କୋରାପୁଟ: ଆନ୍ଧ୍ର ସୀମାନ୍ତବର୍ତ୍ତୀ କୋରାପୁଟ ଜିଲ୍ଲା କୋଟିଆ ପଞ୍ଚାୟତରେ ଆଜି କେଉଁ ରାଜ୍ୟ ତରଫରୁ ଜାତୀୟ ପତାକା ଉଡିବ, ସେନେଇ ଗତ କିଛି ଦିନ ଧରି ଚାଲିଥିବା ଦ୍ଵନ୍ଦର ଅବସାନ ଘଟିଛି । ଆଜି କୋଟିଆ ସମେତ ଏହି ପଞ୍ଚାୟତର ସମସ୍ତ ଗ୍ରାମରେ ଓଡିଶା ସରକାରଙ୍କ ପକ୍ଷରୁ ଜାତୀୟ ପତାକା ଉତ୍ତୋଳନ କରାଯାଇ ଥିବାବେଳେ ଆନ୍ଧ୍ର ସରକାରଙ୍କ ତରଫରୁ ଫଗୁଣସିନେରୀ, ଫାଟୁସିନେରୀ , ତଳ ସେମ୍ବି , ଉପର ସେମ୍ବି , ନେରେଡିବାଲାସା, ତାଡିବାଲାସା ଓ ଧୂଳିପଦରରେ ଜାତୀୟ ପତାକା ଉତ୍ତୋଳନ ହୋଇଥିଲା ଜଣାପଡ଼ିଛି । କୋଟିଆ ପଞ୍ଚାୟତ ସଦର ମହକୁମାରେ ଓଡିଶା ସରକାରଙ୍କ ପକ୍ଷରୁ ପଟ୍ଟାଙ୍ଗିର ପୂର୍ବତନ ବିଧାୟକ ପ୍ରଫୁଲ୍ଲ ପାଙ୍ଗିଙ୍କ ଅଧ୍ୟକ୍ଷତାରେ ଜାତୀୟ ପତାକା ଉତ୍ତୋଳନ କରାଯାଇଛି ।
ଗତ କିଛିଦିନ ପୂର୍ବେ ଆନ୍ଧ୍ରପ୍ରଦେଶର ଏକ ରାଜନୈତିକ ଦଳ ଜନସତ୍ତାର ସଭାପତିଙ୍କ କୋଟିଆ ଗସ୍ତ ଓ ସ୍ବାଧୀନତା ଦିବସ ପୂର୍ବରୁ ପ୍ରତି ଗାଁରେ ତେଲୁଗୁ ବୋର୍ଡ ଲଗାଇବା ପାଇଁ ଆନ୍ଧ୍ରପ୍ରଦେଶ ସରକାରଙ୍କ ପାଖରେ ଦାବି ଜଣାଇଥିଲେ । ଏହାପରେ କୋଟିଆରେ ଉଭୟ ରାଜ୍ୟ ଜାତୀୟ ପତାକା ଉତ୍ତୋଳନ କରିବାର ସମ୍ଭାବନା ଦେଖାଯାଇଥିଲା । କିନ୍ତୁ କୋରାପୁଟ ଜିଲ୍ଲା ପ୍ରଶାସନର ତତ୍ପରତା ସାମ୍ନାରେ ଆନ୍ଧ୍ର ସରକାରର ସମ୍ଭାବ୍ୟ ଚକ୍ରାନ୍ତ ପଣ୍ଡ ହୋଇଯାଇଛି କହିଲେ ଅତ୍ୟୁକ୍ତି ହେବ ନାହିଁ ।
କୋରାପୁଟ ଜିଲ୍ଲା ପ୍ରଶାସନ ତରଫରୁ ଗାଁ ଗାଁରେ ଓଡ଼ିଆ ଫଳକ ଲାଗିବା ଓ କୋଟିଆରେ ଜାକଜମକରେ ସ୍ବାଧୀନତା ଦିବସ ପାଳନ ସହ ସମଗ୍ର ପଞ୍ଚାୟତରେ ପ୍ରଶାସନିକ ଅଧିକାରୀଙ୍କ ଉପସ୍ଥିତିରେ ଜାତୀୟ ପତାକା ଉତ୍ତୋଳନ ହେବା ଓଡିଶାବାସୀଙ୍କୁ ଭଲ ପାଉଥିବା କୋଟିଆବାସୀଙ୍କୁ ଆନନ୍ଦିତ ଓ ତାଙ୍କ ମନୋବଳ ସୁଦୃଢ କରିଛି । କୋରାପୁଟରେ ଅନୁଷ୍ଠିତ ଜିଲ୍ଲାସ୍ତରୀୟ ସ୍ବାଧୀନତା ଦିବସ ପାଳନ ଅବସରରେ ମହିଳା ଓ ଶିଶୁ ବିକାଶ ମନ୍ତ୍ରୀ ଟୁକୁନି ସାହୁ ଜାତୀୟ ପତାକା ଉତ୍ତୋଳନ କରି ସୀମିତ ସଂଖ୍ୟକ ଟ୍ରୁପ ଦ୍ବାରା ପ୍ରଦର୍ଶିତ ପରେଡ଼ର ଅଭିବାଦନ ଗ୍ରହଣ କରିଥିଲେ ।
କୋରାପୁଟରୁ ସିଏଚ ଶାନ୍ତାକାର, ଇଟିଭି ଭାରତ
