ଭୁବନେଶ୍ବର: ପୂର୍ବତନ ମନ୍ତ୍ରୀ ତଥା ପିପିଲି ବିଧାୟକ ପ୍ରଦୀପ ମହାରଥୀଙ୍କ ନାଁରେ ଜମି ହଡପ ଅଭିଯୋଗ । ଏପରି ସାଙ୍ଘାତିକ ଅଭିଯୋଗ ଆଣିଛି ରାଜ୍ୟ ବଜେପି । ମହାରଥୀ ତାଙ୍କ ହୁକେଇପୁର ଫାର୍ମହାଉସ ନାଁରେ କରିଛନ୍ତି ଶହେ କୋଟିରୁ ଉର୍ଦ୍ଧ୍ଵ ଟଙ୍କାର ଜମି । ହାଇକୋର୍ଟଙ୍କ ନିର୍ଦେଶ ପରେ ମଧ୍ୟ 2016 ପରଠାରୁ ତାଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ କରି ନାହାଁନ୍ତି ଜିଲ୍ଲାପାଳ ।
କେନାଲ ପଟକୁ ଜୋର ଜବରଦସ୍ତି ଜମି ମାଡି ବସିଛନ୍ତି ମହାରଥୀ । ମହାରଥୀଙ୍କ ବିରୋଧରେ ସ୍ଥାନୀୟ ନେତା କେଦାର ସାମନ୍ତରାୟ ମଧ୍ୟ ପୂର୍ବରୁ କୋର୍ଟରେ ଅଭିଯୋଗ କରିଥିଲେ । କିନ୍ତୁ ଏବେ 3 ଶହ କୋଟି ଟଙ୍କାର ଗୋଚର ଜମି ବିବାଦରେ ଉଭୟ ମହାରଥୀ ଓ କେଦାରଙ୍କ ମଧ୍ୟରେ ଛିଣ୍ଡାତୁଟା ହୋଇଯାଇଥିବା ଅଭିଯୋଗ କରିଛି ବିଜେପି ।
ସୂଚନା ଅନୁସାରେ 100ରୁ ଊର୍ଦ୍ଧ୍ବ କୋଟି ଟଙ୍କାର ସରକାରୀ ଜମି ହଡପ କରିଛନ୍ତି ପ୍ରଦୀପ ମହାରଥୀ । ଚକନାଳି, ଅନାବାଦୀ, କେନାଲ ରାସ୍ତାକୁ ନିଜ ଫାର୍ମ ହାଉସ ସହ ସେ ମିଶାଇଛନ୍ତି । 2015ରେ ଯୁଧିଷ୍ଠିର ସାମନ୍ତ ରାୟ ଏନେଇ ପୂର୍ବରୁ ଏକ ମାମଲା ହାଇକୋର୍ଟରେ ରୁଜୁ କରିଥିଲେ । ଜ଼ିଲ୍ଲାପାଳ ନିଷ୍ପତି ନେବାକୁ କୋଟ ନିର୍ଦ୍ଦେଶ ଦେଇଥିଲେ । ହେଲେ ଜ଼ିଲ୍ଲାପାଳ ଏପର୍ଯ୍ୟନ୍ତ କିଛି ନିଷ୍ପତି ନେଇ ନାହାଁନ୍ତି । କାରଣ ସେ ମଧ୍ୟ୍ୟ 56 ଏକରରୁ ଊର୍ଦ୍ଧ୍ବ ଗୋଚର ଜମିକୁ ହଡପ କରିଛନ୍ତି ବୋଲି ଅଭିଯୋଗ କରିଛନ୍ତି ।
ସେପଟେ ପିପିଲି ତହସିଲରେ ନିଆଁ ଲାଗିଥିବା ଦର୍ଶାଇ ବହୁ ଗୁରୁତ୍ବପୂର୍ଣ୍ଣ କାଗଜପତ୍ର ହେରଫେର କରିଛନ୍ତି ତତ୍କାଳୀନ ତହସିଲଦାର । ଗୋଟିଏ ପଟେ 5T ଅନ୍ୟପଟେ ଶାସକ ଦଳର ବିଧାୟକ ଜମି ଜବର ଦଖଲ କରୁଛନ୍ତି । କେନାଲରେ ପାଣି ଯାଉନି, ଗାଈ ଗୋରୁ ଚରିବାକୁ ସେ ଅଞ୍ଚଳରେ ଜମିନାହିଁ ବୋଲି ଅଭିଯୋଗ ଉଠାଇ କହିଛନ୍ତି ଗୋଲକ ମହାପାତ୍ର । ଏହା ସହ ତୁରନ୍ତ ଜମି ସରକାରୀ ଖାତାକୁ ଫେରାଇବାର ବ୍ୟବସ୍ଥା ହେଉ ବୋଲି ମଧ୍ୟ ଦାବି କରିଛନ୍ତି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
