ଭୁବନେଶ୍ୱର: ରାଜ୍ୟରେ ବଢୁଛି ସାଇବର ଅପରାଧ ମାମଲା । 2019 ମସିହାରେ 1475 ମାମଲା ରୁଜୁ ହୋଇଥିବା ବେଳେ 2020ରେ ଏହା 1931କୁ ବୃଦ୍ଧି ପାଇଛି । ଏନେଇ ଗୃହରେ ବିଧାୟକ ସୌମ୍ୟ ରଞ୍ଜନ ପଟ୍ଟନାୟକଙ୍କ ପ୍ରଶ୍ନରେ ଉତ୍ତର ରଖିଛନ୍ତି ବିଭାଗୀୟ ମନ୍ତ୍ରୀ ଦିବ୍ୟଶଙ୍କର ମିଶ୍ର ।
2006 ଅକ୍ଟୋବର 2ରୁ ରାଜ୍ୟର ବିଭିନ୍ନ ସ୍ଥାନରେ ସାଇବର ପୋଲିସ ଷ୍ଟେସନ ଖୋଲିଛି । ବ୍ରହ୍ମପୁର,ସମ୍ବଲପୁର ଓ ରାଉରକେଲାରେ 3ଟି ସାଇବର ଥାନା ଖୋଲାଯାଇଛି । ଆଗାମୀ ଦିନରେ ପ୍ରତ୍ୟେକ ଜିଲ୍ଲାରେ ସାଇବର ଥାନା ଖୋଲିବା ପାଇଁ ସରକାର ଯୋଜନା ରଖିଛନ୍ତି । ସେହିପରି ବର୍ତ୍ତମାନ ସମୟରେ ଘଟୁଥିବା ବିଭିନ୍ନ ସାଇବର ଅପରାଧର ସଠିକ ଓ ପାରଦର୍ଶିତା ତଦନ୍ତ ପାଇଁ ଅଧିକାରୀମାନଙ୍କୁ ଉପଯୁକ୍ତ ତାଲିମ ଓ ଭିତ୍ତିଭୂମି ସରକାର ଯୋଗାଇ ଦେଇଛନ୍ତି ।
ରାଜ୍ୟରେ ଚଳିତ ଆର୍ଥିକ ବର୍ଷରେ କେତୋଟି ବ୍ୟାଙ୍କ ଲୁଟ୍, ଜିଏସଟି ଠକେଇ, ଏଟିଏମ୍ ଲୁଟ୍ ହୋଇଛି ତାହା ପ୍ରଶ୍ନ କରିଛନ୍ତି ବିଧାୟକ ଭବାନୀ ଶଙ୍କର ଭୋଇ । ଏହାସହ ରାଜ୍ୟରେ କେତୋଟି ହତ୍ୟା, ଦୁଷ୍କର୍ମ ଭଳି ଜଘନ୍ୟ କାଣ୍ଡ କେଉଁ କେଉଁ ଜାଗାରେ ଘଟିଛି ଏହା ମଧ୍ୟ ପ୍ରଶ୍ନ କରିଛନ୍ତି ।
ଦିବ୍ୟ ଶଙ୍କର ମିଶ୍ର ଦେଇଥିବା ସୂଚନା ଅନୁଯାୟୀ, 2020 ମସିହାରେ ରାଜ୍ୟରେ 5 ଟି ବ୍ୟାଙ୍କ ଲୁଟ ମାମଲା ରୁଜୁ କରାଯାଇଛି । 17 ଟି ଏଟିଏମ ଲୁଟ, 1931 ସାଇବର ଠକେଇ ମାମଲା ରୁଜୁ ହୋଇଛି । ସମସ୍ତ ସାଇବର ଠକେଇ ମାମଲାରେ ଲୁଟ ହୋଇଥିବା ଟଙ୍କାର ପରିମାଣ 35,07,20,135 ଟଙ୍କା ଆଦାୟ ହୋଇଛି ।
ରାଜ୍ୟରେ ଲୁଟ, ଛିନତାଇ, ହତ୍ୟାକାଣ୍ଡ ଏବଂ ଦୁଷ୍କର୍ମ ମାମଲାର ତଥ୍ୟ ସଂଗ୍ରହ କରାଯାଉଛି । ସେହିପରି ଜିଏସଟି ଠକେଇ ସମ୍ପର୍କିତ ତଥ୍ୟ ଏହି ବିଭାଗରେ ଉପଲବ୍ଧ ନାହିଁ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
