ଭୁବନେଶ୍ବର: ଭୁଷୁଡିବାରେ ଲାଗିଛି ରାଜ୍ୟର ଶିକ୍ଷା ବ୍ୟବସ୍ଥା । ଅନ୍ଧକାରରେ ଦେଶର କୁନି କୁନି ଭବିଷ୍ୟତଙ୍କ ଭାଗ୍ୟ । ଦୀର୍ଘ 8 ମାସରୁ ଉର୍ଦ୍ଧ୍ବ ଦିନ ଧରି ସ୍କୁଲରେ ଝୁଲୁଛି ତାଲା, ଯାହାକୁ ନେଇ ଚିନ୍ତାରେ ଛାତ୍ରଛାତ୍ରୀ ଓ ଅଭିଭାବକ । ମହାମାରୀ କୋରୋନା ଯୋଗୁଁ ସରକାର ଆରମ୍ଭ କରିଥିଲେ ଅନଲାଇନ ଶିକ୍ଷାଦାନ ବ୍ୟବସ୍ଥା । ହେଲେ ଆଇଟି କ୍ଷେତ୍ରରେ ଭିତ୍ତିଭୂମିର ଅଭାବ ଅନେକ ଛାତ୍ରଛାତ୍ରୀଙ୍କୁ ଶିକ୍ଷା ଗ୍ରହଣରୁ କରିଛି ବଞ୍ଚିତ । ଏଭଳିସ୍ଥିତିରେ ପ୍ରଶ୍ନ ଉଠୁଛି କଣ ଆଗାମୀ ଦିନରେ ଅନ୍ଧକାର ମଧ୍ୟକୁ ଠେଲି ହୋଇଯିବ କି ବିଦ୍ୟାର୍ଥୀଙ୍କ ଭବିଷ୍ୟତ?
ସ୍କୁଲରେ ତାଲା ଝୁଲାଇ ଶୋଇଛନ୍ତି ସରକାର, କଣ ହେବ ଶିକ୍ଷା ବ୍ୟବସ୍ଥାର ଭବିଷ୍ୟତ? ଏହାକୁ ନେଇ ଶିକ୍ଷାବିତ ଅସିଲ ତିୱାରି କୁହନ୍ତି ଯେ କରୋନା ପରେ ରାଜ୍ୟରେ ଶିକ୍ଷାବ୍ୟବସ୍ଥା ସମ୍ପୂର୍ଣ୍ଣ ରୂପେ ଭୁଶୁଡି ଯାଇଛି। କାରଣ ସରକାର ଯେତେବେଳେ ଅନଲାଇନ ଶିକ୍ଷାର ବିକଳ୍ପ ଆରମ୍ଭ କରିଥିଲେ ସେ ସମୟରେ ସମ୍ପୂର୍ଣ୍ଣ ରାଜ୍ୟରେ ବ୍ୟବସ୍ଥାକୁ ପରଖିବା ଆବଶ୍ୟକ। ଦେଖିବାକୁ ମିଳୁଛି ଗ୍ରାମାଞ୍ଚଳରେ ଅନେକ ପିଲା ଅନଲାଇନ ଶିକ୍ଷାରୁ ବଞ୍ଚିତ ରହିଛନ୍ତି । ଅନଲାଇନ ଶିକ୍ଷା ପାଇଁ ରାଜ୍ୟ ସରକାର ରାଜ୍ୟର ସମସ୍ତ ଅଞ୍ଚଳରେ ଭିତ୍ତିଭୂମି ଓ ଆଇଟିର ପ୍ରସାର କରିବା ଆବଶ୍ୟକତା ରହିଛି । କୋରୋନା ସମୟରେ ସ୍କୁଲ କଲେଜ ବନ୍ଦ ରହିଥିବା ବେଳେ ଗାଁରେ ରହିଥିବା ଅଙ୍ଗନବାଡି କେନ୍ଦ୍ର ଓ ପଞ୍ଚାୟତ ସ୍ତରରେ ଏକ ଟିଭି ଚ୍ୟାନେଲ ମାଧ୍ୟମରେ ସମସ୍ତ ଶ୍ରେଣୀର ଶିକ୍ଷାକୁ କାର୍ଯ୍ୟକାରୀ କରିବା ଅବଶ୍ୟକ। ଯାହା ଫଳରେ ଅନେକ ପିଲା ଶିକ୍ଷାକୁ ଗୁରୁତ୍ୱ ଦେଇ ଶିକ୍ଷା ଗ୍ରହଣ କରିଥାନ୍ତେ ବୋଲି ସେ କହିଛନ୍ତି। ଅନ୍ୟପକ୍ଷେ ଓଷ୍ଟାର ସଭାପତି ପ୍ରକାଶ ମହାନ୍ତି କହିଛନ୍ତି ଯେ କୋରୋନାରେ 8 ମାସ ବିତିଯାଇଥିଲେ ବି ଶିକ୍ଷାକୁ ନେଇ କୌଣସି ଫଳପ୍ରଦ ହୋଇନାହୁଁ। ଯାହାକୁ ନେଇ ଆଗାମୀ ଦିନରେ ଛାତ୍ର ଛାତ୍ରୀଙ୍କର ଜୀବନ ସମ୍ପୂର୍ଣ୍ଣ ରୂପେ ଅନ୍ଧାରମୟ । ଆଗାମୀ ଦିନରେ ଛାତ୍ର ଛାତ୍ରୀଙ୍କ ଭବିଷ୍ୟତ କିପରି ରହିବ ସେନେଇ ଚିନ୍ତା ପ୍ରକଟ କରିଛନ୍ତି ପ୍ରକାଶ । ସେହିପରି ଅଭିଭାବକ ସଂଘର ସଭାପତି ବାସୁଦେବ ଭଟ କହିଛନ୍ତି ଯେ ରାଜ୍ୟର ଶିକ୍ଷା ବ୍ୟବସ୍ଥା ବର୍ତ୍ତମାନ ସମୟରେ ଭୁଶୁଡିବା ପରିସ୍ଥିଟିରେ ରହିଛି। କୋରୋନା ମହାମାରୀ ସମୟରେ ଲାକଡାଉନ ଓ ସଟଡାଉନ ଭିତରେ ସରକାରଙ୍କୁ ବାରମ୍ବାର ଅବଗତ କରିଥିଲେ ମଧ୍ୟ ଯେଉଁ ଧାରା ରେ ଅନଲାଇନ କ୍ଳାସ ହେବା କଥା ସେହି ଧାରାରେ ଏହା କାର୍ଯ୍ୟକାରୀ ହେଉନାହିଁ । ରାଜ୍ୟରେ 31 ଶତକଡା ପିଲାଙ୍କୁ ଅନଲାଇନରେ ପାଠ ପଢା ହେଉଛି । ଯେଭଳି ଭାବେ ଅନଲାଇନ ମାଧ୍ୟମରେ ଶିକ୍ଷା ବ୍ୟବସ୍ଥା କରାଯାଇଛି ସେହିଭଳି ଭାବରେ ସରକାର ଭିତ୍ତିଭୂମି ଓ ଆଇଟି କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରିବାର ରହିଥିଲା ଆବଶ୍ୟକତା। ଏମିତିରେ ଦେଖିବାକୁ ମିଳୁଛି ଯେ ରାଜ୍ୟର ଅନେକ ସ୍ଥାନ ରହିଛି ଯେଉଁଠି ଛାତ୍ରଛାତ୍ରୀ ଅନଲାଇନ ଶିକ୍ଷା ପାଇଁ ନେଟୱାର୍କ ଅଭାବରୁ କେଉଁଠି ଗଛ ଉପରେ ତ ଆଉ କେଉଁଠି ପାହାଡ ଉପରେ ତ...ବେଳେବେଳେ ଗାଁ ବାହାରକୁ ଆସିବାକୁ ବାଧ୍ୟ ହେଉଛନ୍ତି । ରାଜ୍ୟରେ 31 ପ୍ରତିଶତ ପିଲାଙ୍କୁ ଅନଲାଇନରେ ପାଠ ପଢା ହେଉଛି। ହେଲେ ଗ୍ରାମାଞ୍ଚଳ ଶିକ୍ଷା କ୍ଷେତ୍ରରେ ପଛୁଆ ଥିବାବେଳେ ଏବେ କୋରୋନା ଏଠାକାର ଛାତ୍ରଛାତ୍ରୀଙ୍କ ପାଇଁ ବୋଝ ଉପରେ ନଳିତାବିଡା ସାଜିଛି । ଆଣ୍ଡ୍ରଏଡ କଥା ଦୂରରେ ଥାଉ ଅଧିକାଂଶ ପରିବାର ପାଖରେ ନାହିଁ ମୋବାଇଲ ଫୋନ । ଅନେକ ପରିବାରରେ ଆର୍ଥିକ ସ୍ଥିତି ମଧ୍ୟ ସ୍ବଚ୍ଛଳ ନାହିଁ । ଯଦି ବି କାଁ ଭାଁ କାହା ପାଖରେ ଫୋନ ରହିଛି, ତଥାପି ବିଦ୍ୟୁତ ସୁବିଧା ଭଲ ନଥିବାରୁ ଏହାକୁ ଚାର୍ଜ କରିବା ବି କାଠିକର ପାଠ ହୋଇପଡିଛି ।ରାଜ୍ୟରେ ଅନଲାଇନ ଶିକ୍ଷା ବ୍ୟବସ୍ଥା ଏକ ପ୍ରକାରର ଲୋକଦେଖାଣିଆ ପାଲଟିଥିବା ବେଳେ ଯଦି ଆଗାମୀ ଦିନରେ ସ୍କୁଲରେ ଏପରି ତାଲା ଝୁଲେ ତାହେଲେ ଛାତ୍ରଛାତ୍ରୀଙ୍କ ଭବିଷ୍ୟତ ଯେ ଅନ୍ଧକାରମୟ ହୋଇଯିବ ଏଥିରେ ସନ୍ଦେହ ନାହିଁ । ଏଭଳିସ୍ଥିତିରେ ରାଜ୍ୟର ଭବିଷ୍ୟତ ସମ୍ପର୍କରେ ସରକାରଙ୍କୁ ଚିନ୍ତା କରିବାର ରହିଛି ଆବଶ୍ୟକତା ।
ଭୁବନେଶ୍ବରରୁ ବିକାଶ କୁମାର ଦାସ, ଇଟିଭି ଭାରତ
