ଭୁବନେଶ୍ବର: ଆଜିଠୁ ଭୁବନେଶ୍ବରରୁ ପୁଣକୁ ଆରମ୍ଭ ହେଲା ସିଧାସଳଖ ବିମାନ ସେବା । ଏୟାର ଏସିଆ ଲିମିଟେଡ ଦ୍ବାରା ପରିଚାଳିତ ଏହି ସେବାକୁ ବାଣିଜ୍ୟ ଓ ପରିବହନ ମନ୍ତ୍ରୀ ପଦ୍ମନାଭ ବେହେରା ଭୁବନେଶ୍ବର ବିମାନ ବନ୍ଦରଠାରେ ଶୁଭାରମ୍ଭ କରିଛନ୍ତି । ଏହାଦ୍ବାରା ରାଜ୍ୟର ପର୍ଯ୍ୟଟନ ଶିଳ୍ପକୁ ସମୃଦ୍ଧ କରିବା ସହ ଆର୍ଥିକ ଅଭିବୃଦ୍ଧିରେ ସହାୟକ ହେବ ବୋଲି ପରିବହନ ମନ୍ତ୍ରୀ ମତ ପ୍ରକାଶ କରିଛନ୍ତି ।
ଏହି ବିମାନ ଭୁବନେଶ୍ବର ବିମାନ ବନ୍ଦରରୁ ଅପରାହ୍ନ 1ଟା 50ରେ ଛାଡି ପୁନେଠାରେ ଅପରାହ୍ନ 3ଟା 55ରେ ପହଞ୍ଚିବ । ସେହିପରି ପୁନେ ବିମାନ ବନ୍ଦରଠାରୁ ଅପରାହ୍ନ 4ଟା 35ରେ ଛାଡି ଭୁବନେଶ୍ବରରେ ସନ୍ଧ୍ୟା 6ଟା 40ରେ ପହଞ୍ଚିବ । ପ୍ରତି ସପ୍ତାହରେ କେବଳ ଶନିବାର ବ୍ୟତୀତ ଅନ୍ୟ ଛଅ ଦିନ ଏହି ବିମାନ ସେବା ଉପଲବ୍ଧ ହେବ ବୋଲି ଏୟାର ଏସିଆ ଲିମିଟେଡ ସୂତ୍ରରୁ ପ୍ରକାଶ ପାଇଛି ।
ତେବେ ଏହି ଶୁଭାରମ୍ଭ କାର୍ଯ୍ୟକ୍ରମରେ ବାଣିଜ୍ୟ ଓ ପରିବହନ ବିଭାଗର ପ୍ରମୁଖ ଶାସନ ସଚିବ ମଧୁସୂଦନ ପାଢୀ, ଏୟାର ଏସିଆ ଲିମିଟେଡର ବାଣିଜ୍ୟିକ ମୁଖ୍ୟ ଅଙ୍କର ଗର୍ଗ, ଗ୍ରାଉଣ୍ଡ ଅପରେସନ ମୁଖ୍ୟ ସଲିମ ଚୌଧୁରୀ ପ୍ରମୁଖ ଉପସ୍ଥିତ ଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
