ଭୁବନେଶ୍ବର: ରାଜ୍ୟ ସ୍ବାସ୍ଥ୍ୟ ବିଭାଗ ସହିତ କେନ୍ଦ୍ରୀୟ ଟିମ ବୈଠକ ଶେଷ ହୋଇଛି । ରାଜ୍ୟରେ କୋରୋନା ସଂକ୍ରମଣ ବୃଦ୍ଧିର କାରଣ ଜାଣିବା ପାଇଁ କେନ୍ଦ୍ରୀୟ ଟିମ ଆସିଛନ୍ତି । ତେବେ ଏହି ଟିମ ଆଜି(ସୋମବାର) ସରକାରୀ ଓ ଘରୋଇ ହସ୍ପିଟାଲ, ସମ ହସ୍ପିଟାଲ ପରିଦର୍ଶନ କରିବେ ବୋଲି ଜଣାପଡିଛି ।
ଏହାପରେ ଆସନ୍ତାକାଲି ଏହି ଟିମ ପୁରୀ ଓ ଜଗତସିଂହପୁର ପରିଦର୍ଶନ କରିବେ । ଓଡ଼ିଶାରେ 7 ଦିନ ରହିବା ସହ ବିଭିନ୍ନ ଜିଲ୍ଲା ବୁଲିବାର କାର୍ଯ୍ୟକ୍ରମ ରହିଛି । ପ୍ରତ୍ୟେକ ଦିନ ସନ୍ଧ୍ୟାରେ କେନ୍ଦ୍ର ସରକାରଙ୍କ ସହ ବୈଠକ କରି ରିପୋର୍ଟ ଦେବ ଏହି ଟିମ । କୋଲକାତାର ସ୍ବାସ୍ଥ୍ୟ ବିଶେଷଜ୍ଞ ଶିବାନୀ ଦତ୍ତ ଓ ଭୁବନେଶ୍ବର ଏମ୍ସର ପି.ଆର ମହାପାତ୍ରଙ୍କୁ ନେଇ ଟିମ୍ ଗଠନ ହୋଇଛି । ଏହି ଟିମ ସଂକ୍ରମଣ ହାର ପ୍ଲାଟୋ ଷ୍ଟେଜରେ ରହିବା, ମୃତ୍ୟୁ ସଂଖ୍ୟାରେ ବ୍ରେକ ନ ଲାଗିବା ସମ୍ପର୍କରେ ତର୍ଜମା କରିବେ ।
ତେବେ ସୂଚନା ଥାଉ କି ଦେଶର 6ଟି ରାଜ୍ୟରେ ସଂକ୍ରମଣ ସଂଖ୍ୟା ଅଧିକ ରହିଛି । ଏହାର କାରଣ ଜାଣିବାକୁ 6ଟି ରାଜ୍ୟକୁ ସ୍ବତନ୍ତ୍ର ବିଶେଷଜ୍ଞ ଟିମ ପଠାଇଛନ୍ତି କେନ୍ଦ୍ର ସରକାର । ଏହି ସଂକ୍ରମଣ ଅଧିକ ଥିବା ଜିଲ୍ଲା ଗସ୍ତ କରିବାର କାର୍ଯ୍ୟକ୍ରମ ରହିଛି । ଟିମ କୋରୋନା ଟେଷ୍ଟିଂ, ନିରୀକ୍ଷଣ, ନିୟନ୍ତ୍ରଣ ଓ ପରିଚାଳନା ଆଦିର ସାମଗ୍ରିକ କାର୍ଯ୍ୟକାରିତା ଆଦିର ତଦାରଖ କରିବେ । ଓଡିଶା ସହିତ କେରଳ, ଅରୁଣାଚଳ ପ୍ରଦେଶ, ତ୍ରିପୁରା, ଛତିଶଗଡ ଓ ମଣିପୁର ଗସ୍ତ କରିବ ଏହି ଟିମ ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
