଷ୍ଟେଜ ଉପରେ ବସାଇଲେ । ଯାହା ଆଦୈ ଠିକ ହେଲାନି। ଗୋଟିଏ ସରଳ ନିରୀହ ଝିଅକୁ ହତ୍ୟା କରାଗଲା । ଆଉ ତାକୁ ନ୍ୟାୟ ଦେବା ପରିବର୍ତ୍ତେ ମୁଖ୍ୟମନ୍ତ୍ରୀ ତାକୁ ଷ୍ଟେଜ ଉପରେ ବସାଉଛନ୍ତି। ଆଉ କଣ ମମିତାକୁ ନ୍ୟାୟ ମିଳିବ । ତା ପରିବାର ଉପରେ ସରକାରୀ ଚାପ ଯୋଗୁଁ ସେମାନେ ଡରି ଚୁପ ରହୁଛନ୍ତି ବୋଲି କହିଛନ୍ତି ବିଧାୟକ ସୁର ରାଉତ ରାୟ ।
ଭୁବନେଶ୍ବରରୁ ସଞ୍ଜୀବ ରାୟ, ଇଟିଭି ଭାରତ
