ଭୁବନେଶ୍ବର: ରାସନ ସହ ଆଧାର ଲିଙ୍କର ଅବଧି ସେପ୍ଟେମ୍ବର 15 ଅର୍ଥାତ ଗତକାଲି ଶେଷ ହୋଇଛି । ତେବେ ପାଖାପାଖି ୯ଲକ୍ଷରୁ ଅଧିକ ହିତାଧିକାରୀ ରାସନ ସହ ଆଧାର ଲିଙ୍କ କରିନଥିବା ଜଣାପଡିଛି । ତେବେ ସ୍ବତନ୍ତ୍ର ଡ୍ରାଇଭ ଜରିଆରେ କାହିଁକି ୯ଲକ୍ଷ ହିତାଧିକାରୀଙ୍କ ଆଧାର ସଂଯୋଗ ହୋଇପାରି ନାହିଁ ତାର କାରଣ ଖୋଜୁଛି ଯୋଗାଣ ବିଭାଗ । ତେବେ ଏହାକୁ ନେଇ ସରକାରଙ୍କୁ ବି ବିରୋଧୀ କଡା ସମାଲୋଚନା କରିଥିବା ବେଳେ ଶାସକ ଦଳ ବି ଏହାର ଉତ୍ତର ରଖିଛି।
ସେପ୍ଟେମ୍ବର ୧୫ ଥିଲା ରାସନ ସହ ଆଧାର ଲିଙ୍କର ଶେଷ ତାରିଖ । ଏହି ସମୟ ସୀମା ମଧ୍ୟରେ ପ୍ରାୟ ୯ଲକ୍ଷ ପାଖାପାଖି ହିତାଧିକାରୀ ସେମାନଙ୍କ ରାସନ କାର୍ଡ ସହ ଆଧାର ଲିଙ୍କ କରି ପାରିନଥିବା ଜଣାପଡିଛି । ରାଜ୍ୟରେ ୩କୋଟି ୨୬ ଲକ୍ଷ ହିତାଧିକାରୀ ଅଛନ୍ତି ଯେଉଁମାନେ ଜାତୀୟ ଖାଦ୍ୟସୁରକ୍ଷା ଅଧିକାର ଆଇନ ଅନ୍ତର୍ଭୁକ୍ତ ।
ଆଧାର ଲିଙ୍କ କରିପାରିନଥିବା ୯ଲକ୍ଷ ହିତାଧିକାରୀ କାହିଁକି ଆଧାର ସଂଯୋଗ କରିପାରିନାହାଁନ୍ତି ତାର କାରଣ ଖୋଜିବ ଖାଦ୍ୟ ଓ ଯୋଗାଣ ବିଭାଗ । ତେବେ ଏହାକୁ ନେଇ ବିରୋଧୀ ସରକାରଙ୍କୁ ଟାର୍ଗେଟ କରିଛନ୍ତି । ଭୋଟ ପାଇବା ପାଇଁ ଦଳୀୟ ଲୋକଙ୍କୁ ମନଇଚ୍ଛା ରାସନ କାର୍ଡ ବାଣ୍ଟିଥିଲେ ସରକାର । ଏବେ ଆଧାର ଲିଙ୍କ ପରେ ସରକାରଙ୍କ ଅସଲ ମୁଖା ପଦାରେ ପଡିବ ବୋଲି କହିଛନ୍ତି ବିରୋଧୀ କଂଗ୍ରେସ ଓ ବିଜେପି । ଗୋଟିଏ ଦେଶ ଗୋଟିଏ ରାସନ ବ୍ୟବସ୍ଥା ସାରା ଦେଶରେ ଲାଗୁ ହେବାକୁ ଯାଉଛି ।
ପାଇଲଟ ପ୍ରୋଜେକ୍ଟ ଭାବେ ଭୁବନେଶ୍ବର ମହାନିଗମରେ ସେପ୍ଟେମ୍ବର ୧ ତାରିଖରେ ଏହା ଲାଗୁ ହୋଇଛି । ଆଗାମୀ ଦିନରେ ସାରା ରାଜ୍ୟରେ ଲାଗୁ ହେବ । ବିଜେଡି ବିଧାୟକ ଅରବିନ୍ଦ ଢାଲି କହିଛନ୍ତି, "ସବୁ ଲୋକ କିଭଳି ଉପକାର ପାଇବେ ସେ ନେଇ ସରକାର କାର୍ଯ୍ୟ କରିଛନ୍ତି । ଦଳୀୟ ଭିତ୍ତିରେ କୌଣସି କାମ ହୁଏନି । ଯଦି ଭୁଲ ଅଛି ତେବେ ସଂଶୋଧନ ହେବ"।
ଭୁବନେଶ୍ବରରୁ ତପନ କୁମାର ଦାସ, ଇଟିଭି ଭାରତ
