ଭୁବନେଶ୍ବର:ସ୍କୁଲ ଖୋଲିବା ପ୍ରସଙ୍ଗରେ ଗଣଶିକ୍ଷା ମନ୍ତ୍ରୀ ସମୀର ଦାସଙ୍କ ପ୍ରତିକ୍ରିୟା । ଦୀର୍ଘ 9 ମାସ ହେବ ସ୍କୁଲ ଖୋଲିବା ନେଇ କୌଣସି ନିଷ୍ପତ୍ତି ହେଇପାରୁନଥିଲା ବେଳେ ଏବେ ନୂଆ ଷ୍ଟ୍ରେନ ଡରାଉଛି। କେବେ ଓ କିପରି ସ୍କୁଲ ଖୋଲାଯିବ ସେନେଇ ବିଚାରବିମର୍ଶ ଚାଲିଛି ବୋଲି ମନ୍ତ୍ରୀ ସମୀର ଦାସ କହିଛନ୍ତି ।
ସେପଟେ ସିବିଏସଇ ପରୀକ୍ଷା ତାରିଖ ଘୋଷଣା ପରେ ଏହି ଧାରାରେ ଆଦର୍ଶ ବିଦ୍ୟାଳୟ ସହ କେତେକ ଘରୋଇ ବିଦ୍ୟାଳୟର ଛାତ୍ରଛାତ୍ରୀ ପରୀକ୍ଷା ଦେବେ । ତେବେ କିପରି ବ୍ୟବସ୍ଥା କରାଯିବ ସେନେଇ ବିଚାର କରାଯାଉଛି । ଅନ୍ୟପଟେ, ଦେଶରେ କୋରୋନା ନୂଆ ଷ୍ଟ୍ରେନ ଚିହ୍ନଟ କରାଯାଇଛି । ସରକାରଙ୍କ ପାଇଁ ଛାତ୍ରଛାତ୍ରୀଙ୍କ ସ୍ବାସ୍ଥ୍ୟସମ୍ପଦ ଆଗରେ ରହିଛି । ତେଣୁ ସମସ୍ତ ଦିଗକୁ ଦେଖି ଖୁବଶୀଘ୍ର ସ୍କୁଲ ଖୋଲିବ ବୋଲି କହିଛନ୍ତି ସମୀର ଦାସ ।
ସୂଚନାଯୋଗ୍ୟ, ଗଣଶିକ୍ଷା ମନ୍ତ୍ରୀ ସମୀର ଦାସ ସ୍କୁଲ ପ୍ରସଙ୍ଗରେ ପ୍ରତିକ୍ରିୟା ଦେଇ କହିଥିଲେ ନବବର୍ଷ ଆରମ୍ଭରୁ ସମସ୍ତ ସ୍କୁଲ ଓ କଲେଜ ଖୋଲାଯିବ । 100 ଦିନ ପାଠ ପଢାଇ ପରୀକ୍ଷା କରାଯିବ । ଏପରିକି ଶନିବାର ଓ ରବିବାର ଛୁଟି ଦିନରେ ମଧ୍ୟ କ୍ଲାସ ହେବ ବୋଲି ମନ୍ତ୍ରୀ କହିଥିଲେ । ମନ୍ତ୍ରୀଙ୍କ ଏଭଳି ମନ୍ତବ୍ୟକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନା ପସନ୍ଦ କରିଥିଲେ । ସମସ୍ତ ଦୃଷ୍ଟିକୋଣକୁ ଲକ୍ଷ୍ୟ କରି ସରକାର ନିଷ୍ପତ୍ତି ନେବେ ବୋଲି ମୁଖ୍ୟମନ୍ତ୍ରୀ କହିଥିଲେ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
