କଳାହାଣ୍ଡି: ଗରିବ ଗଳିରୁ ଦିଲ୍ଲୀ ଜେଏନୟୁ ଦଖଲ ଲକ୍ଷ୍ୟ । ଦିନେ ଏନଆରଜିଏସରେ ଶ୍ରମିକ ଭାବେ କାମ କରିଥିବା ଓଡିଆ ପୁଅ ଏବେ ଦିଲ୍ଲୀ ଜେଏନୟୁରେ ଛାତ୍ର ସଂସଦ ନିର୍ବାଚନ ଲଢୁଛି । ସଭାପତି ପ୍ରାର୍ଥୀ ଭାବେ ସେ ଏବେ ଯେତେ ଚର୍ଚ୍ଚିତ ତା'ଠାରୁ ଅଧିକ ଚର୍ଚ୍ଚାରେ ନିଜ ଜୀବନରେ ସଂଗ୍ରାମକୁ ନେଇ । ଆମେ କହୁଛୁ କଳାହାଣ୍ଡି ଜିଲ୍ଲା କର୍ଲାମୁଣ୍ଡା ବ୍ଲକ ପୌରକେଲା ଗାଁର ଜିତେନ୍ଦ୍ର ସୁନାଙ୍କ କଥା ।
ପ୍ରାଥମିକ ଶିକ୍ଷା ଆରମ୍ଭରୁ ହିଁ ଦାରିଦ୍ର୍ୟ କବଳରେ ପେଷି ହୋଇଥିଲା ଜିତୁଙ୍କ ଜୀବନ ସଂଗ୍ରାମ । କାରଣ ବାପା ଲକ୍ଷ୍ମଣ ସୁନା ପେସାରେ ଜଣେ କୃଷି ଶ୍ରମିକ । ଆଉ ପରିବାର କହିଲେ ବାପା, ମା, ତିନି ଭଉଣୀ ଓ ଚାରି ଭାଇ । ଏମିତି ସ୍ଥିତିରେ ବାପା ଲକ୍ଷ୍ମଣଙ୍କ ରୋଜଗାର ସମୁଦ୍ରକୁ ଶଙ୍ଖେ ପାଣି ସଦୃଶ ।
ଆଉ ବାପାଙ୍କ ଦାୟିତ୍ବଭାର କମ କରିବାକୁ ଜିତେନ୍ଦ୍ରଙ୍କ ମା ପରିବା ବିକୁଥିଲେ । ହେଲେ ଦଇବ ତାହା ମଧ୍ୟ ଛଡାଇ ନେଇଥିଲା । ସେ ଅଷ୍ଟମ ଶ୍ରେଣୀରେ ପାଠ ପଢୁଥିବାବେଳେ ତାଙ୍କ ମା'ଙ୍କ ବିୟୋଗ ହୋଇଥିଲା । ପରିବାର ବୋଝ ମୁଣ୍ଡେଇବାକୁ ସେ ସ୍କୁଲ ଯିବା ସହ ଗାଁରେ କୃଷି ଶ୍ରମିକ ଭାବେ କାମ କରିବାକୁ ବାଧ୍ୟ ହୋଇଥିଲେ । ହେଲେ ପାଠ ପଢିବାକୁ ମନରେ ଥିଲା ଅନେକ ଦୁର୍ବଳତା ।
ଯେନତେନ କରି ଜିତେନ୍ଦ୍ର ମାଟ୍ରିକ ପର୍ଯ୍ୟନ୍ତ ପାଠ ପଢିଥିଲେ । ହେଲେ ଦାରିଦ୍ରର ତାଡନା ତାଙ୍କ ପାଠପଢାରେ ଡୋରି ଲଗାଇଥିଲା । ପରିବାର ଚଳାଇବାକୁ ସେ ଦିଲ୍ଲୀର ଇନ୍ଦ୍ରପ୍ରସ୍ତ ଗ୍ୟାସ ଲିମିଟେଡରେ ହେଲପର ଭାବେ କାମ କରୁଥିଲେ । ସେଠାରୁ କିଛି ଟଙ୍କା ସଂଗ୍ରହ କରି ଗାଁ କଲେଜରେ ସ୍ନାତକ ପଢା ଶେଷ କରିଥିଲେ । ଏହାପରେ ସେ ନାଗପୁର ଯାଇ ଆମ୍ବେଦକରିଜିମ୍ ଓ ବୁଦ୍ଧିଜିମ୍ ଉପରେ ରିସର୍ଚ୍ଚ କରିଥିଲେ । ପରେ 2013ରେ ଜେଏନୟୁରେ ଇତିହାସ ବିଭାଗରେ ଭର୍ତ୍ତି ହୋଇଥିଲେ । ଯେଉଁଥିରେ ଏମଏ, ଏମଫିଲଓ ଏବେ ପିଏଚଡି କରୁଛନ୍ତି ଜିତେନ୍ଦ୍ର ।
ଆଉ ଏବେ ସେ ଜବାହାରଲାଲ ନେହେରୁ ବିଶ୍ବ ବିଦ୍ୟାଳୟର ଛାତ୍ର ସଂସଦ ନିର୍ବାଚନର ସଭାପତି ପ୍ରାର୍ଥୀ । ଏନଆରଜିଏସ ଶ୍ରମିକରୁ ଜେଏନୟୁର ଛାତ୍ର ସଂସଦ ପ୍ରାର୍ଥୀ, ଜିତେନ୍ଦ୍ରଙ୍କ ଏହି ସଂଘର୍ଷମୟ କାହାଣୀ ନିଶ୍ଚିତ ଭାବେ ଅନ୍ୟମାନଙ୍କ ପାଇଁ ପ୍ରେରଣା ସାଜିବ ।
କଳାହାଣ୍ଡିରୁ ଅଜିତ ସିଂ, ଇଟିଭି ଭାରତ
