ଭୁବନେଶ୍ବର: ଆଜିଠୁ ‘ମୋ ସରକାର’ରେ ସାମିଲ ହୋଇଛି ଖାଦ୍ୟ ଯୋଗାଣ ଏବଂ ଖାଉଟି କଲ୍ୟାଣ ବିଭାଗ। ଲୋକସେବା ଭବନରେ ମୁଖ୍ୟମନ୍ତ୍ରୀଙ୍କ ଉପସ୍ଥିତରେ ସାମିଲ ହୋଇଛି ବିଭାଗ ।
ଏହି ଅବସରରେ ବିଭାଗର ସୁଫଳ କାର୍ଯ୍ୟକାରିତାର ତଥ୍ୟ ଦିଆଯାଇଛି । 2011 ଜନଗଣନା ଅନୁସାରେ ରାଜ୍ୟର ମୋଟ ଜନସଂଖ୍ୟାର ଶତକଡା 79 ପ୍ରତିଶତ ଲୋକଙ୍କୁ ରିହାତି ମୂଲ୍ୟରେ ଖାଦ୍ୟ ଶସ୍ୟ ଯୋଗାଇ ଦିଆଯାଉଛି । ସାଧାରଣ ବଣ୍ଟନ ବ୍ୟବସ୍ଥା ଜରିଆରେ ମୋଟ 3 କୋଟି 30 ଲକ୍ଷ ହିତାଧିକାରୀଙ୍କୁ ତାଲିକା ଭୁକ୍ତ କରାଯାଇଛି । କିଲୋଗ୍ରାମ ପିଛା 1 ଟଙ୍କା ମୂଲ୍ୟରେ ମାସିକ 1 କୋଟି 84 ଲକ୍ଷ ମେଟ୍ରିକ ଟନ ଖାଦ୍ୟ ଶସ୍ୟ ପ୍ରଦାନ କରାଯାଉଛି ।
ଏହି ଯୋଜନାର ଅଗ୍ରାଧିକାର ପରିବାରକୁ ମୁଣ୍ଡପିଛା 5 କିଲୋଗ୍ରାମ ଚାଉଳ କିମ୍ବା ଗହମ ପ୍ରଦାନ କରାଯାଉଥିବାବେଳେ ଅନ୍ତୋଦୟ ଅନ୍ନ ଯୋଜନା ମାଧ୍ୟମରେ ମାସିକ ପରିବାର ପିଛା 35 କିଲୋଗ୍ରାମ ଚାଉଳ ଯୋଗାଇ ଦିଆଯାଉଛି । ଏସଏଚଜି ମହିଳାଙ୍କୁ ପ୍ରୋତ୍ସାହିତ କରିବା ପାଇଁ ସେମାନଙ୍କୁ ଖାଉଟି ଡିଲର ରୂପେ ଦାୟିତ୍ବ ଦେଇ ଖାଦ୍ୟ ଶସ୍ୟ ପ୍ରଦାନ କରାଯାଉଛି।
ରାଜ୍ୟରେ 1910 ମହିଳା ସ୍ବୟଂ ସହାୟକ ଗୋଷ୍ଠୀ ଏହି ଦାୟିତ୍ବ ନିର୍ବାହ କରୁଛନ୍ତି। ଅଧିକ ପ୍ରୋତ୍ସାହନ ମଧ୍ୟ ଦିଆଯିବାର ଯୋଜନା ରହିଛି। 2019 ସେପ୍ଟେମ୍ବରରେ ଭୁବନେଶ୍ବର ମହାନଗର ନିଗମ ଅଞ୍ଚଳରେ ରାସନ କାର୍ଡ ପୋର୍ଟବିଲିଟି ଲାଗୁ କରାଯାଇଛି । ଏହାଦ୍ବାରା ନିଜ ହିତାଧିକାରୀ ନିଜ ଇଚ୍ଛା ଅନୁସାରେ ସୁଲଭ ମୂଲ୍ୟ ଦୋକାନ ଚୟନ କରୁଛନ୍ତି ଏବଂ ମାସିକ ଖାଦ୍ୟ ସାମଗ୍ରୀ ଉକ୍ତ ଦୋକାନରୁ କିଣୁଛନ୍ତି ।
ବୃତ୍ତିଗତ ସେବାରେ ପରିବର୍ତ୍ତନ ଆଣିବା ପାଇଁ ‘5T’ ବେଶ୍ ସହାୟକ ହୋଇଛି। ରାଜ୍ୟ, ଜିଲ୍ଲା, ପୌରାଞ୍ଚଳ, ସୁଲଭ ମୂଲ୍ୟ ଦୋକାନ ସ୍ତରରେ ଏବଂ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗ ଏବଂ ଏହି ବିଭାଗ କାର୍ଯ୍ୟାଳୟକୁ ଆସୁଥିବା ଜଣସାଧାରଣକୁ ବୃତ୍ତିଗତ ସେବା ଆଣିବା ପାଇଁ ବିଭାଗ ହୋଇଛି ସଂକଳ୍ପବଧ । ଏନେଇ ଜଣ ସାଧାରଣଙ୍କ ପାଇଁ ଖୋଲିଛି ହେଲ୍ପ ଡେକ୍ସ । କାର୍ଯ୍ୟାଳୟକୁ ଆସୁଥିବା ବ୍ୟକ୍ତିଙ୍କ ଠାରୁ ପାଉଥିବା ସେବାର ଗୁଣବତ୍ତା ଏବଂ ପ୍ରଦର୍ଶିତ ବ୍ୟବହାର ସମ୍ପର୍କରେ ମତାମତ ସଂଗ୍ରହ କରାଯାଉଛି ।
ଲୋକସେବା ଭବନରେ ଆୟୋଜିତ କାର୍ଯ୍ୟକ୍ରମରେ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ, ମୁଖ୍ୟ ଶାସନ ସଚିବ ଅସିତ ତ୍ରିପାଠୀ, ‘5T’ ସଚିବ ଭି କାତ୍ତିକେୟନ ପାଣ୍ଡିଆନ, ଉନ୍ନୟନ କମିଶନର ସୁରେଶ ମହାପାତ୍ର, ବିଭାଗୀୟ ସଚିବ ପ୍ରମୁଖ ଉପସ୍ଥିତ ଥିଲେ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
