ଭୁବନେଶ୍ବର: ଲକଡାଉନ ସମୟରେ ବିଭିନ୍ନ ରାଜ୍ୟରେ କ’ଣ ରହିଛି ଶିକ୍ଷାର ଅବସ୍ଥା ଓ ଆଗାମୀ ଦିନରେ ପରିସ୍ଥିତିକୁ ନଜରରେ ରଖି କ’ଣ ରହିଛି ଯୋଜନା, ସେନେଇ ସମସ୍ତ ରାଜ୍ୟ ଶିକ୍ଷା ମନ୍ତ୍ରୀଙ୍କ ସହ ଆଲୋଚନା କରିଛନ୍ତି କେନ୍ଦ୍ର ମାନବ ସମ୍ବଳ ମନ୍ତ୍ରୀ ରମେଶ ପୋଖରିଆଲ । ଭିଡିଓ କନଫରେନ୍ସ ଜରିଆରେ ହୋଇଥିବା ଏହି ଆଲୋଚନା ପରେ ନିଜ ପ୍ରତିକ୍ରିୟା ରଖିଛନ୍ତି ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସମୀର ଦାସ । ଆଲୋଚନାରେ ଖରାଦିନେ ମିଡ ଡେ’ ମିଲ, ଲକଡାଉନରେ ଛାତ୍ରଛାତ୍ରୀଙ୍କୁ ପାଠ୍ୟ ସାମଗ୍ରୀ ପହଞ୍ଚାଇବା ଆଦି ମୁଖ୍ୟ ବିଷୟ ରହିଥିବା ନେଇ ସେ ପ୍ରକାଶ କରିଛନ୍ତି ।
ମନ୍ତ୍ରୀ ସମୀରଙ୍କ କହିବା ଅନୁଯାୟୀ ଆଲୋଚନାରେ ଉଠିଥିବା ପ୍ରସଙ୍ଗରେ ରାଜ୍ୟ ସରକାର ଅନେକ ପୂର୍ବରୁ ପଦକ୍ଷେପ ଗ୍ରହଣ କରିସାରିଛନ୍ତି । ରାଜ୍ୟରେ ଆଗୁଆ ତିନି ମାସର ମିଡ ଡେ’ ମିଲ ବଣ୍ଟା ସରିଛି । ସେପଟେ ଛାତ୍ରଛାତ୍ରୀଙ୍କ ପାଖରେ ପାଠ୍ୟ ସାମଗ୍ରୀ ପହଞ୍ଚାଇବା ପ୍ରସଙ୍ଗରେ ମଧ୍ୟ ରାଜ୍ୟ ସରକାର ପୂର୍ବରୁ ବହିଗୁଡିକୁ ପହଞ୍ଚାଇ ଦେଇଛନ୍ତି । ତେବେ ଯୁକ୍ତ 2 ପରୀକ୍ଷା ବାକି ରହିଥିବା ପ୍ରସଙ୍ଗ, ଏହାର ନିଷ୍ପତ୍ତି ସିବିଏସଇ ଗାଇଡ ଲାଇନ ଉପରେ ନିର୍ଭର କରିବ ବୋଲି ମନ୍ତ୍ରୀ ସମୀର ଦାସ କହିଛନ୍ତି ।
ସେ ଏହା ମଧ୍ୟ କହିଛନ୍ତି କି ବୈଠକରେ ଇ-ଲର୍ଣ୍ଣିଂ ଉପରେ ଗୁରୁତ୍ବାରୋପ କରାଯାଇଥିଲା । ଦୂରଦର୍ଶନରେ ପାଠ ପଢା ପାଇଁ ସମସ୍ତ ରାଜ୍ୟ ଦାବି କରିଛନ୍ତି । ସ୍ବତନ୍ତ୍ର ସ୍ଲଟ ସହ ବିନା ଦେୟରେ ପାଠ ପଢାର ବ୍ୟବସ୍ଥା କରିବାକୁ କେନ୍ଦ୍ର ନିକଟରେ ଦାବି କରିଛନ୍ତି ସମସ୍ତ ରାଜ୍ୟ । ଏହାକୁ ସମସ୍ତ ରାଜ୍ୟର ଶିକ୍ଷା ମନ୍ତ୍ରୀମାନେ ସମର୍ଥନ କରିଛନ୍ତି । ଏଥିସହ ଆଇସିଟି ଯୋଜନାରେ ପିଲାଙ୍କୁ ଚଳିତ ଶିକ୍ଷାବର୍ଷରେ ନିଯୁକ୍ତି ପାଇଁ ରାଜ୍ୟ ଦାବି ରଖିଛି ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
