ଭୁବନେଶ୍ବର: ସେବାୟତଙ୍କ ଜିଦ ଆଗରେ ତୁଚ୍ଛ ହେଲା ନୀତିକାନ୍ତି । ବନ୍ଦ ରହିଲା ମହାପ୍ରଭୁ ଲିଙ୍ଗରାଜଙ୍କ ପଇତା ଲାଗି ନୀତି । ପୂଜା ପଣ୍ଡା ନିଯୋଗ ଓ ବଡୁ ନିଯୋଗ ମଧ୍ୟରେ ମତଭେଦ ଯୋଗୁଁ ବର୍ଷ ବର୍ଷ ଧରି ଚାଲି ଆସୁଥିବା ଲିଙ୍ଗରାଜଙ୍କ ପଇତା ଲାଗି ନୀତିକାନ୍ତି ବନ୍ଦ ହୋଇଛି । ମନ୍ଦିର କାର୍ଯ୍ୟାଳୟରେ ବସିଥିବା ବୈଠକରେ ଏହି ନୀତି ବନ୍ଦ କରି ପରବର୍ତ୍ତୀ ନୀତି କରିବା ଲାଗି ନିଷ୍ପତ୍ତି ନିଆଯାଇଛି ।
କାର୍ଯ୍ୟ ନିର୍ବାହି ଅଧିକାରୀ ଏହି ସମସ୍ୟା ସମ୍ପର୍କରେ ଦେବୋତ୍ତର କମିଶନଙ୍କୁ ଅବଗତ କରିବେ । ମନ୍ଦିର ଆକ୍ଟ 41 ଅନୁସାରେ ଏକ କେସ କରାଯିବ । ଯାହା ନିଷ୍ପତ୍ତି ହେବ ଆଗାମୀ ବର୍ଷଠାରୁ ଲାଗୁ ହେବ । ଏପଟେ ଲିଙ୍ଗରାଜ ମନ୍ଦିର ଆଇନ ମୁଖ୍ୟମନ୍ତ୍ରୀ ଘୋଷଣା କରିଥିଲେ ମଧ୍ୟ ଏପର୍ଯ୍ୟନ୍ତ ଲାଗୁ ହୋଇ ପାରିନାହିଁ । ଯେଉଁଥିପାଇଁ ଏଭଳି ସମସ୍ୟା ଉପୁଜିଛି । ଖୁବଶୀଘ୍ର ଆଇନ ଲାଗୁ ହେଲେ ମନ୍ଦିର ନୀତିକାନ୍ତି ସଠିକ ଭାବରେ ପରିଚାଳନା ହେବ ବୋଲି କହିଛନ୍ତି ବ୍ରାହ୍ମଣ ନିଯୋଗ ସମ୍ପାଦକ ।
ବୈଠକରେ ମନ୍ଦିର ଏଜକ୍ୟୁଟିଭି ଅଫିସରଙ୍କ ସମେତ ବ୍ରାହ୍ମଣ ନିଯୋଗ, ବଡୁ ନିଯୋଗ, ପୂଜା ପଣ୍ଡା ନିଯୋଗ ସାମିଲ ଥିଲେ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
