ଭୁବନେଶ୍ବର: ରାଜଧାନୀ ଭୁବନେଶ୍ବରସ୍ଥିତ ସତ୍ୟନଗରରେ ମୃତଦେହ ଦାହ ପାଇଁ ଦୀର୍ଘ ବର୍ଷ ହେବ ଶ୍ମଶାନ, କବରସ୍ଥାନ ଓ ସମାଧି ସ୍ଥଳୀ ରହିଛି । ମହାମାରୀ ସମୟରେ ଦୈନିକ ଶହ ଶହ ମୃତଦେହ ସତ୍କାର ପାଇଁ ଏହି ଶ୍ମଶାନକୁ ଆସୁଥିବାରୁ ପରିବେଶ ଦୂଷିତ ହେବା ସହ ସ୍ଥାନୀୟ ଅଞ୍ଚଳରେ ଭୂତଳ ଜଳ ସମସ୍ୟା ସୃଷ୍ଟି ହେଉଛି । ସତ୍ୟନଗର ଉନ୍ନୟନ କମିଟି ଏନେଇ ମଙ୍ଗଳବାର ଅଭିଯୋଗ କରିଛି । ଏଥିସହ ଶ୍ମଶାନକୁ ଯଥାଶୀଘ୍ର ସ୍ଥାନାନ୍ତର କରିବାକୁ ଦାବି କରିଛି କମିଟି ।
ପରିବେଶ ଦୂଷିତ ସମସ୍ୟାକୁ ଦୃଷ୍ଟିରେ ରଖି ଉକ୍ତ ଶ୍ମଶାନକୁ ସ୍ଥାନାନ୍ତର କରିବାକୁ ଏକ ଦସ୍ତଖତ ଅଭିଯାନ ପରେ ମଙ୍ଗଳବାର BMC କର୍ତ୍ତୃପକ୍ଷଙ୍କୁ ଏକ ସ୍ମାରକ ପତ୍ର ପ୍ରଦାନ କରିଛନ୍ତି ସତ୍ୟନଗର ଓ ଶହୀଦ ନଗର ବାସିନ୍ଦା । 600 ସ୍ଥାନୀୟ ବାସିନ୍ଦାଙ୍କ ଦସ୍ତଖତ ସମ୍ମିଳିତ ଏକ ଦାବିପତ୍ର ବିଏମସି ଅତିରିକ୍ତ କମିଶନରଙ୍କୁ ପ୍ରଦାନ କରିଛନ୍ତି । ଏହାପୂର୍ବରୁ ମଧ୍ୟ BMC ନିକଟରେ ଅନେକ ଥର ଦାବି କରାଯାଇଛି । ହେଲେ ବିଏମସି କୌଣସି ପ୍ରକାରର ସମାଧାନ କରୁନାହିଁ ବୋଲି ଅଭିଯୋଗ ଆଣିଛନ୍ତି ସତ୍ୟନଗର ବିକାଶ ଓ ସାଂସ୍କୃତିକ ସୋସାଇଟି ।
ସେପଟେ ଦସ୍ତଖତ ସମ୍ମିଳିତ ଏକ ସ୍ମାରକପତ୍ର ସତ୍ୟନଗରବାସୀଙ୍କ ଠାରୁ ମିଳିଛି, ସ୍ଥିତି ଦେଖି ଆଲୋଚନା କରି ଆବଶ୍ୟକୀୟ ପଦକ୍ଷେପ ନିଆଯିବ ବୋଲି BMC କର୍ତ୍ତୃପକ୍ଷ କହିଛନ୍ତି ।
ଭୁବନେଶ୍ବରରୁ ସଞ୍ଜୀବ କୁମାର ରାୟ, ଇଟିଭି ଭାରତ
