ଭୁବନେଶ୍ୱର: ମନ୍ଦିର ମାଳିନୀ ସହରରେ ହଠାତ ଅଗ୍ନିକାଣ୍ଡ । ଭୁବନେଶ୍ବର ରେଲୱେ ଷ୍ଟେସନ ନିକଟରେ ଥିବା ରିଲାୟନ୍ସ ମଲ ପଛରେ ଥିବା ହନୁମାନ ମନ୍ଦିରରେ ହଠାତ ନିଆଁ ଲାଗି ଯାଇଥିବା ଦେଖିବାକୁ ମିଳିଛି । ଯାହାକି ଆଖି ପିଛୁଳାକେ ବେଶ ଭୟଙ୍କର ରୁପ ଧାରଣ କରିଥିଲେ ସୁଦ୍ଧା ଅଳ୍ପକେ ବର୍ତ୍ତିଥିଲେ ପାଖ ବ୍ୟବସାୟୀ ।
ସୂଚନା ଅନୁସାରେ ହନୁମାନ ମନ୍ଦିରରେ ପୂଜା କରୁଥିବା ପୂଜକ ମନ୍ଦିରକୁ ଲାଗି ଏକ ଘରେ ରୁହନ୍ତି । ରାତିରେ ରୋଷଇ ପାଇଁ ଗ୍ୟାସ ଲଗାଉ ଲଗାଉ ହଠାତ ଚୁଲା ସହିତ ସେହି ଘରେ ଥିବା ଲୁଗାପଟାରେ ମଧ୍ୟ ନିଆଁ ଲାଗି ଯାଇଥିଲା । ତେବେ ଉପସ୍ଥିତ ବୁଦ୍ଧି ଖଟାଇ ନନା ଗ୍ୟାସଟିକୁ ଘର ବାହାରକୁ କାଢି ଦେଇଥିଲେ । କିନ୍ତୁ ନିଆଁକୁ ଆୟତ୍ତ କରିବାକୁ ଚେଷ୍ଟା କରିଥିଲେ ସୁଧା ସଫଳ ହୋଇ ନଥିଲେ।
ଫଳରେ ଗ୍ୟାସ ସିଲିଣ୍ଡରଟି ହନୁମାନ ମନ୍ଦିର ସମ୍ମୁଖରେ ହୁତ ହୁତ ହୋଇ କିଛି ସମୟ ଜଳିଲା । କିନ୍ତୁ ଅଳ୍ପ କିଛି ସମୟ ପରେ ଏହା ଲିଭି ଯାଇଥିଲା । ଯାହାକି ଏକ ବଡ଼ ଧରଣର ଦୁର୍ଘଟଣା ହେବା ପୂର୍ବରୁ ପାଖରେ ଥିବା ବ୍ୟବସାୟୀ ମାନେ ଅଳ୍ପକେ ବର୍ତ୍ତି ଯାଇଥିଲେ ।
ପରେ ପରେ ଘଟଣା ସମ୍ପର୍କରେ ଅଗ୍ନିଶମ ବିଭାଗ ସୂଚନା ପାଇ ବିଭାଗର କର୍ମଚାରୀମାନେ ପହଞ୍ଚି ଟାଙ୍କିଟିକୁ ପ୍ରଥମ ମହଲାରେ ଥିବା ମନ୍ଦିରରୁ ତଳକୁ ଆଣି ତାର ଗ୍ୟାସ ଲିକ ବାଟକୁ ବନ୍ଦ କରିଥିଲେ । ଯେଉଁଥିରେ ଆହୁରି ଗ୍ୟାସ ଥିବା ସେମାନେ କହିଛନ୍ତି । ତେବେ ଯଦି ଟାଙ୍କିଟି ଫାଟି ଥାନ୍ତା ନିଶ୍ଚିତ ଭାବରେ ଏକ ବଡ଼ ଦୁର୍ଘଟଣାକୁ କେହି ରୋକି ପାରି ନଥାନ୍ତେ ବୋଲି ବିଭାଗୀୟ କର୍ମଚାରୀମାନେ କହିଛନ୍ତି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
