ଭୁବନେଶ୍ବର: ପରାଧୀନ ଓଡିଶାର ଶେଷ ପ୍ରଧାନମନ୍ତ୍ରୀ ତଥା ସ୍ବାଧୀନତା ପରବର୍ତ୍ତୀ ଓଡିଶାର ପ୍ରଥମ ମଖ୍ୟମନ୍ତ୍ରୀ ଡ. ହରେକୃଷ୍ଣ ମହତାବ । ସେ ଥିଲେ ଓଡିଶା ରାଜନୀତିର ଦ୍ରୋଣାଚାର୍ଯ୍ୟ । ଓଡିଶା ରାଜ୍ୟ ଗଠନ ତଥା ଭୁବନେଶ୍ବରକୁ ରାଜ୍ୟର ରାଜଧାନୀ କରିବାରେ ତାଙ୍କର ଉଦ୍ୟମ ଉଲ୍ଲେଖନୀୟ ଥିଲା ।
ଆସନ୍ତା 21ରେ ତାଙ୍କର 120ତମ ଜୟନ୍ତୀ ଉତ୍ସବ ଥିବାବେଳେ ରାଜ୍ୟ ସରକାର ତାଙ୍କ ନାମରେ ଏକ ଜନମଙ୍ଗଳକାରୀ ଯୋଜନା କାର୍ଯ୍ୟକାରୀ କରିବାକୁ ଦାବି କରିଛି ଡ. ହରେକୃଷ୍ଣ ଜୟନ୍ତୀ କମିଟି । ଶନିବାର ତାଙ୍କ ଜୟନ୍ତୀ ପାଳନ ନେଇ ଆୟୋଜିତ ସାମ୍ବାଦିକ ସମ୍ମିଳନୀରେ କମିଟିର ସାଧାରଣ ସମ୍ପାଦକ ତଥା ଜଟଣୀ ବିଧାୟକ ସୁର ରାଉତରାୟ ଏନେଇ ସୂଚନା ଦେଇଛନ୍ତି ।
ଆସନ୍ତା ନଭେମ୍ବର 20 ଓ 21 ଦୁଇ ଦିନ ଧରି ଏହି ଉତ୍ସବ ପାଳନ ପାଇଁ ବ୍ୟବସ୍ଥା ଗ୍ରହଣ କରାଯାଇଛି । 21ରେ ପିଏମଜି ଠାରେ ଆୟୋଜିତ ହେବାକୁ ଥିବା ଉତ୍ସବରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ, ରାଜ୍ୟପାଳ ପ୍ରଫେସର ଗଣେଶୀ ଲାଲ, ଆନ୍ଧ୍ରପ୍ରଦେଶ ରାଜ୍ୟପାଳ ତଥା ଜୟନ୍ତୀ କମିଟିର ସଭାପତି ବିଶ୍ବଭୂଷଣ ହରିଚନ୍ଦନ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଦି ଯୋଗ ଦେବାର କାର୍ଯ୍ୟକ୍ରମ ରହିଛି ।
ଏଥି ସହିତ ରାଜ୍ୟର ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ କାର୍ଯ୍ୟ କରିଥିବା ବ୍ୟକ୍ତିବିଶେଷଙ୍କୁ ସମ୍ମାନିତ କରାଯିବ । ରାଜ୍ୟର ବିଭିନ୍ନ ପ୍ରାନ୍ତରୁ ଆସିଥିବା 51ଟି ପାଇକ ଦଳ ସମେତ ରାଜ୍ୟ ବାହରରୁ ଆସିଥିବା କଳାକାରମାନେ ଶୋଭାଯାତ୍ରାରେ ଭାଗ ନେବେ । ତେବେ ଶନିବାର ଆୟୋଜିତ ସାମ୍ବାଦିକ ସମ୍ମିଳନୀରେ ସଂଗ୍ରାମ ପାଇକରାୟ, ଅମୀୟ ଦାଶ, ପ୍ରକାଶ ମହାନ୍ତିଙ୍କ ଅନ୍ୟମାନେ ମଧ୍ୟ ଉପସ୍ଥିତ ଥିଲେ ।
ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ
