ଭୁବନେଶ୍ବର: ଡ୍ରଗ୍ସ ମାଫିଆଙ୍କ ଠାରୁ ବନ୍ଧୁକ ଜବତ । ଭୁବନେଶ୍ବରସ୍ଥିତ ଭରତପୁର ଥାନା ଅଞ୍ଚଳରୁ ଜବତ କଲା ପୋଲିସ । ଏଥିସହ ବ୍ରାଉନସୁଗାର ବେପାର ଅଭିଯୋଗରେ ଜଣେ ଯୁବକଙ୍କୁ ଗିରଫ କରିଛି ପୋଲିସ ।
ଗିରଫ ଅଭିଯୁକ୍ତ ଜଣକ ହେଉଛନ୍ତି ଭାବଗ୍ରାହୀ ସାହୁ । ତା ନିକଟରୁ ୭ ଲକ୍ଷ ଟଙ୍କାର ୭୦ ଗ୍ରାମ ବ୍ରାଉନସୁଗାର ସହ ଦେଶୀ ବନ୍ଧୁକ ଜବତ କରିଛି ପୋଲିସ । ସେହିପରି ଭାବଗ୍ରାହୀ ଠାରୁ ୫ ରାଉଣ୍ଡ ଗୁଳି ମଧ୍ୟ ଜବତ ହୋଇଛି । ତେବେ ବନ୍ଧୁକ ଧରି ବ୍ରାଉନସୁଗାର ବେପାରୀ ପୋଲିସକୁ ଖୋଲା ଚାଲେଞ୍ଜ ଦେଇ ବେପାର କରୁଛନ୍ତି । ଦିଲ୍ଲୀ ବମ୍ବେ ଭଳି ଏବେ ବ୍ରାଉନସୁଗାର ବେପାରୀ ନିଜ ସୁରକ୍ଷା ପାଇଁ ବନ୍ଧୁକ ରଖୁଛନ୍ତି ।
ଅର୍ଥାତ ସହରରେ ଏବେ ଏଭଳି ପରିସ୍ଥିତି ଉପୁଜିଲାଣି ଯେ, ପୋଲିସର ଉପସ୍ଥିତିରେ ବନ୍ଧୁକ ଧରି ନିର୍ଭୟରେ ବ୍ରାଉନସୁଗାର ବେପାର କରୁଛନ୍ତି । କାରଣ ଜନବସତି ଅଞ୍ଚଳରେ ସେମାନେ କେଉଁ ମୁହୂର୍ତ୍ତରେ କେତେବେଳେ ବି ଉପୁଜାଇପାରନ୍ତି ଅପ୍ରୀତିକର ପରିସ୍ଥିତି । ସେନେଇ ଜଗି ରଖି ଚତୁରତାର ସହ ପୋଲିସ ଏଭଳି ବ୍ରାଉନସୁଗାର ମାଫିଆଙ୍କୁ ଧରୁଛି ।
ଭୁବନେଶ୍ବରରୁ ତାପସ କୁମାର ପରିଡା, ଇଟିଭି ଭାରତ
