ଭୁବନେଶ୍ବର: ଓଲିଉଡ ଜଗତର ବରିଷ୍ଠ ଅଭିନେତା ବିଜୟ ମହାନ୍ତିଙ୍କ ମୃତ୍ୟୁର ମିଥ୍ୟା ଖବର ପ୍ରସାର ନେଇ ତାତିଲା ଓଡିଶା ସିନେ ଆର୍ଟିଷ୍ଟ ଆସୋସିଏସନ । ସିନେ ଜଗତର ବିଶିଷ୍ଟ ଅଭିନେତା ବିଜୟ ମହାନ୍ତି ଅସୁସ୍ଥ ହୋଇ ଚିକିତ୍ସିତ ହେଉଛନ୍ତି । ଏହି ସମୟରେ ଗତକାଲି (ସୋମବାର) ଏକ ୱେବ ଚ୍ୟାନେଲରେ ତାଙ୍କର ମୃତ୍ୟୁ ହୋଇଥିବା ଖବର ପ୍ରସାରଣ କରାଯାଇଥିଲା । ଯାହା ପରେ ସାମାଜିକ ଗଣମାଧ୍ୟମରେ ଖୁବ ଜୋରରେ ପ୍ରଚାର କରାଯାଇଥିଲା । ଯାହାକୁ ନେଇ ଆଜି (ମଙ୍ଗଳବାର) ସିନେଜଗତ ସହିତ ଜଡିତ ସଙ୍ଗଠନ ପକ୍ଷରୁ ରାଜଧାନୀର ବିଭିନ୍ନ ଥାନାରେ ଏଥଲା ଦାଏର କରାଯାଇଛି ।
କ୍ୟାପିଟାଲ ଥାନାରେ ଓଡିଶା ସିନେ ଆର୍ଟିଷ୍ଟ ଆସୋସିଏସନ ପକ୍ଷରୁ ବରିଷ୍ଠ ଅଭିନେତା ଉତ୍ତମ ମହାନ୍ତି, ଶ୍ରୀତମ ଦାସ, ଉଷଶି ମିଶ୍ର, ସ୍ନିଗ୍ଧା ମହାନ୍ତି ଓ ଅନ୍ୟ ଅଭିନେତା ଅଭିନେତ୍ରୀମାନେ ଏତଲା ଦେଇଛନ୍ତି । ଏହାବ୍ୟତୀତ ଇନଫୋସିଟି ଥାନାରେ କଳିଙ୍ଗ ସିନେ ଆର୍ଟସ ଫାଉଣ୍ଡେସନ ପକ୍ଷରୁ ମଧ୍ୟ ଅନୁରୂପ ଏଫଆଇଆର ଦାଖଲ ହୋଇଛି । ଏହି ଖବର ପ୍ରସାରଣ କରିଥିବା ସଂସ୍ଥାର ମୁଖ୍ୟଙ୍କ ବିରୁଦ୍ଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ଗିରଫ କରିବାକୁ ଦାବି କରାଯାଇଛି ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
