ଭୁବନେଶ୍ବର: ପ୍ରଥମ କରି ରାଜଧାନୀରେ ଅନୁଷ୍ଠିତ ହୋଇଛି ମିଶନ ଶକ୍ତିମେଳା । ଏହି ମେଳା ଗାଁ ଗହଳିର ମହିଳାଙ୍କୁ ନୂତନ ଦିଶା ଦେଖାଇବା ସହ ରୋଜଗାରର ପନ୍ଥା ବତାଇଦେଇଛି । ତେବେ ରାଜ୍ୟରେ ଅନୁଷ୍ଠିତ ହୋଇଥିବା ଏହି ମିଶନ ଶକ୍ତି ମେଳା ପାଇଁ ଚର୍ଚ୍ଚା ଜୋର ଧରିଛି । ଆଉ ସନ୍ଧ୍ୟା ହେଲେ ପ୍ରଦର୍ଶନୀ ପଡିଆକୁ ଛୁଟୁଛି ଭୁବନେଶ୍ବରିଆଙ୍କ ସୁଅ । ଏହି ମେଳାରେ ମୁଖ୍ୟ ଆକର୍ଷଣ ପାଲଟିଛି ବାଉଁଶ ଓ ବେତ ଷ୍ଟଲ। ବାଲେଶ୍ଵର ଜିଲ୍ଲାର ସିମୁଳିଆ ଗାଁରୁ ଆସିଥିବା ସୃଷ୍ଟି ବେତ ବାଉଁଶ ମହିଳା ଉତ୍ପାଦକ ଏସଏସଜି ଗ୍ରୁପ ମମତା ସାହୁଙ୍କୁ ଏବେ ନୂଆ ପରିଚୟ ଦେଇପାରିଛି।
ସୂଚନା ଅନୁସାରେ, ପରିବାରର ଆର୍ଥିକ ସ୍ଥିତି ଦୁର୍ବଳ ପାଇଁ ମମତା ଦିନେ ଅଧାରୁ ପାଠରେ ଢୋରି ବାନ୍ଧିଥିଲେ । ହେଲେ ମିଶନ ଶକ୍ତିରେ ଯୋଗ ଦେଇ ସେ ବାଉଁଶ କାରିଗରୀ ଉପରେ ଶିକ୍ଷା ଲାଭକରି ବେଶ ଭଲ ଦୁଇ ପଇସା ରୋଜଗାର କରିପାରିଛନ୍ତି ।
ଖବର ଥାଉକି, ମିଶନ ଶକ୍ତି ନିର୍ଦ୍ଦେଶାଳୟ ମହିଳା ଓ ଶିଶୁ ବିକାଶ ଏବଂ ମିଶନ ଶକ୍ତି ବିଭାଗ ରାଜ୍ୟରେ ପ୍ରଥମ ଥର କରି ଏହି ମେଳାର ଆୟୋଜନ କରିଛି। ରାଜ୍ୟର ରାଜଧାନୀ ଭୁବନେଶ୍ବରସ୍ଥିତ ପ୍ରଦର୍ଶନୀ ପଡିଆରେ ଏହା ଆଜିଠାରୁ ଆସନ୍ତା 16 ଡିସେମ୍ବର ପର୍ଯ୍ୟନ୍ତ ଚାଲିବ। ମେଳାରେ ସର୍ବମୋଟ 200 ଟି ଷ୍ଟଲରେ 400 ମହିଳା ନିଜର ହାତ ତିଆରି ଜିନିଷ ବିକ୍ରି କରୁଛନ୍ତି ।
ଭୁବନେଶ୍ବରରୁ ଶତରୂପା ସାମନ୍ତରାୟ,ଇଟିଭି ଭାରତ
