ଭୁବନେଶ୍ବର: ପ୍ରଭୁ ଲିଙ୍ଗରାଜଙ୍କ ଜମି ହଡପ ପ୍ରସଙ୍ଗ । ରାତାରାତି ଜମିପଟ୍ଟା କରି ହସ୍ତାନ୍ତର ହେଉଥିବା ଅଭିଯୋଗ । ମସୁଧା କରି କାମ ମଧ୍ୟ ଆରମ୍ଭ ହୋଇଥିବା ଅଭିଯୋଗ ହୋଇଛି । ଏପଟେ ଜମି ହଡପକୁ ତୀବ୍ର ବିରୋଧ ପରେ ୧୪୪ ଧାରା ଜାରି କଲେ ତହସିଲଦାର ।
ତେବେ ଠାକୁରଙ୍କ ଜମି ବିକ୍ରି ପାଇଁ ସରକାରୀ ବାବୁ ମଧ୍ୟସ୍ତିି ସାଜିଛନ୍ତି ବୋଲି ସାଧାଣରେ ଅଭିଯୋଗ ହୋଇଛି । ଖୋଦ ରାଜଧାନୀର ଛାତି ଉପରେ ଏଭଳି ଚିତ୍ର ଦେଖିବାକୁ ମିଳିଛି । ଭୁବନେଶ୍ବର ବିମାନବନ୍ଦର ନିକଟରେ ଥିବା ଭୀମପୁର ମୌଜାର ଜମି । ଖାତା ନମ୍ବର ୫୪୪/୨୮୬ ପ୍ଲଟ ନମ୍ବର ୮୫୨ /୨୫୭୩ ରେ ଥିବା ମହାପ୍ରଭୁଙ୍କ 228 ଡିସିମିଲ ଜମିର ମୂଲ୍ୟ କୋଟି କୋଟି ଟଙ୍କା ହେବ । ହେଲେ ଲକ୍ଷ୍ମୀସାଗର ଅଞ୍ଚଳର ହୃଶିକେଶ ଦାସ ନାମକ ଜଣେ ବ୍ୟକ୍ତି ଏଥିରୁ ପ୍ରାୟ ୧ ଏକରରୁ ଅଧିକ ଜମିରୁ ଜଣେ ଖଣି ବ୍ୟବସାୟୀଙ୍କ ପତ୍ନୀଙ୍କୁ ବିକ୍ରି କରି ଦେଇଥିବା ଅଭିଯୋଗ ହୋଇଛି ।
ଏଥିପାଇଁ ହୃଶିକେଶ ୬ କୋଟି ୫୦ ଲକ୍ଷ ଟଙ୍କା ନେଇ ଥିବାବେଳେ ରକେଟ ବେଗରେ ଫାଇଲ କାମ ହୋଇ କ୍ରେତାଙ୍କ ନାମରେ ପଟ୍ଟା କରି ଦିଆଯାଇଛି । ତେବେ ଏହାର ତୀବ୍ର ବିରୋଧ ପରେ ପଟ୍ଟାକୁ ବାତିଲ କରିଥିଲେ ମଧ୍ୟ ରେକର୍ଡ ସଂଶୋଧନ ହୋଇନି କି ଲିଙ୍ଗରାଜଙ୍କ ନାମକୁ ଜମି ଆସିନି । ତେବେ କାହା ଚାପରେ ତଦସିଲଦାର ବିବାଦରେ ଥିବା ଜମି ବିକ୍ରି ପରେ ପଟ୍ଟା ପ୍ରସ୍ତୁତ କଲେ ତାକୁ ନେଇ ଉଠିଛି ପ୍ରଶ୍ନ ।
ଏହା ମଧ୍ୟ ପଢନ୍ତୁ:- ମୁଖ୍ୟମନ୍ତ୍ରୀଙ୍କୁ ସୁରଙ୍କ ଅନୁରୋଧ, ପ୍ରଭୁ ଲିଙ୍ଗରାଜ ଜମିକୁ ରକ୍ଷାକର
ସେପଟେ ୨୦୧୬ ମସିହାରେ ପ୍ରଭୁ ଲିଙ୍ଗରାଜଙ୍କ ଏହି ଜମି ହୃଶିକେଶ ଦାସ ଓ ସରସ୍ବତୀ ପାତ୍ରଙ୍କ ନାମକୁ ଚାଲି ଯାଇଥିଲା । ପରେ ଏହି ମାମଲାର ତଦନ୍ତ ହୋଇ ଦାଖଲ କରାଯାଇଥିବା ରିପୋର୍ଟରେ ଏହି ଜମି ଠାକୁରଙ୍କର ବୋଲି ଜଣାପଡିଥିଲା । କେଉଁ ପରିସ୍ଥିତିରେ ମାଲିକାନା ବଦଳିଥିଲେ ତାହାର ତଦନ୍ତ ପାଇଁ ମଧ୍ୟ ସୁପାରିସ କରାଯାଥିଲା । ଏବେ ପଟ୍ଟା ସଶୋଧନ ପାଇଁ କୋର୍ଟରେ ମାମଲା ଚାଲି ଥିବାବେଳେ କେଉଁ ପରିସ୍ଥିତିରେ ଓ କାହା ଚାପରେ ଜମିବିକ୍ରି ହେଲା ତାକୁ ନେଇ ପ୍ରଶ୍ନ ଉଠାଇଛନ୍ତି ବିରୋଧୀ ।
ଭୁବନେଶ୍ବରରୁ ଦେବସ୍ମିତା ରାଉତ, ଇଟିଭି ଭାରତ
