ଭୁବନେଶ୍ବର: ଭିଏଲଡବ୍ଲ୍ୟୁ ସ୍ମିତାରାଣୀ ବିଶ୍ବାଳ ମୃତ୍ୟୁ ମାମଲାରେ ଅଭିଯୁକ୍ତକୁ ଗିରଫ ପରେ ଯାଜପୁର ଏସପି ଚରଣ ସିଂ ମୀନାଙ୍କ ପରବର୍ତ୍ତୀ ସାମ୍ବାଦିକ ସମ୍ମିଳନୀକୁ ନେଇ ବର୍ଷିଛି ବିଜେପି ।
ଶନିବାର ଦଳୀୟ ରାଜ୍ୟ କାର୍ଯ୍ୟାଳୟରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଜେପି ରାଜ୍ୟ ସମ୍ପାଦିକା ଲେଖାଶ୍ରୀ ସାମନ୍ତ ସିଂହାର ଯାଜପୁର ପୋଲିସ ଉପରେ ଜୋରଦାର ସମାଲୋଚନା କରିଛନ୍ତି । ଏସପିଙ୍କୁ ସିଧା ସିଧା ନିଶାନା କରି ଲେଖାଶ୍ରୀ କହିଛନ୍ତି ଯାଜପୁର ଏସପି କଣ ଅଭିଯୁକ୍ତର ମୁଖପାତ୍ର କି ବୋଲି ପ୍ରଶ୍ନ ଉଠାଇଛନ୍ତି ? ଜଣେ ମହିଳା ସରକାରୀ ଅଧିକାରୀଙ୍କୁ ଗଣଦୁଷ୍କର୍ମ ପରେ ହତ୍ୟା କରିଥିବା ଅଭିଯୁକ୍ତଙ୍କୁ ସୁରକ୍ଷା ଦେବାପାଇଁ ଉଦ୍ୟମ କରିବା କଣ ପୋଲିସର ଭୂମିକା କି ବୋଲି ପ୍ରଶ୍ନ କରିଛନ୍ତି ।
ଲେଖାଶ୍ରୀ ପଚାରିଛନ୍ତି ଘଟଣାରେ ଅନ୍ୟ ଅଭିଯୁକ୍ତଙ୍କୁ କାହିଁକି ଛାଡିଦେଲା ? ଯେଉଁ ଗେଷ୍ଟ ହାଉସରେ ସ୍ମିତାରାଣୀଙ୍କୁ ହତ୍ୟା କରାଯାଇଛି ସେହି ଗେଷ୍ଟ ହାଉସର ସିସିଟିଭି କାହିଁକି ତଦନ୍ତରେ ସାମିଲ କରାଯାଇନି ? ଉକ୍ତ ଗେଷ୍ଟ ହାଉସକୁ ସିଲ କଣ ପାଇଁ ପୋଲିସ କରିନି ? ଯେଉଁ ସ୍କର୍ପିଓରେ ସ୍ମିତାରାଣୀଙ୍କୁ ଡାକ୍ତରଖାନା ନିଆଯାଇଥିଲା ସେ ଗାଡି କାହାର ? ସେ ଗାଡି ଏବେ କୋଉଁଠି । ଜବତ କଣ ପାଇଁ ହୋଇନାହିଁ । ଅନ୍ୟ 4ଜଣ ଅଭିଯୁକ୍ତ ତଥା ବିଜେଡିର ସମିତି ସଭ୍ୟ ଥିବା 2ଜଣ ଓ ଜଣେ ଜିଲ୍ଲା ପରିଷଦ ସଭ୍ୟଙ୍କର ଏହି ହତ୍ୟାକାଣ୍ଡରେ ଭୂମିକା କଣ ବୋଲି ଦଳ ପଚାରିଛି । ଏବଂ ବିଜେପି ପଚାରିଥିବା ମୌଳିକ ପ୍ରଶ୍ନର ଉତ୍ତର ନଦେଇ ଏସପି ଜଣେ ମୃତା ମହିଳାଙ୍କ ଚରିତ୍ର ସଂହାର କରିଛନ୍ତି ବୋଲି ଅଭିଯୋଗ କରିଛନ୍ତି ।
ଯାଜପୁର ଏସପିଙ୍କୁ ଆହୁରି ଆଟାକ କରି କହିଛନ୍ତି ଏସପିଙ୍କ ଯଦି ରାଜନୀତି କରିବାରେ ଅଛି ୟୁନିଫର୍ମ ଓହ୍ଲାଇ ରାଜନୀତିରେ ସାମିଲ ହୁଅନ୍ତୁ । ଶାସକ ଦଳର ପ୍ରଭାବରେ ପୋଲିସ ଏହି ସମ୍ବେଦନଶୀଳ ଘଟଣାକୁ ରଫାଦଫା କରିବାକୁ ଯୋଜନା କରୁଛି । ଏହାସହ ଲେଖାଶ୍ରୀ ଚେତାବନୀ ଦେଇ କହିଛନ୍ତି ଯଦି ସ୍ମିତାରାଣୀଙ୍କ ପରିବାରକୁ ନ୍ୟାୟ ନମିଳେ ବିଜେପି ଭୟଙ୍କର ଆନ୍ଦୋଳନ କରିବ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
