ଭୁବନେଶ୍ବର: ଆଉ ଦିନ କେଇଟା ପରେ ଧରାବତରଣ କରିବେ ଜଗତ ଜନନୀ ମା' ଦୁର୍ଗା । ଏନେଇ ଚାରିଆଡେ ଆରମ୍ଭ ହେଲାଣି ଉତ୍ସବର ମାହୋଲ । ଦୁର୍ଗା ପୂଜା ପାଇଁ ଆରମ୍ଭ ହେଲାଣି ତୋରଣ ସଜ୍ଜା । ଚଳିତ ବର୍ଷ କଟକଣା ମୁକ୍ତ ଦୁର୍ଗା ପୂଜା ପାଇଁ ପ୍ରସ୍ତୁତି ଜୋରଦାର ହୋଇଛି । ଦୀର୍ଘ ଦୁଇ ବର୍ଷର କରୋନା କଟକଣା ପରେ ଚଳିତ ବର୍ଷ ମହା ଆଡମ୍ବରରେ ପାଳିତ ହେବ ଦୁର୍ଗାପୂଜା । ଏନେଇ ରାଜଧାନୀର ସମସ୍ତ ପୂଜା ମଣ୍ଡପରେ ପ୍ରସ୍ତୁତି ଜୋରଦାର ଚାଲିଛି । ଚଳିତ ବର୍ଷ ଝାରପଡା ଦୁର୍ଗାପୂଜା ସମିତି ପକ୍ଷରୁ ୪୦ ଲକ୍ଷରୁ ଅଧିକ ଟଙ୍କାର ବଜେଟ ଅଟକଳ କରାଯାଇଛି ।
ଚଳିତ ବର୍ଷ ଝାରପଡା ଦୁର୍ଗାପୂଜା ସମିତିରେ ଆକର୍ଷଣ ସାଜିବ ଋଷିଆର ସେଣ୍ଟ ପିଟରବର୍ଗ ସହରର ଷ୍ଟେଟ୍ ହରମିଟେଜ୍ ସଂଗ୍ରହାଳୟ(State Hermitage Museum)। ୮୫ ଫୁଟ ଉଚ୍ଚ ଏବଂ ୧୫୦ ଫୁଟ ଚଉଡାରେ ନିର୍ମାଣ ହେବ ତୋରଣ । ମୁଖ୍ୟ କାରୀଗର ସହ ୫୦ ସହକାରୀଗର ନିର୍ମାଣ କରୁଛନ୍ତି ଏହି ମ୍ୟୁଜିୟମ। ବାଉଁଶ, କାଠବିଟ୍, ପ୍ଳାଏ, ଫାଇବର, ସନ୍ପ୍ୟାକ୍, ୟୁନିଫୋମ୍ ଓ ରଙ୍ଗିନ୍ କାଚରେ ଆକର୍ଷଣୀୟ ହେବ ହରମିଟେଜ୍ ମ୍ୟୁଜିୟମ୍ । ୩ଟି ମୁଖ୍ୟ ଗେଟ୍ ସହ ୨ଟି ପ୍ରସ୍ଥାନ ଗେଟ୍ରେ ସ୍ଥାନ ପାଇବ ପୌରାଣିକ, ଆଧୁନିକ ଏବଂ ଆଦିବାସୀ କଥାବସ୍ତୁ ।
''ବଙ୍ଗୀୟ ପୂଜା ନୀତିରେ ମା’ଙ୍କୁ ଆବାହନ କରାଯିବ । ମହାସପ୍ତମୀ ଠାରୁ ମଣ୍ଡପରେ ଆରମ୍ଭ ହେବ ପୂଜାର୍ଚ୍ଚନା । ସପ୍ତମୀ, ନବମୀ ଏବଂ ଦଶମୀରେ ଭକ୍ତମାନଙ୍କ ପାଇଁ ଖେଚୁଡି ଭୋଗର ବ୍ୟବସ୍ଥା କରାଯାଇଛି । ୧୨ ଫୁଟ ଉଚ୍ଚର ଦୁର୍ଗାଙ୍କ ମୂର୍ତ୍ତି ସହ ୨୦ ଫୁଟ ଉଚ୍ଚର ବୁଲେନ୍ ଓ ସୁନେଲି ମେଢ ନିର୍ମାଣ କରାଯିବ। ସୁରକ୍ଷା ଦୃଷ୍ଟିରୁ ପୂଜା ମଣ୍ଡପରେ ୨୦ଟି ସିସିଟିଭି ଲଗାଯିବା ସହ ବ୍ୟାପକ ସ୍ବେଚ୍ଛାସେବୀ ନିଯୁକ୍ତି କରିବ ସମିତି ଭକ୍ତଙ୍କ ଶୃଙ୍ଖଳିତ ଦର୍ଶନ ଏବଂ ଭିନ୍ନକ୍ଷମ, ବରିଷ୍ଠ ନାଗରିକଙ୍କ ଦର୍ଶନ ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି । ଚଳିତ ବର୍ଷ ପୂଜାରେ ପରିମଳ ବ୍ୟବସ୍ଥା ଏବଂ ଟ୍ରାଫିକ୍ ପରିଚାଳନାକୁ ଗୁରୁତ୍ବ ଦିଆଯାଇଥିବା ସମିତି ପକ୍ଷରୁ କୁହାଯାଇଛି ।''
ଏହା ମଧ୍ୟ ପଢନ୍ତୁ-ଆଜି ହାଇଦ୍ରାବାଦରେ ନୂଆଁଖାଇ ଭେଟଘାଟ୍
ଅନ୍ୟପଟେ ୨ ବର୍ଷ ପରେ ବିନା କଟକଣାରେ ହେବ ଦୁର୍ଗା ପୂଜା । ଏନେଇ ଆରମ୍ଭ ହେଲାଣି ପ୍ରସ୍ତୁତି । ହେଲେ ବିଏମସିର ଅବ୍ୟବସ୍ଥାକୁ ନେଇ ଚିନ୍ତାରେ କମିଟି । ଝାଡ଼ପଡା ଦୁର୍ଗାମଣ୍ଡପ ସମ୍ମୁଖରେ ଥିବା ରାସ୍ତା ଖାଲ ଖମାର ସାଙ୍ଗକୁ ପାଣିରେ ଭର୍ତ୍ତି ହୋଇଛି ପୁଣି କେଉଁଠି ପିଚୁ ଉଠିଯାଇଛି । ଅନ୍ୟପଟେ ନୟାପଲ୍ଲୀ ପୂଜା ମଣ୍ଡପ ସମ୍ମୁଖ ରାସ୍ତର ଦୃଶ୍ୟ ମଧ୍ୟ ସାମନ । ଖାଲି ଏହି ଦୁଇଟି ନୁହେଁ ରାଜଧାନୀର ଏମିତି ଅନେକ ପୂଜା ମଣ୍ଡପରେ ସମାନ ସମସ୍ୟା । ଭକ୍ତଙ୍କ ସୁବିଧା ପାଇଁ ପୂଜା ପୂର୍ବରୁ ସବୁ ସମାଧାନ ପାଇଁ ବିଏମସି ନିକଟରେ ଦାବି ଜଣାଇଛନ୍ତି ପୂଜା କମିଟି ଗୁଡ଼ିକ ।
ସେପଟେ ପୂଜାକୁ ସଠିକ ପରିଚାଳନା ପାଇଁ ବିଭିନ୍ନ ବିଭାଗ ସହ BMC ସମନ୍ବୟ ବୈଠକ କରିସାରିଛି । ମେୟର, କମିଶନରଙ୍କ ଉପସ୍ଥିତିରେ ବିଭାଗୀୟ ଅଧିକାରୀଙ୍କ ସହ ବୈଠକ କରାଯାଇଥିବାବେଳେ, ଏବର୍ଷ ରାଜଧାନୀରେ ୧୭୮ଟି ମେଢରେ ପୂଜା ହେବ। ତେଣୁ ଲାଇଟ, ରାସ୍ତା ମରାମତି, ପରିମଳ ବ୍ୟବସ୍ଥା, ଶାନ୍ତି ଶୃଖଳାରେ ପୂଜା ଉପରେ ଗୁରୁତ୍ୱ ଦିଆଯାଇଛି । ପୂଜା ପୁର୍ବରୁ ରାସ୍ତା ମରାମତି ଓ ମୁକୁଳା ଡ୍ରେନ କାମ ସାରିବା ପାଇଁ ଲକ୍ଷ୍ୟ ରଖିଛି ବିଏମସି ।
୨ ବର୍ଷ ପରେ କୋରୋନା କଟକଣା ହଟିଥିବାରୁ ବେଶ୍ ଉତ୍ସାହର ସହ ରାଜଧାନୀବାସୀ ଚାହିଁ ରହିଛନ୍ତି ଦୂର୍ଗା ପୂଜାକୁ । ଚଳିତ ବର୍ଷ ଝାରପଡାରେ ମୀନାବଜାର ସମେତ ପ୍ରତିଦିନ ସାଂସ୍କୃତିକ କାର୍ଯ୍ୟକ୍ରମ ଅନୁଷ୍ଠିତ ହେବ । ଦଶମୀ ତିଥିରେ ସମିତି ପକ୍ଷରୁ ୪୦ ଫୁଟ ଉଚ୍ଚତାର ରାବଣପୋଡି କର୍ଯ୍ୟକ୍ରମ ରହିଛି ।
