ଭୁବନେଶ୍ବର: ପରଲୋକରେ ବରିଷ୍ଠ ବିଜେପି ବିଧାୟକ ବିଷ୍ଣୁ ସେଠୀ । ଭୁବନେଶ୍ବର ଏମ୍ସରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ହୋଇଛି । ୧୯୬୧ ମସିହା ଜୁନ୍ ୫ ତାରିଖରେ ଜନ୍ମ ଗ୍ରହଣ କରିଥିଲେ ବିଷ୍ଣୁ ସେଠୀ । ଦୀର୍ଘ ଦିନ ଧରି କିଡନୀ ରୋଗରେ ଆକ୍ରାନ୍ତ ଥିଲେ ଧାମନଗର ବିଧାୟକ । ୬୧ ବର୍ଷ ବୟସରେ ତାଙ୍କର ଦେହାନ୍ତ ହୋଇଛି । ଗତ ନିର୍ବାଚନରେ ଭଦ୍ରକ ଧାମନଗର ନିର୍ବାଚନ ମଣ୍ଡଳୀରୁ ବିଧାୟକ ଭାବେ ନିର୍ବାଚିତ ହୋଇଥିଲେ । ବିଷ୍ଣୁ ସେଠୀଙ୍କ ପରଲୋକ ପରେ ରାଜ୍ୟ ନେତାମନ୍ତ୍ରୀ ତାଙ୍କ ସହ ବିତାଇଥିବା ମୁହୂର୍ତ୍ତକୁ ମନେ ପକାଇଛନ୍ତି (mourns for demise of BJP MLA Bishnu Sethi)।
ବିଧାନସଭାରେ ଶ୍ରଦ୍ଧାଞ୍ଜଳି
ଭୁବନେଶ୍ବର ଏମ୍ସରୁ ବିଷ୍ଣୁ ସେଠୀଙ୍କ ପାର୍ଥିବ ଶରୀରକୁ ସିଧାସଳଖ ତାଙ୍କ କର୍ମକ୍ଷେତ୍ର ବିଧାନସଭା ଅଣା ଯାଇଥିଲା । ବାଚସ୍ପତି ବିକ୍ରମ କେଶରୀ ଆରୁଖ ଶ୍ରଦ୍ଧାଞ୍ଜଳି ଦେଇଛନ୍ତି । ବିଷ୍ଣୁଙ୍କୁ ଶେଷ ଦର୍ଶନ କରିବା ପାଇଁ ବିଧାନସଭାରେ ବରିଷ୍ଠ ବିଧାୟକ ଓ ମନ୍ତ୍ରୀଙ୍କ ଭିଡ଼ ଜମିଥିଲା । ବିଧାନସଭାରେ ଶାଣିତ ସ୍ବରରେ ଜନସାଧାରଣଙ୍କ ସମସ୍ୟା ଉପସ୍ଥାପନ କରିବାରେ ତାଙ୍କର ଶୈଳି ଥିଲା ନିଆରା । ଜଣେ ଲେଖକ ଓ ସୁବକ୍ତା ଭାବେ ସେ ନିଜର ଅନ୍ୟ ଏକ ପରିଚୟ ତିଆରି କରିଥିଲେ ।
ଦକ୍ଷ ସଂଗଠକ ବିଷ୍ଣୁ ସେଠୀ
ଦକ୍ଷ ସଂଗଠକ ଭାବରେ ବିଜେପି ସଂଗଠନକୁ ମଜଭୁତ କରିବାରେ ବିଷ୍ଣୁ ସେଠୀଙ୍କ ଭୂମିକା ଅତୁଳନୀୟ । ତାଙ୍କ ବିୟୋଗ କେବଳ ବିଜେପି ପାଇଁ ନୁହେଁ ବରଂ ରାଜ୍ୟ ରାଜନୀତିରେ ଅପୂରଣୀୟ କ୍ଷତି । ବିଷ୍ଣୁ ଶାଣିତ ସ୍ବରରେ ସରକାରଙ୍କୁ ସମାଲୋଚନା କରୁଥିଲେ ।
ଜନ ଚିନ୍ତକ ବିଷ୍ଣୁ
ଜନପ୍ରତିନିଧି ଭାବେ ଲୋକଙ୍କ ପାଇଁ ତାଙ୍କ କଲ୍ୟାଣକାରୀ କାର୍ଯ୍ୟ ସର୍ବଦା ସ୍ମରଣୀୟ ରହିବ । ବିଧାନସଭା ପରିସରରେ ତାଙ୍କର ଶେଷ ଦର୍ଶନ କରି ଅଶୃଳ ଶ୍ରଦ୍ଧାଞ୍ଜଳୀ ଅର୍ପଣ କରିଛନ୍ତି ନେତାଏ । ତୃଣମୂଳ ସ୍ତରରୁ ଛାତ୍ର ସମୟରୁ ସେ ରାଜନୀତିରେ ସକ୍ରିୟ ରହିଥିଲେ । ଜଣେ ନିଡର ନେତା ସହ କବି, ଲେଖକ, ସାମ୍ବାଦିକ ଭାବରେ ସେ ସୁନାମ ଅର୍ଜନ କରିଛନ୍ତି ।
ବିଷ୍ଣୁ ସେଠିଙ୍କ ବିୟୋଗକୁ ନେଇ ସ୍ବାସ୍ଥ୍ୟମନ୍ତ୍ରୀ ମନ୍ତ୍ରୀ ନବ କିଶୋର ଦାସ ଶୋକ ପ୍ରକାଶ କରିଛନ୍ତି । ସେ କହିଛନ୍ତି, "ତାଙ୍କ ବିୟୋଗ ରାଜ୍ୟ ରାଜନୀତି ପାଇଁ ଏକ ଅପୂରଣୀୟ କ୍ଷତି । ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକସନ୍ତପ୍ତ ପରିବାର ବର୍ଗକୁ ସମବେଦନା ଜଣାଇଛନ୍ତି ନବ କିଶୋର ଦାସ । ସେହିପରି ବିଷ୍ଣୁଙ୍କ ଦେହାନ୍ତ ଖବରରେ ମୁଁ ଅତ୍ୟନ୍ତ ଦୁଃଖିତ ଓ ମର୍ମାହତ ବୋଲି କହିଛନ୍ତି ଖଣି, ଇସ୍ପାତ ଓ ପୂର୍ତ୍ତ ବିଭାଗ ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ।"
ବିଷ୍ଣୁଙ୍କ ବ୍ୟକ୍ତିତ୍ବ
ବିଷ୍ଣୁ ଜଣେ ବହୁତ ଭଲ ମଣିଷ ଥିଲେ । ଦଳମତ ନିର୍ବିଶେଷରେ ସମସ୍ତ ନେତା ତାଙ୍କୁ ଭଲ ପାଉଥିଲେ । ତାଙ୍କ ବିୟୋଗ ରାଜ୍ୟ ରାଜନୀତି ପାଇଁ ଏକ ଅପୂରଣୀୟ କ୍ଷତି । ବିରୋଧୀ ଦଳ ଉପନେତା ବିଷ୍ଣୁ ଚରଣ ସେଠୀଙ୍କ ବିୟୋଗରେ ରାଜ୍ୟ ପର୍ଯ୍ୟଟନ, ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତି ତଥା ଅବକାରୀ ମନ୍ତ୍ରୀ ଅଶ୍ଵିନୀ କୁମାର ପାତ୍ରଙ୍କ ଶୋକ ପ୍ରକାଶ କରିଛନ୍ତି । ସେ କହିଛନ୍ତି ଯେ, ବିଧାୟକ ବିଷ୍ଣୁ ସେଠୀଙ୍କ ବିୟୋଗରେ ଓଡ଼ିଶା ଜଣେ ସକ୍ରିୟ ଏବଂ ଲୋକପ୍ରିୟ ରାଜନେତାଙ୍କୁ ହରାଇଲା ।
ସାରସ୍ବତ ସାଧକ ବିଷ୍ଣୁ
ଦିବଙ୍ଗତ ନେତା ବିଷ୍ଣୁ ସେଠୀ ଜଣେ ଓଡ଼ିଆ ସାହିତ୍ୟିକ, ସଫଳ ତଥା ଲୋକପ୍ରିୟ ରାଜନେତା ଭାବରେ ସର୍ବଦା ମନେ ରହିବେ । ଓଏଏସ୍ ପାଇଥିଲେ ବି ଚାକିରି ନକରି ସେ ରାଜନୀତିରେ ମନ ବଳାଇଥିଲେ । ତାଙ୍କର ବିୟୋଗ ଓଡିଶା ରାଜନୈତିକ ଏବଂ ସାରସ୍ବତ ଜଗତର ଅପୂରଣୀୟ କ୍ଷତି ।
ଧାମନଗର ବିଧାୟକ ବିଷ୍ଣୁ ଚରଣ ସେଠୀଙ୍କ ବିୟୋଗରେ ଗ୍ରାମ୍ୟ ଉନ୍ନୟନ, ଦକ୍ଷତା ବିକାଶ ଓ ବୈଷୟିକ ଶିକ୍ଷା ମନ୍ତ୍ରୀଙ୍କ ଶୋକ ପ୍ରକାଶ କରିଛନ୍ତି । ମନ୍ତ୍ରୀ କହିଛନ୍ତି ଯେ, "ଜଣେ ସ୍ପଷ୍ଟବାଦୀ, ନିର୍ଭୀକ ଜନନାୟକ ଭାବେ ପରିଚିତ ବିଧାୟକ ବିଷ୍ଣୁ ଚରଣ ସେଠୀ ଙ୍କ ଅକାଳ ବିୟୋଗ ଖବର ଶୁଣି ମୁଁ ଗଭୀର ଦୁଃଖୀତ ଓ ମର୍ମାହତ । ବରିଷ୍ଠ ରାଜନେତା, ବିରୋଧୀ ଦଳର ଉପନେତା ତଥା ଓଡିଶା ପ୍ରଦେଶର ଜଣେ ଟାଣୁଆ ନେତା ଭାବରେ ସେ ପରିଚିତ ଥିଲେ । ତାଙ୍କ ବିୟୋଗ ଆମ ସମସ୍ତଙ୍କ ପାଇଁ ଏକ ଅପୂରଣୀୟ କ୍ଷତି ।"
ସ୍ପଷ୍ଟବାଦୀ ଥିଲେ ବିଷ୍ଣୁ
ବିଷ୍ଣୁ ସେଠୀ ଜଣେ ସ୍ପଷ୍ଟବାଦୀ ବ୍ୟକ୍ତିତ୍ବ ଥିଲେ । ନିଜ ରଚିତ ଗୀତ ଓ କବିତା ମାଧ୍ୟମରେ ଲୋକଙ୍କ ସମସ୍ୟାକୁ ବିଧାନସଭା ଗୃହରେ ଉପସ୍ଥାପନ କରୁଥିଲେ । ନିଜର ବେପରୁଆ କଥା ଯୋଗୁଁ ସେ ଅନେକ ସମୟରେ ବିବାଦିତ ରହିଥିଲେ ବି ଲୋକ ଓ ଅନ୍ୟ ରାଜନୈତିକ ଦଳର ନେତାଙ୍କ ପ୍ରିୟଭାଜନ ହୋଇ ପାରିଥିଲେ । ଆଜି ତାଙ୍କର ସେହି କଥାଗୁଡ଼ିକୁ ସଭିଏଁ ଝୁରୁଛନ୍ତି ।
