ଭୁବନେଶ୍ବର: ନୂଆ ବ୍ୟବସ୍ଥାକୁ ଆପଣାଇ ନେଲେଣୀ ଚାଷୀ । ଆଉ ଟୋକନ ବ୍ୟବସ୍ଥା ଚାଷୀଙ୍କ ପାଇଁ ଅଧିକ ସହଜ ସାବ୍ୟସ୍ତ ହୋଇଛି । ଯାହାର ପ୍ରଭାବ ଦେଖିବାକୁ ମିଳିଛି । ରାଜ୍ୟ ସରକାରଙ୍କ ଦ୍ବାରା ୨୦୧୯-୨୦ ବର୍ଷ ନିମନ୍ତେ ଖରିଫ ଧାନ ସଂଗ୍ରହ କାର୍ଯ୍ୟକ୍ରମରେ ଆଜି ସୁଦ୍ଧା ୧ ଲକ୍ଷ ୪୧ ହଜାର ୫୪୦ ଜଣ ଚାଷୀଙ୍କ ଠାରୁ ଧାନ ସଂଗ୍ରହ ହୋଇଛି। ବିଭିନ୍ନ ଧାନ ସଂଗ୍ରହ କେନ୍ଦ୍ର ଜରିଆରେ ମୋଟ ୯୬ ଲକ୍ଷ ୧୧ ହଜାର ୨୪ କ୍ବିଣ୍ଟାଲ ଧାନ ବିକ୍ରି କରିଛନ୍ତି।
ଗତବର୍ଷ ତୁଳନାରେ ଧାନସଂଗ୍ରହ ୪୩ ପ୍ରତିଶତ ଅଧିକ ହୋଇଛି। ଧାନ ସଂଗ୍ରହ ପାଇଁ ଅନ୍ଲାଇନ୍ରେ ପଞ୍ଜୀକୃତ ଚାଷୀଙ୍କୁ ପି-ପାସ୍ ଜରିଆରେ ଆଗୁଆ ଟୋକନ୍ ପ୍ରଦାନ କରାଯାଉଛି। ବର୍ତ୍ତମାନ ସୁଦ୍ଧା ୨୭ଟି ଜିଲ୍ଲାର ଚାଷୀଙ୍କୁ ୩ ଲକ୍ଷ ୭୭ ହଜାର ୨୯୮ଟି ଟୋକନ୍ ପ୍ରଦାନ କରାଯାଇଛି।
ଚଳିତ ଖରିଫ୍ ଧାନସଂଗ୍ରହ କାର୍ଯ୍ୟକ୍ରମରେ ଅଧିକ ଧାନସଂଗ୍ରହ ହୋଇଥିବା ଜିଲ୍ଲା ମଧ୍ୟରେ ବରଗଡ଼ ଜିଲ୍ଲାରେ ୫୨ ହଜାର ୭୨୭ ଜଣ ଚାଷୀ ମୋଟ ୩୪ ଲକ୍ଷ ୪୧ ହଜାର ୯୪୦ କ୍ବିଣ୍ଟାଲ ଧାନ ବିକ୍ରି କରିଛନ୍ତି। ସେହିପରି ବଲାଙ୍ଗୀରର ୧୦ ହଜାର ୫୪୭ ଜଣ ଚାଷୀ ୭ ଲକ୍ଷ ୫୮ ହଜାର ୨୯ କ୍ବିଣ୍ଟାଲ, କଳାହାଣ୍ଡିର ୧୯ ହଜାର ୩୨୪ ଜଣ ଚାଷୀ ୧୩ ଲକ୍ଷ ୩୮ ହଜାର ୨୭୫ କ୍ବିଣ୍ଟାଲ, ମାଲକାନଗିରିର ୧୦ ହଜାର ୨୮୩ ଜଣ ଚାଷୀ ୪ ଲକ୍ଷ ୩୦ ହଜାର ୭୯୦ କ୍ବିଣ୍ଟାଲ, କୋରାପୁଟର ୬୭୭୧ ଜଣ ଚାଷୀ ୫ ଲକ୍ଷ ୩୩ ହଜାର ୪୪୨ କ୍ବିଣ୍ଟାଲ, ନବରଙ୍ଗପୁରର ୩୮୫୩ ଜଣ ଚାଷୀ ୩ ଲକ୍ଷ ୧୬ ହଜାର ୧୦୬ କ୍ବିଣ୍ଟାଲ, ନୂଆପଡ଼ାର ୬୮୫୬ ଜଣ ଚାଷୀ ୩ ଲକ୍ଷ ୪୫ ହଜାର ୩୦୭ କ୍ବିଣ୍ଟାଲ, ସମ୍ବଲପୁରର ୧୨ ହଜାର ୩୫୫ ଜଣ ଚାଷୀ ୧୦ ଲକ୍ଷ ୯ ହଜାର ୧୮୮ କ୍ବିଣ୍ଟାଲ, ସୁବର୍ଣ୍ଣପୁରର ୧୧ ହଜାର ୨୪୨ ଜଣ ଚାଷୀ ୯ ଲକ୍ଷ ୨୭ ହଜାର ୬୩୬ କ୍ବିଣ୍ଟାଲ ଓ ସୁନ୍ଦରଗଡ଼ ଜିଲ୍ଲାର ୨୨୫୮ ଜଣ ଚାଷୀ ୧ ଲକ୍ଷ ୫୦ ହଜାର ୩୭୩ କ୍ବିଣ୍ଟାଲ ଧାନ ବିକ୍ରି କରିଛନ୍ତି।
ଭୁବନେଶ୍ବରରୁ ଜ୍ଞାନଦର୍ଶୀ ସାହୁ, ଇଟିଭି ଭାରତ
