ଭୁବନେଶ୍ବର: ବିଦ୍ୟାଳୟରେ ଦିଆଯାଉଥିବା ମଧ୍ୟାହ୍ନ ଭୋଜନରେ ଏଣିକି ମିଳିବ ଦୁଗ୍ଧଜାତ ଦ୍ରବ୍ୟ । ଏନେଇ ବିଚାର ବିମର୍ଷ ଜାରି ରଖିଛନ୍ତି ରାଜ୍ୟ ସରକାର। । ରାଜ୍ୟରେ ଦୁଗ୍ଧ ବ୍ୟବହାର ମୁଣ୍ଡପିଛା 110 ଗ୍ରାମ ରହିଥିବା ବେଳେ ପଞ୍ଜାବରେ ଏହା 10 ଗୁଣା ରହିଛି । ତେଣୁ ମୁଣ୍ଡପିଛା ଦୁଗ୍ଧଜାତ ଦ୍ରବ୍ୟ ବ୍ୟବହାର ବୃଦ୍ଧି ଘଟାଇବା ସହିତ ମଧ୍ୟାହ୍ନ ଭୋଜନରେ ଛାତ୍ରଛାତ୍ରୀଙ୍କୁ ଏହା ପ୍ରଦାନ କରାଯିବ ବୋଲି କହିଛନ୍ତି ସମବାୟ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ବାଇଁ।
ଏପରି ନିଷ୍ପତ୍ତିକୁ ସିଧାସଳଖ ନିଜ କାନ୍ଧକୁ ନେଇଛନ୍ତି ମନ୍ତ୍ରୀ । କିପରି ଏହା କାର୍ଯ୍ୟକାରୀ ହେବ ସେନେଇ ମଧ୍ୟ ଆଲୋଚନା ଜାରି ରହିଛି । ବିଦ୍ୟାଳୟର ମଧ୍ୟାହ୍ନ ଭୋଜନରେ ଦୁଗ୍ଧଜାତ ଖାଦ୍ୟ ମିଳିବା ଦ୍ବାରା ଛାତ୍ରଛାତ୍ରୀ ପୁଷ୍ଟିକର ଖାଦ୍ୟ ପାଇବାରେ ସକ୍ଷମ ହେବେ । ଏହା ସହ ଦୁଗ୍ଧ ଚାଷୀ ମଧ୍ୟ ଉପକୃତ ହେବେ ବୋଲି ମନ୍ତ୍ରୀ କହିଛନ୍ତି।
ରାଜ୍ୟରେ ଓମଫେଡର ଏବେ 3760 ସମବାୟ ସମିତି ରହିଥିବା ବେଳେ ମୋଟ 2 ଲକ୍ଷ 70 ହଜାର ଦୁଗ୍ଧଚାଷୀ ରହିଛନ୍ତି। ଦୈନିକ 63 ଲକ୍ଷ ଲିଟର କ୍ଷୀର ଓମଫେଡ ସଂଗ୍ରହ କରୁଥିବା ବେଳେ 80 ଲକ୍ଷ ଟାର୍ଗେଟ ରଖାଯାଇଛି । ଗୋ ସମ୍ପଦ ବିକାଶରେ ଉଦ୍ୟୋଗୀଙ୍କ ଭୂମିକା ଶୀର୍ଷକ କର୍ମଶାଳାରେ ଯୋଗ ଦେଇ ଏହି ସୂଚନା ଦେଇଛନ୍ତି ସମବାୟ ମନ୍ତ୍ରୀ।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
